Sjtókkem

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Waegkruus in Sjtókkem

Sjtókkem (Nederlands: Stokhem) ies 'n buurtsjap van Wielder in de gemeinte Gulpe-Wittem in 't dal van de Geul in Zuud-Limburg. 't Achtervoogsel heim wilt zègke, dat hie al lang luuj (heim) wone. Sjtok geit truuk nao sjtek, boumsjtam of rieshout. Ouwer sjriefwies zint: Stokkum, in 1399 Stochem, in 1840 Stockem.

Aan de dörpsjtraot riechting de beemde van de Geul liek ein aantal vakwerkhoezer. In gans Sjtókkem bevinge ziech ongevaer 75 hoezer en häöf. Mieddenin de buurtsjap, aan 'ne driejsprunk sjteit 'n verseerd sjmeediezere weegkruus mèt crucifix en 2 ander heiligebeelde mèt 'ne Duutsje teks: "SO HAT COTT DIE WELT GELIEBT DAS ER SEINEN SOHN DAHIN GAB 1886".
Aan de voot van de sjtiele doaje man, ('ne weeg, dae nao Berghäöf löp), sjteit 'n modern Maria van Banneux-kapel. Op de helling aan deze weeg liek de wiengaard de Sjtokhemer wingerd.