Judith Resnik
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
.jpg?lang=lad)
Judith Arlene Resnik (nasida en Akron, Ohio; 5 de Avril de 1949 - Kavo Kanyaveral, Florida, 28 de Djenero de 1986) era una doktora en enjenieriya elektrika, enjeniera de softwarre, enjeniera biomedika, piloto i astronota amerikana. Era la sigunda mujer amerikana enel espasio i la katrena del mundo, kon un total de 145 oras enel espasio, endemas de la segunda persona djudia (dieskues del sovyetiko Boris Volynov) i la primera djudia en estar enel espasio.
Biografiya
Judith Arlene Resnik nasio el 5 de Avril de 1949 en Akron, Ohio, Estados Unidos. Era ija de Sara i Marvin Resnik, un optometristo i hazan. El su padrea avlava ocho linguas, izo servis durante la Sigunda Gerra Mondiala en rekonosensia desde el ayre en la Gerra de la Mar Trankila. [1] Los sus padres eran djudios de Ukrannia, ama el su padre arivo enla Amerika desde Israel.[2] Kresio en una kaza relijioza, ambezando en eskolas judias i aziendo el su Bar Mitzva.[3] Diskues de la deshadura de los sus padres kuando eya era una manseva, eya apronto un kavzo ke yevo a un djuzgo kon el buto de ser kudiada por su padre, kon el kualo eya preferava kreser.[3]
Era konosida por la su entelijensia desde chika, i prinsipio la eskola primaria una anyada antes de lo normal. [4] Ambezo enel lise Firestone en Akron, Ohio, i kuando eskapo la eskola, dio el diskorso valedictorian, el kualo lo dize el amijor elevo de la klasa i kon rutbe perfekto enel egzamen SAT, la unika mujer del payis ke lo izo esa anyada i una de las 16 mujeres ke lo avian echo en la istorya del payis.[2] Ambezo a tanyer el piano, i keria ser tanyedora profesionala de piano. [2]
Kariera
De edad de 17 anyos, prinsipio ambezar en la Universita Carnegie Mellon, era una de las tres mujeres ambezando Enjenieriya Elektrika. En la universita konosio al ke iva ser el su espozo, Michael Oldak, el kualo ambezava kon eya.[5] Eskapo la kariera de Enjenieriya Elektrika en 1970 i en 1977 aresivio el su doktorat en Enjenieriya Elektrika cum laude de la Universita de Maryland.
Diskues de espakar en Carnegie Mellon, lavoro en la entreprisa RCA komo ejneniera de desen en prodjektos de raketas i radares,[6] desvelopando komponentes elektronikos i software para los radares de la NASA.[5] En 1977, aresivio notas kaji perfektas (100 i 98) en los egzamenes ke tomo kon el buto de aresivir la sertifikasion de piloto profesionala.[5] Diskues de ser sertifikada, prinsipio la su kariera en la NASA, volando enel Northrop T-38 Talon. [7] Antes de prinsipiar en NASA, lavoro komo sehefa de desvelopamiento en Xerox.[8]
Astronautika
En Djenero de 1978 i de edad de 28 anyos, era aresivida enel Ekip de Astronotas de la NASA, una de las 6 mujeres akseptadas entre 8.000 demandantes. [4] Kedo abulmada kuando no era eskokida komo la primera mujer amerikana en volar al espasio, ya ke eya i Sally K. Ride aresivieron iguales notas. El su primer viaje al espasio era enel primer viaje de la nave espasiala Discovery en la faena STS-41-D entre Ogusto i Sietembre de 1984 komo espesialista de faena; el su lazerio era operar el braso robot de la nave espasiala, [9] desvelopado por un ekip de sientistos, del kualo eya azia parte.
Referensias
- ↑ Marvin Resnik, father of Challenger astronaut Judith Resnik, was 90
- ↑ a b c Judith Resnik. Jewish Virtual Library
- ↑ a b The Epic Flight of Judith Resnik, by Scott Spencer and Chris Spolar, The Age - Jan 16, 1987
- ↑ a b Women Spacefarers: Sixty Different Paths to Space By Umberto Cavallaro, Springer 2017, p. 28.
- ↑ a b c Women Spacefarers: Sixty Different Paths to Space By Umberto Cavallaro, Springer 2017, p. 28.
- ↑ Judy Resnik: Family, Friends Remember Engineer Who Reached for the Stars By Chriss Swaney, The Piper Carnegie Mellon University, 1 de Marso de 2011.
- ↑ Judy Resnik: Family, Friends Remember Engineer Who Reached for the Stars. Universita Carnegie Mellon
- ↑ Coverage from the day space shuttle Challenger exploded: Resnik liked a job label with no frills. Orlando Sentinel
- ↑ American Women of Science Since 1900, Volume 1, By Tiffany K. Wayne (2011), p. 796.