閑院宮載仁親王

閑院宮載仁親王

閑院宮載仁親王（日文：かんいんのみや ことひとしんのう，1865年11月10號—1945年5月20號），係閑院宮第六代當主，邦家親王第十六個仔、孝仁親王契仔，同時係陸軍軍人，最高官位係陸軍元帥大將大勳位功一級。佢係親王宣下嘅日本皇室成員之中最長命個嗰。

經歷

早年

1865年，載仁親王響山城國出世，老豆係邦家親王，阿媽係女房伊丹吉子，個時佢叫易宮。

1868年，佢出家到真言宗醍醐派總本山三寶院，之後受到明治維新嘅影響，響三年之後返嚟皇室。第二年閑院宮第五代當主愛仁親王早死，冇仔女，呢個時候易宮巧遇孝仁親王妃吉子，所以孝仁親王同埋吉子就認咗易宮做佢契仔。

載仁親王同老婆智惠子

1877年，佢就讀陸軍士官學校，第二年就親王宣下，成為明治天皇猶子，改名叫載仁。1883年，佢到法國留學，先後就讀聖西爾軍校、聖西爾騎兵學校同埋聖西爾陸軍大學，1891年返日本當兵。同年12月，佢同前首相三條實美個女智惠子結婚。

軍人生涯

響中日戰爭入面，載仁冒住畀人用槍射死嘅風險，成功完成任務，得到上頭嘅讀賞，所以佢響1901年升為陸軍少將，同時就做騎兵第2旅團長。之後佢又參加日俄戰爭，其中本身日本打輸咗，想走，而載仁親王叫日軍改用機關槍再打過，俄方響未準備好嘅情況底下好快就輸咗呢場仗，結果日軍反敗為勝。1912年升做大將。

1919年，佢畀人納入元帥府，銜頭升做陸軍元帥大將，係日本歷嚟最後生嘅陸軍元帥大將。1921年，佢陪住皇太子裕仁親王到歐洲旅行。1923年，響小田原嘅閑院宮宮邸因為關東大地震而冇咗，好彩最後戴仁就走得返出嚟，佢冇事，不過佢嘅四女寬子女王就因為走唔切而死咗。

1931年，戴仁出任參謀總長。