Batman

Batman
	Personaxe de Detective Comics (es)
Universu	Universu DC
Creador/a/es	Bob Kane y Bill Finger
Información
Sexu	masculín
Nacimientu	Gotham City (es) ,
Ocupación	empresariu, detective, vixilante, direutor executivu, superhéroe, filántropu y artista marcial
Padres	Thomas Wayne (es) Martha Wayne (personaje) (es)
Fíos	Dick Grayson (es) , Jason Todd (es) , Cassandra Cain (personaje) (es) , Tim Drake (es) , Damian Wayne (es) y Helena Wayne (es)
Residencia	Gotham City (es)
Nacionalidá	Estaos Xuníos
	[editar datos en Wikidata]

Batman (Home-Esperteyu n'asturianu) ye un superhéroe creáu polos estauxunidenses Bob Kane y Bill Finger pa la editorial DC Comics, masque la reconocencia del llabor de Bill Finger nun se dio hasta dempués de que morriera (magar que foron de so idees como'l traxe del héroe, el Batmobile, el comisariu Gordon, el villanu Joker o'l collaciu Robin). Apaeció por primer vez nel númberu 27 de la revista Detective Comics, datáu en mayu de 1939, y ta influyíu polos héroes El Zorro y Phantom, asina como los diseños de Leonardo Da Vinci pa los preseos qu'usa. Al aviesu qu'otros superhéroes, Batman nun tien superpoder dalu, pero ye espertu n'artes marciales, científicu y el meyor detective del mundu, amás de poseyer artiluxos teunolóxicos a esgaya. Na llucha escontra'l crime ayúdenlu dellos aliaos, ente los que destaquen varios Robin socesivos (qu'al medrar tórnense superhéroes independientes con una identidá propia), Batgirl o'l so mayordomu Alfred Pennyworth. D'enemigos principales tien al Joker, sicópata con aspeutu de payasu, y Catwoman, lladrona cola qu'amás tien un amoríu. La identidá secreta de Batman ye Bruce Wayne, un empresariu multimillonariu y filántropu de Gotham City. En siendo testigu del asesinatu de so pa y so ma cuando yera neñu, xura vengase y combatir la delincuencia, pa lo que se somete a un severu entrenamientu físicu y mental. Garra'l diseñu d'un esperteyu pa la vistimienta, les armes y los vehículos, y d'ehí'l nome.

Historia ficticia

A lo llargu de los años camudaron delles vegaes la continuidá del Universu DC, y con ella la hestoria del personaxe.

El Batman de la Edá Dorada (Tierra-Dos)

Bruce Wayne naz en 1915 o 1916, y siendo guaḥe ve cómo un atracador, Joe Chill, mata a so padre y so madre. Darréu, so tíu Philip faise'l so tutor llegal y mándalu a la Academia Hudson, onde depriende ciencies y garra una forma física estraordinaria. Cuando crez quier ser policía, pero la so moza, Julie Madison, diz-y que nun podría tar con daquién qu'arriesgara la vida tolos díes. Por ello, diseña'l traxe d'esperteyu y entama de combatir el crime de forma anónima. Nun escomienzu gasta una pistola pa ello, pero dexa d'usala ceo. Llueu pide a Julie que se casen y ella aceuta. Per otru llau, y por orde del presidente Roosevelt axúntase con otros superhéroes, como Superman, Green Lantern o Flash pa una misión na Alemaña nazi.

L'añu siguiente, Bruce asiste a una actuación del Circu Haly, onde presencia l'asesinatu d'un matrimonioniu de trapecistes. Tres d'esto decide adoptar al fíu d'ellos, un rapaz d'once o doce años llamáu Dick Grayson al que-y desvela quien ye y lu entrena. Ceo ye'l so ayudante na llucha escontra'l crime, con un traxe colorista y el nome en clave "Robin", y xuntos enfréntense a dalgunos de los enemigos más nomaos, como son Joker, Catwoman, Clayface, Penguin, Scarecrow o Two-Face. Mentanto, Julie ruempe la rellación con Bruce, nun llegando a casase, y nomen a Batman miembru honorariu de la policía de Gotham y del equipu de superhéroes Justice Society of America. Mientres combate escontra'l villanu Ian Karkull, un españíu de d'enerxía místico afeuta a Batman, Robin y a otros munchos superhéroes, lo que provoca qu'avieyen más calco.

Un home nomáu Alfred Beagle llega a la casona Wayne en 1943, col envís de que lu contraten de mayordomu, y Bruce y Dick nun pensaben facelo hasta qu'Alfred descubre les sos identidaes, momentu nel qu'alcuerden que lo meyor ye convertilu nel so mayordomu y ayudante. Bien llueu, Batman amplia la base secreta d'operaciones emplegando una cueva pa ello (Batcave).

En 1948 Batman atopa por fin a Joe Chill, asesín de so pá y so ma, escorriéntalu p'amedranalu y desvela-y la so identidá. Esti pide sofitu a los amigos, pero estos mátenlu al saber que ye quien creó a Batman.

Dempués d'esto apaecen nuevos criminales, como Riddler, Mad Hatter y Deadshot, y Batman conoz y siéntese atrayíu pola reportera Vicki Vale.

Años dempués, Batman y Catwoman revélense los sos sentimientos mutuos, Batman desvela-y la so identidá y Catwoman decide entregase y dir pa la cárcel pa pagar polos crímenes. Cuando sal d'esta cásense, y en 1957 tienen una fía, Helena. Bruce dexa la vida superheroica, pero adunvia'l comisariu Gordon na policía cuando esti se retira.

En 1976, un antiguu collaciu de Catwoman, Silky Cernak, xantáxala pa cometer otru crime, qu'acaba cola muerte d'ella a pesar de que Bruce vuelve a poner el traxe pa evitalu. La so fía, Helena, amazcárase pa prender a Cernak, convirtiéndose na nueva superheroína Huntress, y Bruce Wayne espubliza qu'él yera Batman.

En 1979, y enfermu de cáncer, Bruce pon el traxe de Batman una vegada más pa detener un supervillanu, lo qu'acaba cola muerte de dambos dos.

Doctor Fate borra entós, per aciu de maxa, les alcordances de tol mundu tocántenes a que Bruce Wayne y Batman yeren la mesma persona.

El Batman clásicu (Tierra-Ún)

Siendo guaḥe, y poques selmanes dempués de que The Shadow lu salvara a él y a so pá d'un atracador, Bruce Wayne ve cómo otru, Joe Hill, mata a so pa y so ma, Thomas y Martha Wayne. Desaforáu, xura qu'un día va vengase. So tíu Philip faise'l so tutor llegal, pero esti viaxa muncho y en verdá a Bruce cúrialu l'ama de llaves, la señora Chilton (dándose la coincidencia de que ye la ma de Joe Chill).

Una nueche ta cavilgando en despachu cuando un esperteyu entra pela ventana. Esto recuerda-y a so pá antroxáu d'esperteyu nuna folixa, y decide usar l'animal como símbolu pa espantar a los criminales. El comisariu Gordon aprecia'l trabayu que fai y entama a collaborar con él.

Bruce asiste a una actuación del Circu Haly, onde presencia l'asesinatu d'un matrimonioniu de trapecistes. Decide adoptar al fíu, un rapaz de doce años llamáu Dick Grayson, desvela-y la identidá y entrénalu. Ceo ye'l so ayudante na llucha escontra'l crime, con un traxe colorista y el nome en clave "Robin". Un home, Alfred Pennyworth, apaez na casona de Bruce Wayne y úfrese como mayordomu, pos ye lo que-y a so pá, el mayordomu de Thomas Wayne. Ceo descubre la identidá de Bruce y Dick, y dedícase tamién a caltener la Batcave.

Les aventures de Batman y Robin nun se restrinxen a combatir criminales en Gotham, pos davezu viaxen pel espaciu o mesmamente pel tiempu y combaten monstruos sicodélicos. Batman y Superman descubren caún la identidá secreta del otru, pero xuren nun la desvelar enxamás y surde una gran amistá ente ellos. Amás, la familia de xusticieros espoxiga, surdiendo una Batwoman, una Batgirl, l'indíxena americanu Chief Man-of-the-Bats, el perru Bat-Hound y inclusive un trasgu, Bat-Mite. Per otru llau, Batman alíase a otros superhéroes como Superman o Wonder Woman pa impidir una invasión estraterrestre, y de la axuntanza naz l'equipu de superhéroes Justice League of America.

Dick comienza dir al institutu, Alfred muerre, y la tía de Dick finca na casona de Bruce, polo que los héroes han tener procuru pa que nun descubra les sos identidaes.

Batman y Robin enfréntense a nuevos villanos, ente los que destaca Posion Ivy, y ún d'ellos resulta ser Alfred, resucitáu, anque en venciéndolu torna a la normalidá. A estes, apaez una nueva Batgirl, que ye la fía del comisariu Gordon. Mentanto, Dick acaba l'institutu y matricúlase na Universidá Hudson.

Bruce, agora ensin collaciu, finca nun áticu nel centru la ciudá, enfosca na manera de combatir los criminales y llega a actuar fuera de la llei cuando lu acusen d'asesinatu. Nesta dómina ye cuando s'enfrenta la primer vegada contra'l monstruu Man-Bat y a la organización "League of Assassins", encabezada pol malváu Ra's al Ghul. Cuando secuestren a Dick Grayson y a Talia al Ghul, fía de Ra's, Batman y esti alíense p'atopar el culpable, pero resulta qu'en realidá ye una engañifa de Ra's, una prueba pa ver si ye dignu d'asocedelu, pos la so fía ta namorada d'él. Ra's al Ghul pasa a ser el principal antagonista, y Batman llega a finxir la muerte de Bruce Wayne pa persiguilu. Cuando por fin lu atopa engárriense, y Batman salva la vida gracies a Talia. Pa despidise, Batman da-y un besu apasionáu. Tres volver al Gotham reapaez como Bruce Wayne, dando cuenta de que la muerte yera falsa.

Tornen los enemigos clásicos de Batman (amás d'otros nuevos), y tamién la compaña de Robin. Amás Batman desendolca una bona rellación con Helena Wayne, la fía del so doblu de Tierra-Dos (la que lu llama "tíu"), yá que la Justice League y la Justice Society viaxen ente dimensiones y axúntense davezu. Catwoman dexa'l crime y entama una rellación con Batman, pero nun dura muncho y Catwoman marcha de la ciudá.

De nueves, Ra's al Ghul y Talia preparen-y una trampa. Símulen que Batman mata a Talia pa que lu detengan, pero ye a llimpiar el so nome cuando descubre la combalechadura. Tiempu dempués, Ra's droga y secuestra a Batman pa casalu cola so fía, pero él llogra fuxir enantes de tener rellaciones. Llueu, la League of Assassins mata a la antigua Batwoman.

Ye entós cuando Batman entama daveres una rellación con Talia, lo que fai que Robin cole enfocicáu. Esti amoríu tampoco nun dura, y en rompiendo tien otru cola reportera Vicki Vale. Cede'l puestu de CEO d'Industries Wayne al so ayudante, Lucius Fox, y torna a la casona. Catwoman vuelve a la ciudá, y célase de la rellación de Bruce y Vicki.

Un criminal nuevu na ciudá, Killer Croc, asesina al pa y la ma d'un neñu llamáu Jason Todd, y Bruce afíalu como fizo con Dick. Nun entamu Jason tien el negazu de Batman pa ser el nuevu Robin pero, en viendo cómo se les arregla, Bruce cambia de paecer. Entós Jason tiñe'l pelo de negru pa paecer l'anterior Robin, qu'abandona tala identidá pa convertise en Nightwing.

Batman combate'l villanu Thief of Night (dempués Night Slayer), que tien de socia a una antigua trabayadora de Wayne Enterprises, Nocturna. Batman namorísquiase d'esta, y ella descubre la identidá secreta de Batman y igua los papeles p'adoptar a Jason Todd, tratando asina d'empobinalu a casar con ella. Nocturna acaba poniéndose de llau de Batman, que priende al so collaciu y afía oficialmente a Jason.

Cuando secuestren a Lucius Fox en Markovia y la Justice League se niega a ayudar a rescatalu, pa nun producir un conflictu diplomáticu, Batman axunta dellos superhéroes nun equipu nuevu del que ye cabezaleru y financieru, los Outsiders. Por embargu, los Outsiders nun aprueben el so lideralgu y Batman acaba marchando del grupu.

Batman ruempe definitivamente la rellación con Vicki Vale y diz-y a Catwoman que nun tien nada que facer, pos ta namoráu de Nocturna. Pero pescancia que lu atrayen les muyeres peligroses porque nun pue teneles, y tamién evita a esta. Pero entós a Nocturna asesínala Night Slayer, y, tres la perda, Batman retoma la rellación con Catwoman, que s'aúne al Dúu Dinámicu. De nueves, la rellación nun dura, pero ruempen de bones. En Xunetu de 1985, na "Crisis en Tierres Infinites" la entidá nomada Anti-Monitor destruye tolos universos alternaticos, pero Brainiac rescata la ciudá de Gotham de Tierra-Ún (con Batman y los Outsiders dientro) y ponla salva n'otru planeta con otres cincuenta y ún ciudaes de cincuenta y ún mundos. Un añu enteru ta la ciudá cubierta por una cúpula, y los poderes de los superhomes del interior desactivaos. Nesi tiempu, Batman vuelve a axuntase colos Outsiders, que traten de facer la vida más afayadiza pa los ciudadanos arriendes de descubrir qué ye lo que pasa. Tres del añu, el planeta, que ta vivu, abre les cúpules y manda a caúna de les ciudaes lluchar coles otres pola sobrevivencia. Batman y los Outsiders (de nueves colos poderes) defenden Gotham, y entós Brainiac y dellos héroes trayen de vuelta los mundos destruyíos pol Anti-Monitor n'evitando la Crisis, y a la fin Brainiac unvia Gotham al so llugar.

El Batman de la Edá Escura (Tierra Nueva enantes de Zero Hour)

Bruce Wayne, siendo guaḥe, ve cómo un atracador, Joe Chill, mata a so pá y so ma. Darréu, el mayordomu Alfred Pennyworth conviértese nel so tutor llegal. Con catorce años, Bruce entama de percorrer el mundu deprendiendo, ente otres habilidaes, artes marciales, química, criminoloxía, ciencia forense, escapadera y antroxamientu. Ente los profesores que tevo taben el rastrexador Henry Ducard, el ninja Kirigi y el detective Harvey Harris. Con venti años pensó en metese nel FBI, pero refugólo poles torgues que-y produciría la burocracia, asina con venticinco torna a Gotham y entama a combatir el crime antroxáu d'esperteyu. La so presencia inspira tamién a los criminales, que tomen aspeutos más paxareros y nomes en clave, siendo la primera en facelo Catwoman. La policía nun tarda n'aceutar que lu necesiten anque nun-yos guste, y creen la bat-señal pa cuando precisen pidi-y sofitu.

Cuando Superman viaxa a Gotham a la busca d'un criminal, él y Batman conócense y gárrense respetu mutuu. Llueu, cuando una especie estraterrestre ataca la Tierra y dambos dos axúntense a otros superhéroes pa defendela, créase la Justice League of America (anque nun entamu nun pertenez a ella nengún de los dos).

Bruce asiste a una actuación del Circu Haly, onde presencia l'asesinatu d'un matrimonioniu de trapecistes. Decide adoptar al fíu, un rapaz de doce años llamáu Dick Grayson, desvela-y la identidá secreta y entrénalu. Meses dempués el rapaz ye'l so ayudante na llucha escontra'l crime, con un traxe colorista y el nome en clave "Robin". Cuando crez y tien desavenencies con Batman, esti despídelu.

Tamién apaez una Batgirl, que ye sobrina del comisariu Gordon. Llucha escontra el crime unos años, hasta Joker atacala brutalmente y dexala paralítica.

Batman enfréntase a la organización "League of Assassins", encabezada pol malváu Ra's al Ghul. Cuando secuestren a Dick Grayson y a Talia al Ghul, fía de Ra's, Batman y esti alíense p'atopar el culpable, pero en realidá ye una engañifa de Ra's, una prueba pa ver si ye dignu d'asocedelu, pos la so fía namoróse d'él.

Cuando secuestren a Lucius Fox en Markovia y la Justice League se ñega a rescatalu, pa nun producir un conflictu diplomáticu, Batman axunta dellos superhéroes nun equipu nuevu del que ye cabezaleru y financieru, los Outsiders. Por embargu, los Outsiders nun aprueben el so lideralgu y Batman acaba marchando del grupu.

Entós Batman xúnese a un equipu nuevu, la Justice League International, qu'actúa embaxo l'amparu la ONX.

Batman acueye un güerfanu que tenta de roba-y les ruedes al Batmobile, y nun tarda n'afialu y convertilu nel Robin nuevu, anque ye muncho más gafu que l'anterior. Tiempu dempués Jason realcuéntrase con so ma, a la que ta xantaxando Joker, y, tratando de salvala, muerre de la cuera que-y da'l Rei Payasu del Crime.

Batman, de nueves solu, afosca abondo na llucha escontra'l crime, volviéndose brutal. Entós ye cuando otru rapaz, Tim Drake, averigua la so identidá secreta y albidra que rique un Robin p'asosegar. Asina, búscalu y tres d'insistir n'ayudalu conviértese nel tercer Robin.

Batman tien una crisis al ver que ta apaisanando (anda pelos cuarenta años), lo que-y fai perder la confianza en sí mesmu. Ye por ello que va ver una terapeuta, mientres manda a Robin entrenar a Azrael nos llabores detectivesques pa facer d'él un nuevu aliáu na llucha escontra'l crime.

Entós, el nuevu villanu Bane organiza un fuximientu del Asilu Arkham, y en dexando que los demás enemigos de Batman lu ataquen, atácalu el y ruempe-y l'espinazu, baldándolu. Nun siendo quien a siguir col llabor, Bruce pide a Azrael que lu anduvie y esti aceuta. Nesta, Bruce namóriase de la terapeuta, Shondra (que tien poderes curatibles de callao), a la que-y diz que tevo un accidente col coche. Nesta, secuéstrala l'hermanu y, enantes de que Bruce la rescate, ella mátalu ensin querer. De nueves con Bruce, cúralu colos poderes, pero l'esfuerciu ye demasiao pa ella y la caltriadura aneña la so mente pa siempres. Bruce, atristayáu, costia-y una residencia perbona pa tola vida.

Al tornar a Gotham, Bruce alcuéntrase con qu'Azrael foi perxabaz, matando criminales, lo que nun-y presta nada. Entendiendo que cometió un gran error, entrena pa recuperase, botalu y volver a ser él Batman. Pa ello pide ayuda a Lady Shiva, de la League of Assassins, que lu fuercia a superar pruebes mui dures. Al terminar l'entrenamientu, y col sofitu de Robin y Nightwing (como se llama agora Dick Grayson) amollenta a Azrael y angaríyalu a aceutar el vencimientu.

En 1994 Green Lantern alloria y desanicia l'universu pa crear unu nuevu. Pero Brainiac rescata la ciudá de Metropolis, onde s'alcuentren Batman y Azrael nesi momentu, y ponla salva n'otru planeta con otres cincuenta y ún ciudaes de cincuenta y ún mundos. Un añu enteru ta la ciudá cubierta por una cúpula, y mentanto los poderes de los superhomes d'esta desactivaos. Mientres, Batman y Azrael métense na organización criminal del mafiosu Thobias Whale pa desaniciala, axuntándose de nueves. Tres del añu, el planeta, que ta vivu, abre les cúpules y manda a caún de les ciudaes lluchar escontra les otres pola sobrevivencia. Batman y Azrael lluchen escontra los Wetworks (de Tierra-50), y anque Azrael quier barrer la ciudá d'ellos, Batman convence a los Wetworks y a él de qu'han axuntase pa combatir l'enemigu común, que ye'l que los enfrenta. Azrael entórnase y decide protexer la ciudá que quería destruyir mientres los otros busquen más aliaos.

Tres la batalla, Brainiac y dellos héroes trayen de vuelta los mundos destruyíos, y a la fin Brainiac unvia Metropolis al so llugar.

El Batman de la Edá Moderna (Tierra Nueva enantes de Flashpoint)

Esti Batman recueye munches de les carauterístiques de tolos anteriores, teniendo vivío aventures mui asemeyaes a toes elles na primer década de la cruzada contra'l crime.

N'apartando a Azrael, Bruce decide dexar a Dick el traxe de Batman mientres se recupera dafechu. Tres un tiempu, torna con un traxe prietu fechu de kevlar. Entós ye cuando un andanciu (una mutación del ébola) espárdese rápido per toa Gotham, diezmando la población. Descúbrese que la responsable ye la Orde de San Dumas, secta al que pertenecía Azrael, y esti llogra la cura. Ra's al Ghul consigue una mutación más peligrosa del virus, pero Batman priéndelu cola ayuda d'Oracle (como se llama Batgirl, agora paralítica, mientres da sofitu dende una base d'operaciones).

Pero enantes de que la ciudá supere la llaceria vien otra. Un terremotu de 7,6 na escala Richter barre la ciudá, Batman queda atrapáu na Batcave y dase una fuxida en tropel de la cárcel. Cuando Batman y los collacios son a apaciguar Gotham yá morrieren cien mil persones.

Washington, ensin presupuestu pa iguar el desastre, decide declarar la ciudá tierra de naide, dar cuarenta y ocho hores a la xente pa que marche y dempués echar abaxo les pontes. La policía, Batman y los sos collacios recuperen la ciudá cachu a cachu, y protéxenla del plan de Lex Luthor de reconstruyila pa convertise nel propietariu. Tres d'llo, el gobiernu vuelve a declarar Gotham parte de los Estaos Xuníos.

Talia al Ghul roba de la Batcave informes de Batman tocántenes a cómo derrotar a la Justice League, y so pá úsalos p'atacalos. Estos, ofendíos, echen a Batman, anque más tarde vuelven a aceutalu y esti-yos desvela quien ye.

En morriendo-y la moza, Vesper Fairchild, y teniendo de demostrar que nun foi él, empecipia un amoríu con Catwoman, qu'abandonó la vida criminal, y tamién a ella-y desvela que ye Bruce Wayne.

Cuando'l pá de Tim Drake descubre qu'esti ye Robin fórcialu a dexalo, polo que Batman garra una nueva Robin, Stephanie Brown. Pero la compaña nun dura, pos échala al poco por nun siguir los sos mandaos.

Un antihéroe nomáu Red Hood entama d'espantayar los mafiosos per aciu d'aiciones perviolentes. Esti nun tarda en desvela-y a Batman que ye Jason Todd, el segundu Robin, resucitaú por Talia al Ghul y rensiossu porque lu dexara morrer y nun matara a Joker, permitiéndo-y siguir asesinando.

La paranoya lleva a Batman a unviar al espaciu un satélite que vixile los superhumanos, y Maxwell Lord róbalu y úsalu p'atacar los superhéroes. Tamién ta a puntu d'asesinar a Alexander Luthor, de Tierra-Tres. Too ello llévalu a dase un añu sabáticu p'atalantar y viaxar pel mundu con Nightwing y Robin, dexando a Two-Face, que se reformó, curiando de Gotham. Cuando torna Two-Face vuelve a alloriar, y Bruce Wayne afía l'acabante quedar güérfanu Tim Drake.

Llueu d'otru ataque de la League of Assassins, Talia desvela-y a Batman que tienen un fíu, Damian Wayne, un guaḥe de siete años yá entrenáu pá ser un asesín. Batman trata d'educalu, lo que resulta difícil porque ye perfaltosu. Amás, el neñu da una cuera a Tim Drake cola idea de ganase asina'l títulu de Robin. Batman acéutalu como talu y Tim Drake garra una nueva identidá, Red Robin.

Convoquen a Batman y a los miembros d'un club internacional d'héroes, que fundó acuantayá, a una axuntanza nuna casona, pero resulta ser una trampa acompangada por ún d'ellos, Wingman, y la organización Black Glove. Esti ye l'entamu d'una combalechadura escontra Batman qu'acaba alloriándolu, pero l'héroe tien preparao un plan pa tala situación, un mecanismu sicolóxicu pa tovía neses desendolcar una nueva personalidá atapada y, sicasí, convertise en Batman. Poro, cura y vuelve a lluchar escontra'l crime.

Batman investiga l'asesinatu d'Orion, y esto empóbinalu hasta Darkseid, qu'aparentemente lu mata. Pero, en verdá fízolu viaxar a la prehistoria desmemoriáu, usándolu como una arma qu'avanza na historia pa convertise nuna bomba qu'esplote anguañ. Tres de la vida de cavernícola pasa a ser cazabruxes, pirata, vaqueru y detective, pero la Justice League impide qu'esplote y sálvalu.

Bruce Wayne funda entós Batman Inc., contando que ye'l financiador de Batman y que va facer lo mesmo per tol mundu, creando un exércitu d'homes-esperteyu. D'esta miente recluta héroes de países a esgaya mientres Dick ye Batman en Gotham.

Enantes de que la llinia temporal seya camudada dafechu, Brainiac rescata la ciudad de Gotham y ponla n'otru planeta, salva, con otres cincuenta y ún ciudaes de cincuenta y ún mundos. Un añu enteru ta la ciudá cubierta por una cúpula, mentanto los poderes de los superhomes d'esta desactivaos, y mientres Batman protexe la ciudá y cria al so fíu.

Cuando Batman y Robin defenden a Poison Ivy y el so güertu, col qu'alimenta la xente la ciudá, reapaez Red Hood y enfréntase a Robin. Batman trata d'aparalos cuando s'abre la cúpula y manden a los mundos enfrentase ente sí. Los trés defenden la ciudá d'Extremists, unos supervillanos d'un mundu nomáu Angor, y, tres d'ello Robin y Red Hood faen les paces. Tres les batalles, Brainiac y dellos héroes trayen de vuelta los mundos destruyíos, y a la fin Brainiac unvia Gotham al so llugar.

Preseos

A lo llargu del tiempu tien gastao grán númberu de ferramientes na llucha escontra'l crime, ente les que destaquen les siguientes.

Bat-traxe: Anque ye de texíu flexible, protéxelu al menos en parte de les bales, y tamién aíslalu de la lletricidá. La capa pue endurecer pa formar daqué asemeyao a unes ales que-y permiten planiar, y la caperucha tien incorporaes lentilles con distintos tipos de visión y un sistema de telecomunicación.

Bat-cintu: Un cintu mariellu nel que guarda munches otres coses, como cámares, bombes de fumu, un láser y ferramientes de hacker. Inclusive, na serie de televisión de los años sesenta, tien un "bat-espantatiburones".

Batarangs: Armes asemeyaes a los shuriken, pero con forma d'esperteyu.

Bat-ganchu: Disparador d'una gabitu retráctil que s'engancha a les muries, recoyendo llueu la cuerda. Esto permite-y escalar a gran velocidá los edificios.

Bat-móvil: Coche d'última teunoloxía, que tamién tien numberosos aparatos incorporaos. Munches versiones funcionen con un motor a reaición.

Bat-planu: Como'l bat-móvil pero n'avión.

En cine y televisión

En 1940 adauten la primer vegada'l cómic pa un serial cinematográficu de quince episodios, onde Batman y Robin combaten a un científicu xaponés y axente del Exe, el doctor Daka, que convierte la xente en zombis.

Pero nun ye hasta 1966 que'estrenen l'afamada serie protagonizada por Adam West y Burt Ward, percolorista y d'estilu camp. Estrenaron tamién una película, y la serie duró hasta 1968, convirtiéndose nun referente de la cultura pop de la dómina. En 1979 dambos dos actores tornaríen a los papeles nel programa especial Legends of the Superheroes y Burt Ward al de Robin en 2019 pal crossover de les series de la CW, Crisis on Infinte Earths.

Dempués d'eso, Batman apaecería en delles series de dibuxos animaos, como The Batman/Superman Hour (1968), Super Friends (1973) o The New Adventures of Batman (1977).

En 1989 estrénase Batman de Tim Burton, protagonizada por Michael Keaton y con Jack Nicholson como Joker, dando una perspeutiva de los personaxes muncho más escura que la de la serie clásica. En 1992 estrenen la segunda parte, Batman Returns con Michelle Pfeiffer como Catwoman y Danny DeVito como Penguin.

En 1992 sal tamién la serie animada de Bruce Timm, con crítiques perbones, y ye amás onde fai la primer apaición el personaxe Harley Quinn. D'esta serie surdiríen delles películes animaes (Batman: Mask of the Phantasm, Batman & Mister Freeze: Subzero y Batman: Mystery of the Batwoman) asina como otres series de televisión (The New Batman Adventures y Batman Beyond). Esti Batman ye tamién el qu'apaez nes series animaes Justice League y Justice League Unlimited, yá qu'estes se dan na mesma continuidá.

En 1995 y 1998 estrenen películes nueves de Batman, y anque se supón que son continuación de les de Tim Burton, el nuevu direutor Joel Schumacher cambia'l tonu, tornándoles más hacia'l de la serie de los sesenta. En Batman Forever, Val Kilmer ye Batman, Chris O'Donnell Robin, Tommy Lee Jones fai de Two-Face y Jim Carrey de Riddler. Na segunda, Batman & Robin, George Clooney ye Batman, Chris O'Donnell repite papel y añaden una nueva heroína, Alicia Silverstone como Batgirl. De los villanos faen Arnold Schwarzenegger (Mister Freeze), y Uma Thurman (Poison Ivy). L'únicu actor que comparten les cuatro películes ye Michael Gough como'l mayordomu Alfred.

En 2005 entama una triloxía nueva, dirixida por Christopher Nolan y protagonizada por Christian Bale. Esta ta formada por Batman Begins (2005, con Liam Neeson como Ra's al Ghul y Cillian Murphy como Scarecrow), The Dark Knight (2008, con Heath Ledger como Joker y Aaron Eckhart como Two-Face) y The Dark Knight Rises, (2012, con Tom Hardy como Bane y Anne Hathaway como Catwoman). Lo más carauterístico ye que dan una imaxe más realista del personaxe, y recibieron crítiques mui bones.

En 2014 empecipia tamién una serie, Gotham, que cuenta cómo'l neñu Bruce Wayne se convierte en Batman, los inicios del comisariu Gordon y l'orixe de dellos supervillanos. Esta termina en 2019.

En 2015 estrenen Batman vs. Superman, continuación de Man of Steel. Nesta, un Batman veteranu (Ben Affleck) enfréntase a un Superman mozu, creyéndolu un enemigu públicu. Esta continúa en Justice League, en 2017, tres de lo que Affleck espublizó que nun va volver al papel.

Anguaño apaez en Titans como personaxe secundariu (interpretáu por Iain Glen), y en dellos capítulos de Batwoman a mou de flashbacks, pos ye un héroe desapaecíu va años.

En 2022 estrenen una película nueva, The Batman, protagonizada por Robert Pattinson. Les series y películes animaes son perfrecuentes dende la de Bruce Timm nos años noventa.

Referencies

Enllaces esternos