Autovía Mudéchar

L'A-23 u Autobía Mudéxar (en balenzián Autovia Mudèjar, en castellán Autovia Mudéjar) ye una autobía de titularidat estatal que unirá Murbiedro e o suyo puerto con o Tónel de Somport, trescruzando tot Aragón de norte ta sud e comunicando lo Perineu zentral con o Mediterranio. En l'actualidat (2008), os trampos entre Sagunt e Uesca son operatibos.

Comunicará por tanto as ziudaz de Chaca, Samianigo, Uesca, Zaragoza, Teruel, Segorb e Murbiedro, enlazando con l'Autobía d'o Mediterranio e l'Autobía d'o Nordeste.

Trazato actual

D'os 445,36 quilometros que tendrá una begata s'aigan finalizatas as obras, 360,4 son actualment en funzionamiento, 37,06 en obras e a resta, 47,9 pendients de lizitazión d'obras e redazión de proyeuto. Autualment o tiempo ta ir dende Murbiedro ta Somport ye d'alto u baxo 5 oras e 15 menutos.