ہریجن (اخبار)

ہریجن (دیوناگری: हरिजन؛ ترجمہ: "ہری/وشنو کی اولاد") ایک اصطلاح تھی جسے تحریک آزادی ہند کے رہنما موہن داس گاندھی نے سماج کے ان لوگوں کے لیے رائج کیا جنہیں روایتی طور پر صدیوں سے چھونے کے قابل نہیں سمجھا جاتا تھا (جسے عام طور پر "اچھوت" کہتے ہیں)۔ لیکن بعد میں اس لفظ کو ناپسندیدہ اور توہین آمیز سمجھا جانے لگا، لہذا اب لفظ ہریجن ان طبقوں کے لوگوں کے لیے استعمال نہیں کیا جا سکتا جو قرون وسطی اور جدید بھارت میں پسماندہ ہیں۔ بلکہ انھیں اب دلت کہا جاتا ہے۔ دوسری جانب کیرالا میں ہریجن اور دلت دونوں الفاظ پر پابندی لگا دی گئی ہے۔ ہریجن لفظ کو کئی لوگوں نے ایک حساس لفظ، اور کچھ دلت کارکنوں نے اسے ذلت آمیز سمجھا ہے۔ نتیجتاً حکومت ہند اور متعدد ریاستی حکومتیں سرکاری مقاصد کے لیے اس لفظ کے استعمال کو ممنوع سمجھتی ہیں۔ اگرچہ گاندھی جی نے ہریجن کی اصطلاح کو رائج کیا، جس کے لفظی معنیٰ خدا کا بیٹا تھے لیکن بعضوں نے اس بات کا اظہار کیا کہ کچھ مذہبی کتابوں کے مطابق برہمنوں کو خدا کا فرزند کہتے ہیں۔ ممکن ہے کہ گاندھی کو پسماندہ طبقوں کے لیے اس اصطلاح کے استعمال کا مشورہ گجراتی زبان کے بھکتی دور کے شاعر نرسی مہتا کے کاموں کی بنیاد پر دیا گیا ہو۔ یہ دعوی کیا گیا ہے کہ نرسی کے کام میں اس اصطلاح سے دیوداسیوں کے بچے مراد ہیں، لیکن اس دعوی کی تصدیق نہیں ہو سکی۔ دوسرے ذرائع کے مطابق قرون وسطی کے مذہبی شاعر گنگاستی نے بھکتی تحریک کے دوران میں خود کا حوالہ دیتے ہوئے اس لفظ کا استعمال کیا، بھارت میں ایک ایسی مدت گذری ہے جس نے ذات کی مشروعیت کو چیلنج کرتے ہوئے خواتین کو بلند تر مقام اور آواز دی تھی۔ گنگاستی 12ویں سے 14ویں صدی عیسوی کے درمیان میں گذرے ہیں وہ گجراتی زبان میں لکھا کرتے تھے۔

ہریجن، موہن داس گاندھی کا اخبار

گاندھی جی نے برطانوی راج کے دوران میں 11 فروری 1933ء کو یرودا جیل سے "ہریجن" کے نا سے ایک ہفتہ وار اخبار شائع کرنا شروع کیا۔ انھوں نے اسے تین زبانوں میں کیا: انگریزی میں ہریجن (1933 سے 1948)، گجراتی میں ہریجن بندو اور ہندی میں ہریجن سیوک۔ ان اخباروں میں گاندھی جی نے اپنے پچھلے اخبار ینگ انڈیا (1919ء سے 1932ء) کے مقابلہ میں سماجی اور اقتصادی مسائل پر زیادہ توجہ مرکوز کی تھی۔