Karl Marx

Karl Marx
Vida
Nacimientu	Tréveris, 5 de mayu de 1818
Nacionalidá	Reinu de Prusia  1845) Reinu Xuníu apátrida  (1845 -
Residencia	Londres Tréveris Berlín París The Swan (en)
Grupu étnicu	asquenazí
Llingua materna	alemán
Muerte	Londres, 14 de marzu de 1883 (64 años)
Sepultura	Tumba de Karl Marx (es)
Causa de la muerte	enfermedad pulmonar (es)
Familia
Padre	Heinrich Marx
Madre	Henriette Presburg
Casáu con	Jenny Marx (1843 – 1881)
Fíos/es	Eleanor Marx Jenny Longuet Laura Marx Edgar Marx Frederick Demuth Heinrich Edward Guy Marx (en) Jenny Evelin Francis Marx (en)
Hermanos/es	Emilie Conradi Louise Juta Mauritz David Marx Sophia Marx
Familia	ver Ludwig von Westphalen (es) (suegru)
Estudios
Estudios	Universidá de Jena Gimnasio Federico Guillermo de Tréveris (es) (1830 - Universidá de Bonn (ochobre 1835 - 1836) Universidá Humboldt de Berlín (ochobre 1836 - : xurisprudencia, filosofía
Nivel d'estudios	Philosophiæ doctor
Tesis	Differenz der demokritischen und epikureischen naturphilosophie
Direutor de tesis	Bruno Bauer
Llingües falaes	alemán
Alumnu de	Friedrich Gottlieb Welcker
Oficiu	economista, periodista, historiador, filósofu, sociólogu, revolucionariu, poeta, políticu, escritor, autor, científicu social, socialista, guionista de cine
Llugares de trabayu	Colonia
Emplegadores	Nueva Gaceta Renana (es) Gaceta Renana (es)
Trabayos destacaos	Manuscritos económicos y filosóficos de 1844 (es) Das Kapital La ideología alemana (es) Manifiestu comunista
Premios	ver Miembro de la Royal Society of Arts
Influyencies	Georg Wilhelm Friedrich Hegel, Max Stirner, Ludwig Feuerbach y La Esencia del Cristianismo (es)
Miembru de	Primera Internacional
Seudónimu	Glückskind
Creencies
Relixón	ateísmu antiteísmu
Partíu políticu	Lliga de los Comunistes
IMDb	nm0555631

Karl Heinrich Marx o, a cencielles, Karl Marx (5 de mayu de 1818, Tréveris – 14 de marzu de 1883, Londres) foi ún de los pensadores más influyentes de la Historia y figura clave nel analís de la historia, la sociedá, la política y la economía. El so pensamientu prolóngase hasta munches décades más allá de la so muerte, siendo clave p'atalantar los procesos sociales y políticos del sieglu XX y convirtiéndose nel pá ideolóxicu del comunismu.

Biografía

Marx nació en Tréveris (en Prusia Trier -agora Alemaña-), col nome Karl Heinrich Marx, dientro d'una familia hebrea. Estudió derechu na Universidá de Bonn y aína implicóse na ellaboración de trabayos en torno a la realidá social, collaborando nel "Rheinische Zeitung", publicación de la que aína llegará a ser redautor xefe. Funda tamién el "Deutsch-französische Jahrbücher", revista franco-alemana de la que será direutor, de corta vida. En París, Marx conoz y faise collaciu de Friedrich Engels, personax que será de vital importancia na so vida, ya que será'l sofitu económicu de Marx. El pesu políticu de los artículos asoleyaos en Francia faen que gane fama d'axitador, lo que provoca la so espulsión de Francia. Establecíu en Bruxeles, ingresa na Lliga de los Comunistes, tres lo cual declárase apátrida y revolucionariu. Tres el periodu revolucionariu de 1848, treslladase a Colonia, onde entama un nuevu diariu, "Neue Rheinische Zeitung". qu'algama ésitu darréu, nel contestu d'una dómina de fuerte sentimientu social y compromisu revolucionariu. Poro, ye prohibíu pol gobiernu renanu. Ye agora cuando Marx se dedica a la escritura d'una de les sos obres fundamentales, El Capital, que fai nes sales de llectura del Muséu Británicu. El primer volume d'"El Capital" nun verá la lluz hasta 1867, tres dieciochu años de trabayu. Amás de preparar la publicación, Marx collaboró na organización de la Primera Internacional, participando activamente nos alderiques. Tres la Comuna de París de 1871, que significó un duru güelpe pa la Internacional, Marx retiróse de la llucha político y dedicóse a la escritura del so pensamientu. El 14 de marzu de 1883 morría en Londres.

Karl Marx casóse con Jenny von Westphalen, cola que tuvo tres fíos: la mayor, Francesca Marx, que se suicidó; Edgar Marx, que morrió a los ocho años, y la pequeña, Eleonora Marx (que formó parte del movimientu feminista).

Pensamientu

Testigu y víctima de la primer gran crisis del capitalismu (década de los años 30 del sieglu XIX) y del periodu revolucionariu de 1848, Marx desendolca una teoría económica capaz d'aportar esplicaciones a les mesmes, pero a la vegada encamentar a les clases populares a participar nella activamente pa producir un cambiu revolucionariu.

Pa Marx, la determinación de la magnitú de valor d'una mercancía ye la cantidá de trabayu requeríu socialmente pa producila. Esta ye la conocía teoría del valor trabayu. Asina, criticando la teoría de David Ricardo del valor-trabayu, deduz que'l salariu ye'l valor de la mercancía fuercia de trabayu, y como tou valor, determínase pol tiempu de trabayu necesariu pa la producción y reproducción de la mesma, nesti casu pa la producción y reproducción de la mercancía fuercia de trabayu, al valor de los medios de vida necesarios p'afitar la subsistencia del trabayador. Dotramiente, el capitalista comprador de la fuercia de trabayu consume dicha mercancía nel procesu de producción onde'l trabayador rinde demientres un tiempu (xornada llaboral) qu'escede la cantidá de tiempu necesaria pa la so reproducción como obreru (salariu), ye decir, el valor de la fuercia de trabayu y la so valorización nel procesu de trabayu son factores distintos, cuya diferencia determina la magnitú de la plusvalía (exemplu de Marx nel Capital 1: "que p'alimentar y caltener en pie la fuercia de trabayu demientres venticuatro hores faiga falta media xornada de trabayu, nun quier decir, nin muncho menos, que'l obreru nun puea trabayar durante una xornada entera) . Esta plusvalía ye apropiada pol capitalista y d'ella vien la ganancia. Esta apropiación constitúi la bas fundamental del mou de producción capitalista y a la so vez estes condiciones materiales determinen la superestructura, ye decir les formes y conteníos de la concencia espresaes nel arte, la política, la relixón y tamién el derechu. Esta contradicción fundamental (producción coleutiva vs. apropiación individual) baxo'l réxime de producción capitalista reviste la forma de Llei xeneral de l'acumulación capitalista que consiste en que cuanto mayor ye la riqueza social, ye decir el capital en funcionamientu y por tanto, tanto mayor ye la magnitú absoluta del proletariáu y la capacidá productiva del mesmu, tanto mayor ye l'exércitu de reserva, y polo tanto a midía que medra l'acumulación de capital medra l'acumulación de miseria, y dalgunos de los sos fenómenos son l'amenorgamientu de la tasa beneficios a la vegada que la concentración del capital en mui poques manes. Asina, la contradicción cimera del capitalismu según Marx ye l'antagonismu de clases ente la clas capitalista y la clas proletaria.

La necesidá de la revolución implicada en tales contradicciones ta determinada poles tensiones que deriven del fechu de que les fuercies productives sobrepasen y vense llimitaes poles rellaciones de producción, pal capitalismu tal revolución consiste na "espropiación de los espropiadores" y movimientu final de la dialéutica de la propiedá privada y la so abolición, que nel pensamientu de Marx concrétase nun horizonte políticu concretu: el socialismu, antesala a la vegada del comunismu. El materialismu dialéuticu, ye decir la dialéutica del mou en que l'home produz los sos medios de vida, de la que se deriva la so alienación, constitúi pa Marx la historia humana (pa Marx: la historia humana ye la historia de la so alienación y de la abolición d'esta alienación), historia que a cada momentu solo pue ser entendida según los sos diferentes modos de producción, y la llucha de clases inherente, por exemplu, esclavista, feudal, capitalista y comunista.

El capital - Karl Marx

Les obres de Marx influyeron a bon númberu de teóricos y políticos, nun bon númberu d'ocasiones enemigos ente sí. Por una parte, habría señalar la interpretación fecha polos países del "socialismu real", partidarios de qu'una vanguardia del proletariáu se faiga col poder al traviés de la fuercia, p'asina avanzar faza'l socialismu: XRSS, Albania, China, Cuba... Per otra, la que fai la socialdemocracia, nos sos entamos contraria a la táctica revolucionaria y partidaria d'avanzar faza'l socialismu al traviés de progresives reformes parllamentaries (hai que decir que la mayoría de partíos socialdemócrates foron a dapoco reformando los sos plantegamientos, hasta aceutar la economía de mercáu). Asinamesmo, hai teóricos que s'asitien ente estes dos interpretaciones y defenden una revolución radicalmente democrática, y otros qu' apliquen el marxismu al estudiu de determinaes ciencies (historia: (materialismu históricu), arte, antropoloxía, ...).

Críticos de Marx

Un críticu de Marx ye Karl Popper. Otru críticu, más de la vida personal que de la ideoloxía de Marx, ye Paul Johnson, que dedica a Marx un capítulu del so llibru "Intellectuals".

Obres

• Manifiestu comunista (1848) - Karl Marx y Friedrich Engels
• El capital (Das Kapital) (1867) - Karl Marx

Enllaces esternos

• Wikimedia Commons acueye conteníu multimedia sobre Karl Marx.
• Karl Marx (en castellán)
• Archivos de Marxismu (en castellán)
• Karl Marx na Internet Movie Database (n'inglés)

• Datos: Q9061
• Multimedia: Karl Marx
• Cites famoses: Karl Marx
• Testos: Autor:Karl Marx