劉徹

劉徹（前156年—前87年）係漢第七代皇帝，死後謚號武帝，所以後世又叫劉徹做漢武帝。佢係漢景帝劉啟嘅仔，漢文帝劉恆嘅孫，漢高祖劉邦嘅曾孫，佢老母係皇后王娡。7歲時立為太子，16歲登基，在位五十四年。佢令到漢成為當時世上一大強國，但係戰爭同埋經濟政策，亦都造成百姓沈重負荷。

生平

漢武帝未做皇帝之前，係由嫲嫲竇太后養大，又由舅父田蚡幫漢武帝教書。所以佢一上台，就實行「罷黜百家，獨尊儒術」嘅策略。又確立察舉制度，正式擁有制度性嘅選官機制。

當時匈奴人唔停咁入侵，漢武帝決定集中兵權，經濟政策中央化，賣食鹽、賣鐵、賣酒都要由政府經營，又統一貨幣。漢武帝仲進行咗人類史上第一次人口統計。

漢武帝曾經三次攻打匈奴。又派遣張騫出使西域，打通咗絲綢之路；喺西南消滅咗夜郎、南越等國。漢武帝影響力，已經深入到西北、東南同東北好幾個端。

之不過漢武帝本人好大喜功，拚命打匈奴唔停手，搞到國家經濟差唔多冧。佢感到後悔，就下咗《輪台罪己詔》，對自己嘅過錯深表反省。

前87年漢武帝喺宮入面駕崩，享年七十歲。