Sanddrif
Sanddrif in die Richtersveld lê aan die suidelike oewer van die Oranjerivier en suidwes van die grenspos met Namibië by Sendelingsdrif.
Die eerste bewoners was die Namavolk wat in die vroeë 1900's van die kusstreek weggetrek en hervestig het in hierdie duinegebied. In die vroeë 1970's is die Baken-diamantmyn hier geopen en het Xhosa- en Sotho-mynwerkers hierheen gekom. Daarom is die Namatradisies hier sterk beïnvloed deur die Nguni-kultuur.
Weens die aanwesigheid van die myn bied die dorpie meer geriewe as die buurdorpies Kuboes, Eksteenfontein en Lekkersing. Hier is 'n skool, winkel en 'n outobank. Daar is 'n gholfbaan en 'n kantoor van Sanparke.