Alice van Romondt

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Alice van Romondt
Imagen desea: Alice van Romondt
Informacion basico
Nacemento	2 desèmber 1949
Informacion profesional
Ofishi	eskritor
[Edita Wikidata] · [Manual]

Mural 'Miss Alice" (2017) na San Nicolas, di e muralista Portugues Odeith.

Alice C. van Romondt (☆ 2 di december 1949 na Aruba) ta un bibliotecario, escritor y promotor di cultura Arubano.

Biografia

Alice van Romondt a nace como prome yiu di Alice de Veer y Pete van Romondt, kende tabata manager di Hotel Nassau den centro di Playa. El a lanta den Oranjestad cu su ruman homber y ruman muhe. E tabata alumno di Mon Plaisir College y MIL na Corsou. El a studia M.O. Hulandes A na Universidad di Amsterdam y a gradua den estudio di biblioteca y documentacion na Frederick Muller Academie na 1972. E mesun aña Van Romondt ta cuminsa su carera na biblioteca di Corsou como hefe di servicio externo, encarga cu e biblioteca escolar. Na 1978 e ta muda pa Aruba, unda e ta drenta servicio di Biblioteca Nacional Aruba (BNA), di cual e tabata director desde 1 di october 1979.

Van Romondt a dedica su mes na preserva e patrimonio cultural di Aruba pa futuro generacionnan. E tabata encarga cu e construccion di diferente biblioteca y e desaroyo di cuido di monumentonan riba e islanan como un manera pa conserva y uni diferente forma di arte. Cu e meta pa stimula autornan Arubano e tabata co-fundado, hunto cu Miep Diekmann y Liesbeth van Houten di Editorial Leopold, di e editorial Arubano Charuba na comienso di añanan 1980. El a fungi tambe como su presidente.

Di 1994 te 2001 Van Romondt tabata secretario di conseho di minister di Aruba bou di gabinete Henny Eman II y III. Tambe el a fungi como consehero di minister Michelle Hooyboer-Winklaar, kende tabatin e cartera di cultura den gabinete Mike Eman I y enseñansa den gabinete Mike Eman II. Na nomber di minister Hooyboer-Winklaar el a firma pa e lantamento oficial di Fundacion Museo Arubano na 2013.

Van Romondt tabata representante di e seccion Arubano y vice-presidente di Prins Bernhard Cultuurfonds Caribisch Gebied (PBCCG) y a inicia y realisa proyectonan di interes y a hunga un ròl di conexion den esaki. Actualmente e ta un miembro honorario di PBCCG. Dia 30 di mei 2018 el a ricibi e Zilveren Anjer di 'Het Cultuurfonds' (antes Prins Bernhard Cultuurfonds di Hulanda) pa su contribucion special na promocion di cultura, literatura y arte na e isla di Aruba. E tabata e di tres Arubano y e prome dama pa wordo distingui despues di Jan H. Beaujon, presidente di Cas di Cultura (1958) y Padu Lampe, tata di cultura (1986).

Rebecca Roos a traha e documentario I can't be moe (2024) tocante su persona y den esaki e ta duna un imágen di e industria creativo di Aruba y e resto di Caribe Hulandes.

Alice van Romondt ta casa y ta mama di un yu muhe.

Bibliografia

El a publiká algun buki tokante e relashon entre Hulanda, Surnam y Antias Hulandes (incluyendo Aruba).

• Met Vlag en Rimpel (2003)
• Gedenkboek 50 Jaar Statuut (2004)
• Liber amicorum pa mr. Olindo Koolman : gouverneur van Aruba, 1992-2004 (2005)

Fuente, nota i/òf referensia