Chumbero
_at_Secunderabad,_AP_W_IMG_6674.jpg?lang=lad)
El chumbero (del arabo Ṣubbar) es una planta de klima desertiko de orijen amerikano, es una arboliko ke krese enlas chumberas (zonas onde ay munchos chumberos) i endemas enlas kebradas de los akantilados, el su fruto es el chumbo. El su djenero sientifiko es Opuntia ficus-indica. Es una planta espinoza de tronko enraizado, los sus brazos o penkas son tambien alimento para personas (sobre todo en Amerika) i para forraja de animales komo porkos i kavras.
Etimolojia
El biervo de chumbero, proviene de la lingua araba; Ṣubbar o Ṣubbara. En los paizes amerikanos tiene distintos nombres, por eshemplo; se diz nopal en Meksiko (onde tambien es un simbolo nasionalo) i la palavra proviene de la lingua nahuatl, en Ekvador es nombrado komo penco, enel Peru yamase tunal, en el resto de Sudamerika se diz tuna. En Espanya hue introduzido desde Amerika, ansina, ayi se le konose komo chumbera i en Izlas Kanarias se le konose komo tunero.
Biolojia
Distribusion
La planta espinoza es de orijen amerikano, asegun krese desde las praderas de Kanada asta la Patagonia, endemas krese en las izlas de la mar Karibe i del Oseano Pasifiko. El chumbero hue yevado a Espanya, lugar onde komenzo la su distribution i adaptasion al klima del Mediterraneo, del nord de Afrika y delas izlas del Oseano Atlantiko komo las Kanarias, Madeira i Azores. Endemas ay espesias de chumbero en las izlas de Hawaii, territorio ke korresponde a la Oseania.
Produksion
Meksiko es el paiz kon mayor kultivo de chumberos para uzo de alimento i merkaduria, el Vaye de Meksiko es onde ay grandes produksiones de chumberos en Milpa Alta, Xochimilco, Tlahuac, Teotihuacan, Otumba, Axapusco, Texcoco i Acolman, endemas en Puebla, Morelos, Guerrero, Oaxaca, Querétaro, Hidalgo, Tlaxkala, Zakatekas, San Luis Potosí, Guanajuato, Aguaskalientes, Michoakan i Yukatan; el segondo paiz es el Peru, endemas kon una ancha produksion en departamentos de Apurimac, Moquegua, Ica i Ankash, el tersero es Italia y el katreno es Espanya, siendo la izla de Sicilia la ke akapara la mayora produksion de chumberos i chumbos en el Kontinente Evropeo junto kon Andaluziya, en Espanya. El mayor produktor de chumberos en Afrika es Maroko, onde endagora tambien es parte de la kuzina marokana.
Otros paizes onde se produse chumbero en kultivo zon Malta, Arjelia, Portugal, Fransia, Israel, Gresia, Kipre, Ayifto, Libia, Tunesia, Mauritania, Kabo Vedre, Ekvador, Brasil, Estados Unidos, Chile i Kuba.
Uzos
El chumbero konta kon varios uzos, el principal es para la alimentasion, endemas se uza para kurar dolensias i azer remedios o medisinas.
Alimento
La konosensia dela planta hue endenantes de la konkista del Kontinente Amerikano, las antikas sivilizasiones amerikanas dieron al chumbero un sentido sagrado; los espanyoles konosieron el chumbero kuando estos divisaron ke era komida para los puevlos indijenos i ke azian alimentos kon las penkas i frutos. Endagora el chumbero es kultivado para el konsumo umano i para la alimentasion de alkunos animales o azer una mejora de kalidad de karne.
Medisina
Kon la penka del chumbero se aze dolse de jalea, remedios para dolensias, alimento para abashar de peso i prevenir dolensias komo diabetes, gordura o prevenir dolensias del korason.
Pintura
El puevlo azteko uzo el chumbero, para la krianza de kochiniya, insekto ke sirve para pintar de kolorado o karmin las telas, proseso ke los espanyoles uzaron endemas en Espanya y ke yego azta Maroko, paiz onde se sige uzando el pintado kon kochiniya de chumbero.