Pöt (dörp)

Dit artikel is gesjreve (of begós) in 't Pöts. Laes hie wie v'r mit de versjillende saorte Limburgs ómgaon.

---

De kèrk in Pöt

Pöt (Nederlands: Puth) is 'n dörp in de gemeinte Baekdale op 't plateau in Zuud-Limburg. Vanoet Mestreech löp 'ne Romeinse waeg via Doonder euver Pöt nao Töddere in Duutsjland. Aan deze Mestreechterwaeg is in de loup van d'n tied 't dörp Pöt óntsjtange. De naam geit truk nao 'n aantal depe waterpötte, die hie gegrave zint gewaes. Pöt weurt veur 't ièrsj geneump in ein akte oet 1377, woa sjpraoke is van ridder Jan van Putte. 't Adellik hoes Pöt waor 'ne laathaof. Óndanks de hoag ligking zint hie in vreuger tieje luuj gaon wone, deils umdat 't hie vröchbare löss gaof en deils vanwege de handelswaeg.

• Kesjtièl Pöt lik in de gemeinte Voelender, aan de Hoonsbaek.

Bezeenswaerdig

Vakwerk in Baoveste Pöt

• Wat nog euver is van de vreuger groate häöf zint Mahove en Hautvas (noe appartemente) aan G'n Ing. De hoezer ligke in zoageneumde lintbeboewing langs de Sjteinsjtraot, Óndersjte Pöt, Baoveste Pöt en de Kempeswaeg richting Zjweikese.
• Euvergebleve zint nog 'n paar vakwerkhoezer of gedeiltes daovan, veural in Baoveste Pöt. In 't centrum heisj 'n grupke vakwerkhoezer Vogelzang.
  
• Op de plek woa vreuger 'n waterpöt sjtóng sjteit saer 1930 de parochiekèrk. Zie is óntworpe door architect C.J.H. Franssen en gewiejd aan Petrus en Canisius. De sjtiel is expressionistisch mèt neo-romaanse elemente.
  
• 'n Baksjteine waegkapel gewiejd aan Maria. Ze is geboewd in 1990 op de plaats van 'n ouwer exemplaar oet 1890. 't Mariabeeld en 't kruus op 't daak sjtamme van 't oud kloaster van Pöt.
  
• Op 'ne driesjprunk sjteit 'n baksjteine veldkapel oet 1977 gewiejd aan Maria.

Dörpsvereiniginge

• Sjötterie Sint Sebastiaan
• Carnavalsvereiniging de Pötters
• De Keuninklijke Fanfaar St. Caecilia oet Pöt

Extern website

• Puthplaza