Vajo del Pino

El Vajo del Pino el xe sul Pasubio. Se pol dopararlo par rivar su al Rifugio Papa in 3 ore e mesa. Se parte da Ponte Verde (901 m) e se va su par la strada par Paso Xomo. Quando che se riva a ła prima curva a sinistra, se gira drento a sinistra, drio ai paŀeti bianchi e rosi, sui prà. Se riva a na stradina e se ghe va drio verso destra, fin a un slargo, dove che ghe xe na frecia co scrito "zona dei vaj". Sempre driti verso est fin a Malga Cornebe (1180 m), paxare la giara de ła Val Fontana d'Oro fin in sima a na pontara dove, a sinistra, ghe xe un ometo che el mostra ła via pal Voro dei Toni. Bisogna montar su par ła giara del voro (ghe xe ła scrita in roxo sul muro de rocia, a destra, 300 metri in su: Voro dei Toni). Se va su finchè no se trova na frecia rosa a sinistra co scrito PINO. Ciapàr el troso, franoxo e co l'erba, de ła Łora (Troxo dei Contrabandieri). A un çerto punto se trova un camin e se va su tegnendo ła destra, su par ła giara de ła Łora, se continua su na pontara de erba (ocio se piove). Se riva a na piera piata, el Tavołin dei Contrabandieri. Su oncora a sinistra fin a ła Sełèta de łe Poe, dopo un poco in xo, e in diexe minuti se riva a ła Boketa de łe Sgralaite. Vanti senpre a destra fin al Scaranto dei Contrabandieri e via fin a naltra frecia rosa co scrito "PINO". Se inboca el Vajo del Pino e se va su fin a na cresta verde, ła Cresta dei Cotorni. Se xe rivà suła Val Camoxara, se continua par ła cresta, se traversa a sinistra e se va su fin a na sełèta. Da qua, in su a destra fin al Saxo dei Contrabandieri e a ła Strada de łe Gałerie (fra ła 32ma e ła 33ma). Da qua al Rifugio Papa (1934 m).