H.P. Lovecraft

H. P. Lovecraft in 1934.

Howard Phillips Lovecraft (20 Augustus 1890 – 15 Maart 1937) was ' n Amerikaanse skrywer van gruwel-, wetenskap- en fantasiefiksie. Hy is veral bekend vir sy skepping van die Cthulhu Mythos.

Lovecraft, gebore in Providence, Rhode Island, het die grootste deel van sy lewe in Nieu-Engeland deurgebring. Ná sy pa se institusionalisering, of opname in 'n inrigting, in 1893 het hy welvarend gelewe totdat sy familie se rykdom ná die dood van sy oupa verdwyn het. Lovecraft het toe saam met sy ma gaan woon, in verminderde finansiële sekuriteit, totdat ook sý in 'n inrigting opgeneem is.

Hy het begin om opstelle vir die United Amateur Press Association te skryf, en in 1913 skryf hy 'n kritiese brief aan 'n pulptydskrif wat uiteindelik lei tot sy betrokkenheid by pulpfiksie. Hy het aktief geword in die spekulatiewe fiksiegemeenskap en is in verskeie pulptydskrifte gepubliseer. Lovecraft het na New York verhuis en in 1924 met Sonia Greene getrou. Hy word later die middelpunt van 'n groter groep skrywers bekend as die "Lovecraft Circle". Hulle het hom aan Weird Tales voorgestel, wat sy mees prominente uitgewer sou word.

Lovecraft se tyd in New York het 'n tol op sy geestelike toestand en finansiële vermoë geëis. In 1926 keer hy terug na Providence en produseer daar van sy gewildste werke, waaronder The Call of Cthulhu, At the Mountains of Madness, The Shadow over Innsmouth en The Shadow Out of Time. Hy sou vir 11 jaar aktief as skrywer bly tot sy dood aan dermkanker op die ouderdom van 46.

Lovecraft se literêre korpus is gebaseer op die idee van kosmisme, wat terselfdertyd sy persoonlike filosofie en die hooftema van sy fiksie was. Kosmisme beweer dat die mensdom 'n onbeduidende deel van die kosmos is en enige oomblik weggevee kan word.

Hy het fantasie- en wetenskapfiksie-elemente in sy verhale ingebring. Dit was gekoppel aan sy ambivalente sienings oor kennis.

Beskawingsverval speel 'n groot rol in sy werke, aangesien hy geglo het dat die Weste gedurende sy leeftyd besig was om te verval. Lovecraft se vroeë politieke opinies was konserwatief en tradisioneel. Na die Groot Depressie het Lovecraft 'n sosialis geword, wat nie meer geglo het dat 'n regverdige aristokrasie die wêreld méér regverdig sou maak nie.

Deur sy volwasse lewe was Lovecraft nooit in staat om homself uit die verdienste as skrywer en redakteur te onderhou nie. Hy was feitlik onbekend gedurende sy leeftyd en het byna uitsluitlik in pulptydskrifte gepubliseer voor sy dood. 'n Wetenskaplike herlewing van Lovecraft se werk het in die 1970's begin, en hy word nou beskou as een van die belangrikste 20ste-eeuse skrywers van bonatuurlike gruwelfiksie.

Vele direkte aanpassings en geestelike opvolgers het gevolg. Werke geïnspireer deur Lovecraft, verwerkings of oorspronklike werke, het begin om die basis te vorm van die Cthulhu Mythos, wat Lovecraft se karakters, omgewing en temas gebruik.

Bronne

• Joshi, S. T. (2009). H.P. Lovecraft: A Comprehensive Bibliography. Tampa, FL: University of Tampa Press. ISBN 9781597320689.
• Joshi, S. T. (2002). H.P. Lovecraft and Lovecraft Criticism: An Annotated Bibliography. Holicong, PA: Wildside Press. ISBN 1592240127.
• Owings, Mark; Chalker, Jack L. (1973). The Revised H.P. Lovecraft Bibliography. Baltimore: Mirage Press. ISBN 0883580101.