高沛

高沛
劉璋 將領
死	212年
活躍時期	212年
遞啲名

高沛（粵拼：gou1 pui3；？—212年），係三國時服務於領主劉璋帳下嘅將領。劉備入川時，高沛同楊懷交付嘅任務係守住關頭（有講法話係白水關）。佢哋送信畀劉璋，勸佢將劉備趕返去荊州，但另一方面佢哋又服劉備嘅英名。

建安十七年（212年），由於劉璋請劉備北伐張魯，於是劉備喺葭萌駐軍。劉備喺討伐張魯時收攬到人心，於是準備平定益州。龐統同佢出計話，若果話畀高沛、楊懷聽荊州要救急，佢要返荊州，佢兩個會開心到以爲劉備要走，自然會無防備來見佢，噉呢陣時就可以捉咗佢兩個，繼而進軍益州。呢條計係中計，劉備喺三條計中採納咗呢條。結果真係似龐統講嘅噉，劉備捉咗佢兩個後就殺咗佢哋，然後就佔領益州。

喺《三國演義》

《三國演義》中，高沛出現喺第61回，喺第62回《取涪關楊高授首 攻雒城黃魏爭功》係正式人物。當中，劉璋派白水都督楊懷同高沛守涪水關，而佢自己返成都。當劉備有咗啲起事動態，高沛、楊懷聽到之後，就留低高沛喺度，而楊懷跟住使者入成都，去見劉璋同佢講呢回事。

之後劉璋聽從，繼續派楊懷、高沛守住個關頭。劉備軍師龐統出咗三條計中嘅中計，話帶兵返涪水關，假意話返荊州，關頭守將楊懷、高沛必定出來迎接，捉住佢哋殺咗，劫奪關口，然後進兵入成都。

之後劉備引軍去涪水關，派人入去報畀涪水關守將高沛、楊懷知，要佢哋出關相別。二將聽報，佢兩個共同諗定謀殺主公劉備。劉備同龐統講緊楊懷、高沛時，突然一陣旋風颳起，吹冧咗帥字旗。龐統認定呢個係凶報，話楊懷、高沛有意想攪事。

高沛、楊懷各人帶一支匕首喺身，引軍二百，帶埋酒同羊，直行去劉備軍寨，睇佢無咩防備，心度暗喜，以爲佢哋陰謀大成。但係劉備暗中安排劉封、關平喺帳後，喺高沛、楊懷退走二百軍兵後，由佢哋生擒。高楊二將反抗，但已經畀劉封、關平捉住，於是佢哋嘅行刺失敗咗。

龐統差遣左右搜呢兩個人身，果然兩人都收埋一支好利嘅匕首。劉備聽龐統話，立即派人攞刀斧喺帳前就地處決佢哋，然後同高楊帶來嘅隨從解釋話楊懷、高沛離間佢哋兄弟親情，又攞利刃行刺佢，所以佢哋抵殺。

參攷資料

• 陳壽（著）；裴松之（注）。〈蜀書：龐統法正傳 — 龐統傳〉. 《《三國志》》。｢璋既還成都，先主當為璋北征漢中，統復說曰：『陰選精兵，晝夜兼道，徑襲成都；璋既不武，又素無預備，大軍卒至，一舉便定，此上計也。楊懷、高沛，璋之名將，各仗強兵，據守關頭，聞數有箋諫璋，使發遣將軍還荊州。將軍未至，遣與相聞，說荊州有急，欲還救之，並使裝束，外作歸形；此二子既服將軍英名，又喜將軍之去，計必乘輕騎來見，將軍因此執之，進取其兵，乃向成都，此中計也。退還白帝，連引荊州，徐還圖之，此下計也。若沈吟不去，將致大因，不可久矣。』先主然其中計，即斬懷、沛，還向成都，所過輒克。｣