Rosa Mota
Rosa Maria Correia dos Santos Mota fødd 29. juni 1958 er ein portugisisk tidlegare langdistanseløpar frå Porto som i 1987 vart verdsmeister og 1988 olympisk meister i maratonløping. Ho vann elles dei tre fyrste maratonløpa for kvinner i europameisterskap; 1982. 1986 og 1990.
Aktiv
Under EM 1982 i Aten sprang kvinner maraton i ein internasjonalt meisterskap for aller fyrste gong. På dei siste kilometerane av løpet stod medaljekampen mellom italienske Laura Fogli, norske Ingrid Kristiansen og Rosa Mota. Mota drog til sist ifrå og vann med ein margin på 25 og 35 sekundar til Fogli og til Kristiansen. Året etter måtte Mota nøye seg med fjerdeplassen på maraton ved VM i Helsinki, litt over halvminuttet bakom sølv- og bronsemedaljørane. Under sommarleikane 1984 i Los Angeles sprang ho inn til bronse, 39 sekundar bak sølvvinnar Grete Waitz og 37 sekundar framom Ingrid Kristiansen på fjerdeplass. I 1985 sprang Mota sitt livs kjappaste maraton då ho i Chicago Marathon kom i mål på tida 2.23.29, ho vart likevel slått av Joan Benoit frå USA og Ingrid Kristiansen.
Både i EM 1986 i Stuttgart og i VM 1987 i Roma var Mota i ei eiga klasse i kvinnene sitt maratonløp, i Stuttgart kom ho i mål fire minuttar før nummer to og i Roma passerte ho målstreken meir ein sju minuttar føre sølvmedaljøren. Derimot vart det tette oppgjer då ho vann den olympisk gullmedaljen i Seoul hausten 1988 og då ho i 1990 for andre gong forsvarte EM-tittelen i maraton.
Medaljar og plasseringar i internasjonale meisterskap
- EM 1982 i Aten: Gullmedalje – 2.36.03, framom Laura Fogli (2.36.28)
- VM 1983 i Helsinki: Nr 4 – 2.31.50
- OL 1984 i Los Angeles: Bronsemedalje – 2.26.57
- EM 1986 i Stuttgart: Gullmedalje – 2.28.38, framom Laura Fogli (2.32.52)
- VM 1987 i Roma: Gullmedalje – 2.25.17, framom Zoja Ivnova (2.32.38)
- OL 1988 i Seoul: Gullmedalje – 2.25.40, framom Lisa Martin (2.25.53)
- EM 1990 i Split: Gullmedalje – 2.31.27, framom Valentin Jegorova (2.31.32)
- VM 1991 i Tokyo: Braut maratonløpet