捕食

  「獵物」跳轉到呢度。想搵打獵嘅獵物，請睇「獵物 (打獵)」。

上圖：單獨捕食－北極熊殺同食緊一隻海豹。
下圖：合作捕食－羣螞蟻殺同食一隻沙蟬。

捕食（粵拼：bou6 sik6），粵語又有叫獵食（粵拼：lip6 sik6），係生態學入面生物之間互動嘅一種方式。喺呢種互動方式入面，互動嘅其中一方會去捉對方，殺死後者同埋將後者食落肚；食對方嘅係所謂嘅捕食者，而畀人食嗰方就係所謂嘅獵物。如果有種生物 A 硬係會畀另一種生物 B 捕食，噉 B 就係 A 嘅天敵。

狼、老虎、獅子同蜘蛛等嘅動物都係出名嘅捕食者。例如狼同兔仔噉，狼硬係會例如捉同殺兔仔，殺咗之後將兔仔食落肚，狼係呢段關係入面嘅捕食者，兔仔係獵物，而因為狼硬係會捕食兔仔，所以狼係兔仔嘅天敵。

定義

隻寄生蜂（左）嘗試喺條毛蟲（右）身上生蛋；寄生蜂啲寄主會反抗，有時仲會喺反抗途中殺死隻寄生蜂。

睇埋：覓食、寄生、食肉動物同食腐動物

响生態學上，要定義捕食呢隻詞查實有啲撈絞。

例子：寄生蜂

寄生蜂係指膜翅目細腰亞目當中好幾科嘅昆蟲；佢哋最出名嘅係會靠寄生嚟生存同繁殖－寄生蜂乸會將蛋生喺第啲節肢動物（寄主）體內，常見嘅寄主有毛蟲、甲蟲同蜘蛛呀噉；啲幼蟲出咗世就會食寄主嘅肉維生；當中有啲物種嘅寄生蜂幼蟲，仲會暫時留住寄主條命，甚至識得擾亂寄主嘅神經系統令寄主保護佢哋，寄主要等到啲幼蟲變咗成蟲先會死。

一般認為，好似寄生蜂呢種寄生做法，理應要同「捕食」區分開。

2022 年嘅不列顛百科全書係噉描述捕食嘅：

「

粵文翻譯：捕食，喺動物行為上，係指追、捉同殺動物嚟食。捕食性嘅動物可以係獨行嘅，好似豹噉，又可以係成羣噉捕食嘅，好似狼噉。

」

一般嚟講，一串行為要有齊

1. 捉：捉一隻生勾勾嘅獵物，
2. 殺：親手殺死隻獵食，
3. 食：再食隻獵物嘅肉，唔一定係自己食，例如阿爸阿媽成日會捉同殺獵物，然後攞啲肉畀仔女食；

三步驟，先算得上係「捕食」－

• 狼捉、殺同食馴鹿等嘅多種哺乳類。
• 貓捉、殺同食老鼠等嘅多種嚙齒目。
• 蝙蝠捉、殺同食飛蛾。
• 白頭海鵰捉、殺同食多種嘅魚。
• 蛇捉、殺同食多種青蛙同雀鳥。
• 蜘蛛捉、殺同食包括蝴蝶同蜜蜂在內嘅多種昆蟲。
• 瓢蟲捉、殺同食蚜蟲。

... 呀噉。好似寄生蜂噉「捉第啲動物，但唔會即刻殺」嘅寄生行為，就唔合符上面對「捕食」嘅定義。

仲有一點要留意嘅係，捕食有異於食腐：食腐係指食一啲已經死咗嘅生物；例如禿鷹就出晒名成日會搵啲動物嘅死屍嚟食；嚴格噉講，捕食一定係特指有齊捉殺食三步嘅行為，而好似禿鷹噉嘅食腐行為，少噉咗捉同殺，定義上都唔屬於捕食。

一群禿鷹搵到隻鬣狗嘅死屍嚟食；喺班禿鷹嚟到之前，隻鬣狗已經死咗，班禿鷹並冇「捉同殺」隻鬣狗－班禿鷹做緊嘅嘢係食腐而唔係捕食。

點捉獵物

睇埋：打獵

捕食者可以靠「用乜方法捉獵物」嚟分類。

追趕式

内文：追趕式捕食

追趕式係最簡單直接嗰種捕食方法，指隻捕食者追趕隻獵物。如果隻獵物以直線跑，噉隻捕食者淨係需要跑得快過隻獵物，而如果隻獵物走佬途中掟彎，隻捕食者就要有夠快嘅反應更改自己路線；包括人類、狼、海豚、殺人鯨同埋蜻蜓都屬追趕式捕食者。追趕式捕食者有好多策略可以採用－

• 齋靠速度：好似係獵豹噉，就係出咗名嘅純速度型捕食者，佢哋冇乜嘢叻，最大嘅長處就係「快」－據報佢哋全力衝刺嗰陣速度可以去到時速 93 km 咁高，係陸上動物之冠，啲獵物全速跑都唔夠獵豹咁快，所以就會畀獵豹捉住。
• 鬼祟接近：而家想像隻捕食者身上有保護色，獵物難以睇到佢，噉隻捕食者可以靜靜雞伏喺（例如）草入面行近獵物，等到距離有咁上下近，隻捕食者就一嘢開始追趕，就算隻獵物全速跑嗰時有能力擺脫隻捕食者，佢都有可能因為受到突襲而嚟唔切加到最高速，然後就畀隻捕食者追到；好似老虎就出名成日用呢種做法捕食。
• 成群追趕：狼就好興成群打獵；齋講體能嘅話，狼（以捕食性嘅哺乳類嚟講）唔算最出眾－佢哋速度比唔上獵豹（狼全速跑嗰陣，速度據報頂晒攏得嗰時速 64 km ），而且又冇老虎或者熊人jan2咁大隻咁肌肉強壯；不過狼又有一樣嘢係勁過獵豹、老虎同熊嘅，就係狼好識得團隊行動－想像家吓兩隻狼一齊追住隻駝鹿噉跑，一隻喺獵物左邊追，另一隻喺獵物右邊追，噉隻獵物轉左定轉右都會畀隻狼一嘢撲上去咬佢，畀狼咬中就好大機會失平衡跌低，跌低咗就會即刻有幾隻狼齊齊撲上去咬佢－等如實死；而喺現實，狼往往會起碼三四隻一齊追住隻獵物嚟咬。

一隻全速衝刺緊嘅獵豹 一隻全速衝刺緊嘅獵豹  一隻老虎匿埋喺植物嘅葉入面。 一隻老虎匿埋喺植物嘅葉入面。  一群狼喺度圍攻緊隻美洲野牛。獵豹、老虎同熊淨係識單獨行動，但狼就識團隊作戰。 一群狼喺度圍攻緊隻美洲野牛。獵豹、老虎同熊淨係識單獨行動，但狼就識團隊作戰。

• 堅持式：會用堅持式策略嘅獵食者通常係跑得唔快，但耐力勁兼且有返咁上下聰明嘅；呢啲獵食者冇能力齋靠速度捉住獵物，所以打獵嗰陣佢哋會靠跑一陣行一陣嘅移動模式，跟實喺隻獵物身後唔遠嘅地方；呢啲獵食者跑唔快，途中可能會畀隻獵物走甩一陣，但佢哋夠聰明，好快就可以靠跟住隻獵物嘅腳印或者留低嘅大便等嘅痕跡追上去－呢點令到隻獵物冇得唞要係噉走佬；於是乎，呢啲獵食者就一路係噉跟住隻獵物，跟成幾個鐘頭咁耐嘅時間；因為呢啲獵食者耐力好，所以最後最先會攰到走唔郁嘅會係隻獵物－而等到隻獵物走唔郁嘅時候，啲獵食者就可以上前去殺死隻冇力反抗嘅獵物。人類就出名會用呢種策略打獵。

埋伏式

内文：埋伏式捕食

睇埋：埋伏

埋伏式顧名思義係指「埋伏」隻獵物：採用呢種做法嘅捕食者通常有保護色或者類似能力，能夠輕易喺環境入面匿埋，令獵物探測唔到佢；而佢會匿埋喺佢獵物常去嘅地方，等有獵物靠到咁上下近，隻捕食者就會一嘢撲上隻獵物身上或者用第啲方法捉住隻獵物，途中完全唔會有「追趕」出現。埋伏式捕食都可以再細分做唔同類：

• 「陷阱」：捕食者識得「設陷阱」，意思係指佢哋識建造某啲結構，獵物一旦唔覺意走咗入嚟就會被困，跟住捕食者就可以上前去殺同食獵物；例如蜘蛛喺呢方面就好出名，好多物種嘅蜘蛛都曉織蜘蛛網，用嚟整蜘蛛網嘅絲強韌又有黏性，蝴蝶、蜜蜂或者蜻蜓等嘅昆蟲成日都會飛飛吓撞落個網度，一落咗網就郁唔到，就算蜘蛛速度唔快又唔識飛，都可以捉住獵物。亦可以睇睇蟻蛉嘅捕食方法。
• 僞裝：捕食者個樣望落似環境入便嘅物件，（好多時視力明顯差過人類嘅）獵物睇唔到捕食者，就會慒盛盛噉行埋捕食者度；例如變色龍出咗名曉變色，令自己色水似樹枝或者草等環境入便嘅嘢，細隻嘅昆蟲睇唔到變色龍就有可能會飛入變色龍條長脷嘅「射程」，然後變色龍就會一嘢「射出」條又長又有黏性嘅脷，捉住獵物。
• 攻擊型擬態：指捕食者扮成一啲無害嘅生物，令獵物肯行近；例子可以睇吓蘭花螳螂嗰種做法。

呢段片拍歐洲螳螂；當中有幾段展示佢哋用「埋伏等獵物行近，再一嘢捉住獵物，途中冇追趕」噉嘅方法捕食。 呢段片拍歐洲螳螂；當中有幾段展示佢哋用「埋伏等獵物行近，再一嘢捉住獵物，途中冇追趕」噉嘅方法捕食。  一隻飛蟲進入咗變色龍條脷嘅「射程」。 一隻飛蟲進入咗變色龍條脷嘅「射程」。  變色龍一嘢伸出條脷，捉住獵物。 變色龍一嘢伸出條脷，捉住獵物。

睇埋

2018 年影到隻歐亞水獺喺度食緊條魚。佢將條魚嘅身體撕到爛晒。

• 食物鏈 · 頂級獵食者
• 洛卡-伏塔拉方程式
• 反捕食者適應
• R/K 選擇理論
• 死亡同痛楚
• 驚嘅生態學

「	我（當時）正喺度沿住一條小溪嘅岸邊散步，行行吓見到隻水獺乸同佢啲仔女。（班水獺）係一幅好得人鍾意嘅景象，我肯定你哋都會同意。而隨住我喺度望，隻水獺阿媽潛咗落水然後再捉住隻肥美嘅三文魚上返嚟，佢（隻水獺阿媽）制服條魚同埋將條魚拉上去一條一半沉咗喺水入面嘅木嗰度。佢一路監生食條魚，食食吓（條魚嘅）身體裂開咗，然後條魚啲卵流晒出嚟，而到咗今日我仲記得啲卵色水幾咁甜美粉紅。啲水獺仔睇到好開心，仲爭住去食呢樣佳餚。眾紳士呀，大自然其中一樣奇觀。阿媽同仔女開餐食阿媽同仔女。呢單嘢係我第一次學識咩係邪惡。宇宙嘅根性就有住邪惡。每個世界都喺痛楚之中旋轉。我同我自己講，如果（宇宙）有咩最高存在體，就要由我哋嚟喺道德上超越佢。	」
——英格蘭作家泰利·普萊契，可以睇埋邪惡問題嘅概念

引述

篇文用咗嘅行話或者專有名詞，英文（或者其他外語）名如下：

篇文引用咗以下呢啲文獻同網頁：

拎

• （英文） 捕食，不列顛百科全書講捕食呢個概念。
• （英文） 科莫多龍捉同監生吞食野豬，呢條 YouTube 片拍緊一隻科莫多巨蜥食一隻野豬仔，隻野豬仔一直搏晒命慘叫，啲圍觀嘅人一路觀賞。
• （英文） 科迪亞克熊捉同食三文魚，呢條短片影一隻熊喺河邊捉三文魚嚟食，隻熊一掌撳實條魚，條魚一路掙扎一路畀隻熊監生噉剝皮同咬甩佢身上嘅大忽肉。
• （英文） 雷公蛇能夠以幾快嘅速度食八隻倉鼠呢？，呢條片用咗倉鼠做生餌餵蜥蜴，啲倉鼠嘗試逃走，但係最後都難逃畀蜥蜴食落肚嘅下場。