王進喜
| 王進喜 | |
|---|---|
 王進喜嘅相，出自《人民畫報》1966年第7期 | |
| 出世 | 1923年10月8號 中華民國甘肅省玉門縣赤金堡 |
| 死 | 1970年11月15號（47歲） 中國北京市 |
| 國籍 | 中國 |
| 職業 | 石油工人 |
| 出名原因 | 跳個身入泥漿池去攪拌泥漿來壓住井噴 |
王進喜（粵拼：wong4 zeon3 hei2；1923年10月8號—1970年11月15號），甘肅人。佢係中華人民共和國第一代石油鑽井工人，做過司鑽、隊長等。1959年9月，佢評爲全國勞動模範。佢出名在於喺發掘大慶油田時好搏命，對個身入啲泥漿池度攪起泥漿來壓住井噴，畀啲人稱讚做「鐵人」，之後佢畀中共搦去宣傳，變成「鐵人精神」嘅形象代表。而家喺大慶設有王進喜紀念館，同時喺薩爾圖有條街道起名做鐵人街道來紀念佢。
生平
[編輯]王進喜喺1923年10月8號出世喺甘肅玉門赤金區巷口子村一家窮人屋企[1]，祖籍陝西渭南大荔，乳名「十斤娃」。佢細個時好窮，乞過食、放過牛，14歲時去玉門油礦做工人[1]。1950年佢成爲中華人民共和國第一代鑽井工人，1956年4月入中國共產黨。1958年9月，佢帶嘅鑽井隊創咗當時月鑽井進尺五公里嘅全國最高記錄，獲得「鋼鐵鑽井隊」稱號[2]。1959年9月評爲全國勞動模範。
1960年3月，王進喜帶住佢下面嘅1205鑽井隊從玉門去大慶，參加大慶石油會戰[3]，靠人力來搬、裝鑽機，亦靠人手搬水開鑽。其中佢畀中共攞去宣傳嘅事蹟就係佢跳入泥漿池度攪起泥漿來制住井噴，稱佢做「鐵人」。當年4月11號、4月29號，會戰指揮部開過兩次會話向佢學習。之後佢做過1205鑽井隊隊長、鑽井指揮部裝建大隊、鑽井二大隊大隊長、鑽井指揮部副指揮、大慶革委會副主任、中共大慶核心小組副組長等職務。1964年12月出席第三屆全國人大。1969年4月，出席中共九大，選爲中央委員，畀毛澤東、周恩來接見[4]。1970年11月15號，因爲胃癌喺北京301醫院過身[1]，時年47歲。
評價同質疑
[編輯]1989年，佢同雷鋒、焦裕祿、史來賀、錢學森一齊畀中央組織部評爲「享有崇高威望嘅共產黨員優秀代表」。2002年，新華社《半月談》評選嘅「百年中國十大人物」入面有佢嘅名。2012年入選「100位新中國成立以來感動中國人物」[1]。
有啲人質疑王進喜嘅事蹟，認爲係中共爲咗攞個典型去做宣傳而作出來，至少宣傳當中嘅事蹟有好高水份[1][5]。而當年佢身邊嘅戰友都承認，攞去做宣傳嘅相，有好多係補影嘅，因爲真係做嘢當時，無相機跟住，留得嘅相好少[5]。喺「工業學大慶」嘅宣傳運動之後，王進喜嘅事蹟除咗有新聞宣傳，文藝載體亦有，比如流傳一時嘅「石油工人一聲吼，地球也要抖三抖。石油工人幹勁大，天大的困難也不怕。寧可少活二十年，拼命也要拿下大油田。」就話係王進喜作嘅詩。有人質疑，王進喜唔識字，點會去寫詩[1]？有人認爲跳入泥凼度用個身攪拌泥漿嘅事係有，不過嗰個人係個技術人員，後來爲咗「樹典型」、唔想畀人知嗰個係「知識份子臭老九」，就講成係王進喜嘅事[5]。不過佢當年嘅戰友反駁事蹟造假嘅講法，佢哋話呢啲奇蹟係真事，鐵人事蹟係真嘅 ，佢嗰啲詩係佢口講再畀識字嘅人潤色下再發表嘅[1]。
軼事
[編輯]當年王進喜嘅事喺全國宣傳，結果有張佢喺大慶油田影嘅相洩咗密。當年大慶油田嘅開發係國家保密嘅，外界唔知個油田係點嘅。1964年，《中國畫報》頭版刊出王進喜一張相，張相度佢戴住狗皮帽，着住厚衫，揸住鑽機柄望前面，背景係啲井架。日本嘅情報專家分析張相：從王進喜嘅衣着推計出所在緯度，從而推斷大慶油田喺哈爾濱同齊齊哈爾之間；從鑽機柄推斷出油井直徑；從佢背景井架密度推計出油田儲量、產量。於是日本嗰邊設計出啱用嘅石油設備，當中國向國際徵求油田設計方案時，日本方案一下子中標[6]。
睇埋
[編輯]攷
[編輯]- ↑ 1.0 1.1 1.2 1.3 1.4 1.5 1.6 〈大躍進：鐵人王進喜的事蹟都是真的？〉。多維新聞。2013年3月2號。原著喺2016年3月5號歸檔。喺2014年10月23號搵到。
- ↑ 馬祥林 (2001年6月18號)。〈王進喜 石油工人一聲吼〉。《北京青年報》。人民網。原著喺2010年9月9號歸檔。喺2014年10月23號搵到。
- ↑ 〈王進喜：新中國石油戰綫的鐵人〉。中國共產黨新聞網。2009年6月23號。喺2014年10月23號搵到。
- ↑ 〈王進喜：寧可少活二十年，拼命也要拿下大油田〉。中國共產黨新聞網。喺2014年10月23號搵到。
- ↑ 5.0 5.1 5.2 〈王進喜：鐵人的事蹟都是真的？〉。360DOC個人圖書館。2011年2月9號。原著喺2013年11月8號歸檔。喺2014年10月23號搵到。
- ↑ 〈揭秘：鐵人王進喜照片泄露大慶油田機密〉。《新華網》。東方網歷史頻道。2013年11月15號。原著喺2013年11月18號歸檔。喺2014年10月23號搵到。
連出去
[編輯]
- 〈王進喜專題〉。中國共產黨新聞網。