Ouranos
| Protogenoi | |
|
C'haos • Aither • Gaia • Ouranos • Hemera • C'hronos • Eros • Erebos • Nyks • Ofion • Tartaros | |
Ouranos (Οὐρανός / Ouranós, « oabl steredek » e gregach) eo an Oabl e mojennoù Hellaz kozh. Mab e oa d'an doueez Gaia, ganet ganti hep tad, hervez Hesiodos, en e levr Theogonia. Breur e oa da Ourea, doueez ar menezioù ha da bPontos, doue ar mor don. Diwezhatoc'h, war-lerc'h Hesiodos, e voe roet ur tad dezhañ, Aither. Mab da Nyks, an Noz, eo hervez oberourien an Henamzer all.
Mojenn Ouranos hervez Hesiodos
Dont a rae Ouranos, an Oabl, bemnoz, d'en em barañ gant Gaia, an Douar. Evel-se e voe engehentet an Ditaned, c'hwec'h mab ha c'hwec'h mec'h hervez Hesiodos, hag ar Gikloped, hag ivez an Hekatonc'hired, ramzed o c'hant brec'h. Kasoni en doa Ouranos ouzh ar re-mañ avat, hag o dastum a reas pell dindan an douar, en Tartaros, ma voe glac'haret o mamm Gaia.
Neuze e c'houlennas Gaia digant he mab Kronos lazhañ e dad. Spazhañ e dad a reas Kronos ha diwar ar gwad a flistre e voe ganet ar Ramzed, Merc'hed ar Gounnar, hag ar Meliadezed.
Taolet e voe strobelloù Ouranos er mor, ha diwar kej-mej gwad ha sper ha spoum eo e voe ganet Afrodite, doueez ar Garantez.
Diwar-benn ar vojenn
Ne oa kehelerezh ebet en-dro d'ar vojenn. Karg Ouranos a seblant bezañ arouez un doue trec'het eus un amzer gozh, a-raok deroù ar gwir amzer. Goude e spazhidigezh ne zeuas ket an Oabl ken da c'holoiñ an Douar da noz, chom a reas en e lec'h, hag echu gant an engehentiñ ha krouiñ euzhtud pe euzhviled.
Ne veze ket gwelet Ouranos evel un doue denheñvel, war-bouez e mojenn e gelloù stlapet er mor. Ne oa nemet an oabl, un doenn arem dalc'het gant an Titan Atlas.
E Roma
Uranus a veze graet anezhañ e Roma.
Lennadurezh
- Apollodoros, Bibliotheke, (I, 1).
- Hesiodos, Theogonia, (v. 126–193).