Ethan

Ethan
Systemateschen Numm (IUPAC)	Ethan
Trivialen Numm	Äthan
Cheemesch Formel	C2H6
Ausgesinn / Geroch	Faarflose, gerochlose Gas
Eegenschaften
Dicht	1,36 g/l bei 0 °C, 1013 hPa
Léislechkeet	0,0602 g/l (bei 25 °C am Waasser)
Agregatzoustand	gasfërmeg
Molmass	30,07 g/mol
Schmëlzpunkt	-183 °C
Kachpunkt	-89 °C
Thermodynamesch Daten
Standard Formatiounsenthalpie ΔfH0	-84 KJ·mol−1
Standardentropie S0	230 J·K−1·mol−1
Verbrennungsenthalpie ΔcH0	-1560,7 KJ·mol−1
Weideres

Ethan (oder Äthan) ass e gesiedegte Kuelewaasserstoff aus der Famill vun den Alkanen. E kënnt am Sumpfgas, Äerdgas an an de Raffinerie- a Kokereigaser vir. Ethan ass e Bestanddeel vun de Brenngaser.

Physikalesch Eegeschaften

Ethan ass bei 25 °C an 1013 hPa am gasfërmegen Zoustand an en huet kee Geroch a keng Faarf. En ass méi schwéier wéi Loft, seng Dicht läit bei 1,36 g/l. Ethan léist sech schlecht am Waasser, dofir awer ass en am Benzol gutt léislech. Wéi de Methan, ass och den Ethan schwéier ze verflëssegen, wéinst sengem nidderege Kachpunkt.

Chemesch Eegeschaften

Ethan ass liicht brennbar a kann, mat Sauerstoff gemëscht, explodéieren. E brennt mat enger schwacher Flam. Bei der Verbrennung vum Ethan entsteet, wéi bei all Alkan, Waasser a Kuelendioxid.

$\mathrm {2\,C_{2}H_{6}+7\,O_{2}\rightarrow 4\,CO_{2}+6\,H_{2}O}$

Ethan forméiert mat Chlor a mat Brom duerch Substitutioun nei Produkten. Déi wichtegst sinn déi chloréiert Substitutiounsprodukten wéi de Monochlorethan, den Dichlorethan, den Trichlorethan, den Tetrachlorethan, de Pentachlorethan a den Hexachlorethan.

$\mathrm {C_{2}H_{6}+X_{2}\rightarrow C_{2}H_{5}X+HX}$

• X = Cl, Br

Produktioun vum Ethan

Am Laboratoire:

Ethan kann een duerch Elektrolys vun enger konzentréierter Natriumacetat-Léisung hirstellen. Dobäi entsteet un der Kathod Waasserstoff an un der Anod Ethan a Kuelendioxid.

Eng aner Méiglechkeet ass d’Wurtz-Reaktioun. Mat Monochloromethan a Natrium léisst sech Ethan gutt hierstellen.

$\mathrm {2\,CH_{3}Cl+Na\rightarrow C_{2}H_{6}+HCl}$

Eng drëtt Method besteet doran, Natriumpropanoat mat Natriumhydroxid ze hëtzen.

An der Industrie: Aus Äerdgas kann een Ethan industriell hirstellen. Aner Methode sinn d’Pëtrolhydréierung an d’Kuelenhydréierung.

Uwendung

An der chemescher Industrie gëtt Ethan benotzt fir Ethen hirzestellen. Eng Method dofir ass de Cracking. Bei 500 °C bis 1000 °C gëtt den Ethan an Ethen a Waasserstoff ëmgewandelt.

Literatur

• Éditions A. De Boeck, Bruxelles, 1979, Chimie organique, A. Dessart - J. Jodogne - J. Paul

Um Spaweck

Commons: Ethane – Biller, Videoen oder Audiodateien

• http://www.seilnacht.com/Chemie/ch_ethan.htm
• http://webbook.nist.gov/cgi/cbook.cgi?Name=ethane&Units=SI [28.02.2012]