Saltar ao contido

Zito

Na Galipedia, a Wikipedia en galego.
A versión para imprimir xa non se actualiza e pode conter erros de renderizado. Actualice os marcadores do seu navegador e empregue mellor a función de impresión propia do navegador.
Modelo:BiografíaZito

Editar o valor en Wikidata
Biografía
Nacemento8 de agosto de 1932 Editar o valor en Wikidata
Roseira, Brasil Editar o valor en Wikidata
Morte14 de xuño de 2015 Editar o valor en Wikidata (82 anos)
Santos, Brasil Editar o valor en Wikidata
Causa da morteictus Editar o valor en Wikidata
Altura179 cm Editar o valor en Wikidata
Peso69 kg Editar o valor en Wikidata
Actividade
Ocupaciónfutbolista Editar o valor en Wikidata
Período de actividade1948 Editar o valor en Wikidata - 1967 Editar o valor en Wikidata
Nacionalidade deportivaBrasil Editar o valor en Wikidata
Deportefútbol Editar o valor en Wikidata
Posición de xogoCentrocampista Editar o valor en Wikidata
Traxectoria Editar o valor en Wikidata
  Equipo Número de partidos xogados Puntos/goles/tantos anotados
1950–1952 Esporte Clube Taubaté
1952–1967 Santos Futebol Clube 727(57)
  Selección nacional Número de partidos xogados Puntos/goles/tantos anotados
1955–1964   Brasil 52(3)
Participou en
xullo de 1966Mundial de Fútbol Inglaterra 1966
1962Mundial de Fútbol Chile 1962
xuño de 1958Mundial de Fútbol Suecia 1958 Editar o valor en Wikidata
FIFA: 63867 UEFA: 100488 Editar o valor en Wikidata

José Ely de Miranda, máis coñecido como Zito, nado en Roseira, São Paulo, o 8 de agosto de 1932 e finado en Santos o 14 de xuño de 2015, foi un futbolista brasileiro que xogaba como centrocampista. Considerado un dos maiores ídolos da historia do Santos FC, militou durante 15 anos no club, e é o terceiro futbolista con máis partidos da súa historia (733), superado só polos seus compañeiros Pelé e Pepe. Conquistou co Santos un total de 22 títulos oficiais, moitos deles como capitán. Foi 52 veces internacional coa selección brasileira, coa que gañou dúas Copas do Mundo (Suecia 1958 e Chile 1962).

Traxectoria

Inicios

Nacido no municipio paulista de Roseira, pretendía inicialmente ser mestre de escola, e asistiu ás escolas técnicas da súa vila natal, antes de decantarse pola carreira de futbolista.[1]

Zito (de pé, terceiro dende a esquerda) coa selección brasileira instantes antes do comezo da final do Mundial de 1958.
Zito (de pé, segundo dende a esquerda) coa selección brasileira antes dun partido do Mundial de 1962.

Comezou a xogar ao fútbol en clubs modestos como o Roseira, o Estudantes de Pinda ou o São Paulo de Pindamonhangaba, pasando logo polo Taubaté, antes de fichar en 1952 polo Santos.[2][3]

Santos

Debutou co Peixe o 29 de xuño de 1952, nunha vitoria por 3-1 contra o Madureira nun partido amigable.[4] Gañou rapidamente a titularidade e militou no club durante os seguintes 15 anos, acumulando 733 partidos e marcando 57 goles. Foi o capitán do chamado equipo dos Santásticos, que gañou numerosos títulos nas décadas de 1950 e 1960, con xogadores como Pelé, Pepe e outras estrelas brasileiras.[5] Entre os seus triunfos cóntanse cinco Campionatos Brasileiros consecutivos, nove Campionatos Paulistas, dúas Copas Libertadores e dúas Copas Intercontinentais.

Era alcumado Gerente polos medios brasileiros, debido a que axudaba ao adestrador Lula nas labores técnicas.[6] Na Copa Intercontinental de 1963 foi titular no partido de ida pero perdeu por lesión tanto o encontro de volta como o de desempate. Aínda así, actuou como asistente de Lula nos dous partidos, nos que o seu equipo gañou o segundo título intercontinental consecutivo.[6]

Xogou o seu último partido o 7 de novembro de 1967, unha vitoria por 5-0 contra un combinado de xogadores do Ferroviário e do Fortaleza no estadio Presidente Vargas de Fortaleza.[4]

Selección brasileira

Disputou 52 partidos coa selección brasileira, coa que marcou tres goles. Acompañado habitualmente no centro do campo por Didi, formou parte do equipo que gañou o Mundial de 1958 en Suecia. Comezou o torneo como suplente e rematouno como titular indiscutible, formando xunto a Didi o centro do campo na vitoria final sobre a selección anfitrioa.[7]

Catro anos despois, no Mundial de 1962 en Chile, o seleccionador Aymoré Moreira apostou pola mesma parella de medios, disputando estes como titulares tódolos encontros. Na final contra Checoslovaquia no Estadio Nacional, con Pelé ausente por lesión e co marcador sinalando un empate a un gol, Zito finalizou de cabeza un centro de Amarildo e bateu ao gardameta Viliam Schrojf, poñendo ao Brasil por diante pouco antes de que Vavá culminase a remontada.[8] Foi incluído no Equipo Ideal do Torneo.[5]

Trala retirada

Tras colgar as botas foi vicepresidente do Santos entre 1978 e 1982, e máis tarde foi nomeado director de fútbol polo presidente Milton Teixeira. Dende o ano 2000 traballou na canteira do club, contribuíndo ao descubrimento de novos talentos como os de Robinho, Diego, Neymar ou Gabigol.[9][5]

Morte

Nos seus últimos anos padeceu Alzheimer.[10] En 2014 sufriu un derramo cerebral e o 14 de xuño de 2015 faleceu aos 82 anos en Santos, deixando a Pelé, Pepe e Zagallo como os tres últimos brasileiros sobreviventes da final do Mundial de 1958.[5][11]

Estilo de xogo

Centrocampista forte e con dotes de mando, era coñecido sobre todo polo seu liderado no campo. Adoitaba ter un papel secundario como medio lateral, servindo de enlace entre a defensa e o ataque. Intelixente e moi organizado, destacaba pola súa capacidade para recuperar a posesión e marcar o ritmo no medio do campo mediante os seus movementos e pases precisos. Aínda que se manexaba ben co balón, prefería xogalo a outros centrocampistas máis creativos e hábiles antes que levalo el mesmo cara a adiante. Aínda así, era capaz de comezar xogadas de ataque despois de roubar o balón, distribuíndo rapidamente o balón cara a adiante con pases sinxelos, pero ordenados e eficientes.[1][12][11]

Palmarés

Santos
Selección brasileira

Notas

  1. ↑ 1,0 1,1 Glanville, Brian (15 de xuño de 2015). "Zito obituary". The Guardian (en inglés). Consultado o 7 de setembro de 2022. 
  2. ↑ Cosin, Alberto (17 de abril de 2015). "José Ely de Miranda, ‘Zito’: el gerente de Valle del Paraíba" (en portugués). Consultado o 7 de setembro de 2022. 
  3. ↑ "Zito - Que fim levou?" (en portugués). Consultado o 7 de setembro de 2022. 
  4. ↑ 4,0 4,1 "A história do maior capitão do Santos FC" (en portugués). 15 de xuño de 2015. Consultado o 7 de setembro de 2022. 
  5. ↑ 5,0 5,1 5,2 5,3 "Zito: Two-time Brazilian World Cup-winning midfielder dies at 82". BBC (en inglés). 15 de xuño de 2015. Consultado o 7 de setembro de 2022. 
  6. ↑ 6,0 6,1 Paulino, Wladmir (15 de xuño de 2015). "'Gerente', Zito deu broncas em Pelé e ria com apelido de 'chulé'" (en portugués). Consultado o 7 de setembro de 2022. 
  7. ↑ Freire, Marcelo (29 de xuño de 2008). "Após 50 anos, Zito derruba lenda sobre jogadores e Feola" (en portugués). Consultado o 7 de setembro de 2022. 
  8. ↑ "Brazil flying high with 'Little Bird' Garrincha". FIFA (en inglés). Arquivado dende o orixinal o 6 de abril de 2015. Consultado o 7 de setembro de 2022.  Arquivado 13 de xullo de 2015 en Wayback Machine.
  9. ↑ "Além de história e títulos, Zito moldou quatro gerações de ídolos do Santos" (en portugués). 15 de xuño de 2015. Consultado o 7 de setembro de 2022. 
  10. ↑ "Morre Zito, um dos maiores jogadores da história do futebol brasileiro" (en portugués). 14 de xuño de 2015. Arquivado dende o orixinal o 07 de setembro de 2022. Consultado o 7 de setembro de 2022. 
  11. ↑ 11,0 11,1 "Zito, leader of Brazil’s World Cup-winning teams in 1958 and 1962, dies at 82" (en inglés). Consultado o 7 de setembro de 2022. 
  12. ↑ "Zito: Commanding midfielder who helped to guide Brazil to consecutive World Cup triumphs" (en inglés). 5 de agosto de 2015. Consultado o 7 de setembro de 2022. 

Véxase tamén

Ligazóns externas

Traído desde «https://gl.wikipedia.org/w/index.php?title=Zito&oldid=6849883»