La Foradada d'el Toscar

Esta pachina ye escrita en ribagorzano.

La Foradada d'el Toscar ( /lafoɾa'ðaða.deltos'ka/; oficialment, en castellano, «Foradada del Toscar»^[1]) ye un llugar y municipio aragonés de la provincia de Uesca, situau en la comarca de Ribagorza. La suya población ye de 211 habitants (2011^[1]), en una superficie de 106,58 km² y una densidat de 1,98 hab/km².

Toponimia

El llugar se diz Foradada d'el Toscar por estar chusto debaixo d'un toscar, un aflloramiento de grans cantidatz de piedra tosca.

Como en belatros nuclios de la Ribagorza media, a on se parlla aragonés ribagorzano, amés d'el paradigma d'articlos en uso actual, se i troba toponimos fosilizaus con articlo lo: «lo Panar de las Llagunas» (1613), «Lo campo de los letones» (1613), lo qual da amostra de que d'antes s'usaba.

Cheografía

El llugar de La Foradada se troba a 980 m^[2] en el puerto de la Foradada, a poquetz metros de la corona d'el mismo. Ye chusto debaixo d'una penya calsinera que tiene per nombre «lo Toscar» per l'aflloramiento de grans cantidatz de tosca sedimentaria que i ha. Lo Toscar ye una prollargación de la sierra Ferrera que, per tenir un troz pareix que rompiu, tiene un puntón bell poquet mes deseparau, que ye lo que recibe el nombre de «Foradada». El barranco que naixe en el puerto y baixa per debant de Foradada se diz barranco de la Foradada y desemboca en l'Esera en Navarri.

El municipio entero, en cambio, ye mes llargo en diferents direccions. El primer costau por a on s'esparde ye per l'atra man d'el collau de la Foradada ta la Fueva, a on incluye los llugarons de la Cort y las Cortz que ya son fovanos. Dimpués, tornand ta la cuenca de l'Esera, tamé incluye la valleta de l'Aigüeta de Víu que ye entre la Ferrera y la punta de las Forcas y desemboca en l'embalse d'Argoné, per el mont de la villa de Campo, y comprende los llugarons de Víu y Senz.

Per la vall de l'Esera, incluye los llugars de las Colladas y Navarri per a on el barranco de Foradada s'achunta con el río, y Murillo de Llena, Vacamorta y Espluga, estes tres zaguers en la vall d'el barranco de Vacamorta.

Historia

El llugar de la Foradada eba una aldea que feba parte de l'abadiau de Sant Veturián de la Fueva.^[2] Se'n tiene conoiximiento que existise dende el siglo XI pe'l documento de las decimas de Castillón,^[3] que se van trobar en Castillón de Sos, y pe's cartularios de Roda.^[2]

El nombre apareix como «Foratata» en los primers textos con rasgos de romance. S'ha trobau una persona que se diba «Fedaco de Foratata» citada en los cartularios de Roda, datables d'entre los anyos 964 y 972, se cita el llugar como «villa de Foratata» en l'anyo 1025^[4] y bella persona que se fa dir «de Foratata» en los documentos de Sant Veturián dica, lo menos, 1209.^[4]

A partir d'el siglo XIII pareix que el toponimo s'estabiliza ya como «Foradada». Se troba «termino de Foradada» en 1243 y «villam de Foradada» en 1250, los dos en los cartularios de Sant Veturián.^[4] Amaneix «villam et castrum de Foradada» en 1289, y «Locum dicitur Foradada» en 1293.^[5]

Administración

Como con muitos municipios ha pasau, la Foradada d'el Toscar ye un municipio formau per agregación de los nuclios que el forman.^[6]^[7] Encara que s'ha respectau el nombre orichinal, que fa referencia a'l llugar de la Foradada, el creiximiento d'el municipio en incorporand-se-ie los atros nuclios ha conduciu a que la capitalidat municipal s'haiga tresladau ta unatro nuclio.

En el periodo intercensal 1842-1857 se van achuntar con la Foradada los llugars de las Colladas (formalment «Las Casas de las Colladas»^[6]) y Navarri,^[6] Murillo de Llena,^[6] Senz^[6] y Víu.^[6] Espluga, que eba parte d'el desapareixiu municipio de Merli, se i va achuntar ta 1970.^[6] L'achuntamiento ye en Murillo de Llena.^[7]

Reparto de concellers

Eleccions municipals^[8]
Partito	1979	1983	1987	1991	1995	1999	2003	2007	2011	2015	2019
Partido de los Socialistas de Aragón	-	4	4	4	3	3	1	4	0	2	2
Partido Aragonés	-	-	-	3	4	-	4	1	1	1	2
Partido Popular	-	3	3	-	-	4	0	0	0	2	-
Independients	-	-	-	-	-	-	-	-	4^[9]	-	-
Unión de Centro Democrático	7	-	-	-	-	-	-	-	-	-	-
Total	7	7	7	7	7	7	5	5	5	5	5

Alcaldes

Lista d'alcaldes
Lechislatura	Nombre	Partido politico
1979–1983
1983–1987
1987–1991
1991–1995
1995–1999
1999–2003
2003–2007
2007–2011	María del Carmen Castillón Castillón	Partido de los Socialistas de Aragón
2011–2015	Joaquín Senz Gabás	Independient

Demografía

D'el llugar de la Foradada:

Evolución demografica

1992	1994	1996	1997	1998	1999	2000	2001	2002
-	-	-	-	-	-	28	25	24

2003	2004	2005	2006	2007	2008	2009	2010	2011
22	22	23	23	32	35	38	37	33

2021	2022	2023	2024	2025	2026	2027	2028	-
-	-	-	-	-	-	-	-	-

1990- : población de dreito.
Fuent: Intercensal en l'INE, Series de población en l'INE y Relación d'unidaz poblacionals en l'INE.

De tot el municipio:

Evolución demografica

1992	1994	1996	1997	1998	1999	2000	2001	2002
-	-	-	-	-	-	242	235	228

2003	2004	2005	2006	2007	2008	2009	2010	2011
220	213	220	212	231	238	226	215	211

2021	2022	2023	2024	2025	2026	2027	2028	-
-	-	-	-	-	-	-	-	-

1990- : población de dreito.
Fuent: Intercensal en l'INE, Series de población en l'INE y Relación d'unidaz poblacionals en l'INE.

Parla

La parla actual en el municipio ye principalment de tendencia ribagorzanas, sacand-ne los nuclios de la Cort y las Cortz, que per trobar-se a on se troban manifiestan tendencias mes sobrarbencas que s'adscribirían a l'aragonés fovano. Manimenos, en el llugar de la Foradada, per trobar-se tan alto y de camino ta'l puerto, el contacto sosteniu con la vecina comarca d'el Sobrarbe a traviés de la Fueva fa que se reconoixca bell rasgo de las parlas d'astí que no son guaire comuns en la resta de Ribagorza, como l'apocope de consonants inicials en los articlos «la» y «las», que s'han puesto conoixer como «a» y «as» en boca de vecins de la localidat no fa guaires anyos.

En el siglo XV, el sistema d'articlos que se i emplegaba podría haber estau «lo, los, la, las» perque en el Fogache de 1495 los habitadors el feban servir en los apellidos suyos: «Domingo lo Pueyo», «Marquo la Penya» y «Johan de la Cort», etc.