Sibèria

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Sibèria Сибирь
Mapa de sa Sìberia
Istadu	Rùssia Distretos federales de Sibèria, Urales, Oriente Estremu
Tirada	13 100 000 km2 tzirca
Populatzione	36 milliones tzirca
Limbas	Russu

Sa Sibèria (in russu: Сиби́рь, tradùsidu: Sibir) est una regione geogràfica manna chi s'agatat in sa parte asiàtica orientale de sa Federatzione Russa, pro custu puru si ddi narat Rùssia asiàtica, Rùssia orientale o Rùssia de s'Est; e pro more sa posidura geogràfica sua respetu a su continente asiàticu si ddi narat fatu·fatu Àsia Setentrionale, Àsia de su Norte, Norte de Àsia.

Est una regione chi s'iscàmpiat dae is montes Urales in s'ovest, fintzas a s'otzèanu Patzìficu in s'estu, e chi si ghetat in su norte in s'otzèanu Àrticu, mentra is in su sud allàcanat cu Kazachistàn, Mongòlia, Corea de su Norte e Tzina. Su frùmene Enisej partzit sa Sibèria in duas partes, otzidentale e orientale. Non rapresentat peruna partzidura polìticu-amministrativa, dae chi est formada dae distretos vàrios de sa Federatzione Russa.

Sa Sibèria rapresentat unu 76% de su territòriu de sa Rùssia (13,1 milliones de chilòmetros cuadrados), cun densidade de populatzione bàscia meda, sende chi ddoe bivet isceti su 28% de sa populatzione de Rùssia, chi benint a èssere unos 36 milliones de persones . Custu est echivalente a una densidade de populatzione mèdia de tzirca tres bividores pro chilòmetru cuadradu (simigiante a sa densidade de s'Austràlia), faghende de Sibèria una de is regiones cun populatzione prus iscassa dae sa Terra.