Còdice Morfìn
ZE
|
Quésta pàgina a l'é scrîta in zenéize, segóndo a grafîa ofiçiâ |
O Còdice Morfìn o l'é 'n manoscrîto do sécolo XIV ch'o contêgne a produçión de un di màscimi poêti in léngoa lìgure, l'Anònimo Zenéize.
Stöia
O manoscrîto o l'é dîto Còdice Morfìn da-o nómme do sò descrovitô, o Matê Morfìn, avocâto cìvico, segretâio do Decorionòu da çitæ de Zêna e, tra o 1849 e o 1854, do Comùn ascì. Descrovîo o còdice tra o 1820 e o 1821[1], o Morfìn o-o l'à fæto védde a-o leteròu Gioàn Batìsta Spotórno, ch'o l'à difûzo a nêuva da descovèrta comensàndone o stùddio[2].
In particolâ o Morfìn o l'àiva a pasción de coleçionâ antighitæ librâie, creàndo co-i ànni 'n'inportànte arecugéita ch'a s'êa azónta a-i manoscrîti da sò famìggia, vegnìndo in sciâ fìn mìssa in véndia da-o fìggio Zórzo Anbrêuxo pi-â sómma de 3.500 frànchi. Coscì, a-i 10 de màzzo do 1882 o Comùn o l'à acatòu, pe 'n totâle de 1.750 frànchi, a meitæ da coleçión do Morfìn, 81 manoscrîti inclûzo o còdice co-a produçión de l'Anònimo, da quéllo moménto de propiêtæ pùblica[2][3].
Inte l'ànno 1958 l'é stæto trovòu i rèsti de 'n âtro còdice che contêgnan, fêua che pe quàrche diferénsa inta grafîa, e mæxime poêxîe de l'Anònimo. D'ancheu o Codex Molfino o vên conservòu inte l'Archìvio Stòrico do Comùn de Zêna[4].
Descriçión
O còdice, no conplêto, o gh'à de dimenscioìn de 33 x 23 cm, pe 'n totâle de 85 papê. L'é stæto conpilòu co-in tîpo cançelerésco de scritûa gòtica docomentâia, de sòlito dêuviòu pi-â redaçión de còdichi da-a ménn-a ciù contegnûa e pe-i tèsti in vorgâ, bén bén comùn into sécolo XIV[2].
O còdice o contêgne 147 poêxîe in vorgâ zenéize[n. 1] e 35 in latìn, contegnìndo tòsto trent'ànni de produçión poética de l'Anònimo. O scrîto ciù antîgo, 'n rìtmo latìn, o doviéiva defæti remontâ a-o perîodo 1283-1284 méntre, tra i conponiménti che se riêsce a datâ con seguéssa, o ciù recénte o remónta a-o 1311, eséndo dedicòu a-a deschinâ do Rìcco VII inta Cianûa Padànn-a[4].
Nòtte
- Nòtte a-o tèsto
- Nòtte bibliogràfiche
- ↑ Toso, 2009, p. 117
- ↑ 2,0 2,1 2,2 (IT) Il Codice Molfino, in sce museidigenova.it. URL consultòu o 28 frevâ 2023.
- ↑ (IT) Socjêtæ Lìgure d'Istöia Pâtria, Archivio Storico del Comune di Genova, Manoscritti, Molfino, in sce storiapatriagenova.it. URL consultòu o 28 frevâ 2023.
- ↑ 4,0 4,1 4,2 Toso, 2009, p. 118
Bibliografîa
- (IT) Fiorenzo Toso, Origini e Duecento, in La letteratura ligure in genovese e nei dialetti locali, vol. 1, Récco, Le Mani, Novénbre 2009.
Âtri progètti
Wikivivàgna a contêgne una pàgina dedicâ a Còdice Morfìn
Wikimedia Commons a contêgne di files in sce Còdice Morfìn
Ligàmmi de fêua
- (IT) Il Codice Molfino, in sce museidigenova.it. URL consultòu o 28 frevâ 2023.