Bistritsa

Bistritsa
Bistrița Beszterce Bistritz
Bayraq Gerb
47°08′ şm. e. 24°29′ ş. u.
Ölkə	Rumıniya
Tarixi və coğrafiyası
Əsası qoyulub	16 iyun 1264
Sahəsi	145,47 ± 0,01 km²
Mərkəzin hündürlüyü	356 m
Saat qurşağı	UTC+02:00 UTC+03:00
Əhalisi
Əhalisi	78.877 nəf. (1 dekabr 2021)
Rəqəmsal identifikatorlar
Poçt indeksi	420008–420198
Digər
primariabistrita.ro
Bistritsa
Vikianbarda əlaqəli mediafayllar

Bistritsa (rum. Bistrița) - Rumıniyanın şimalında şəhər. Bistritsa-Neseud judetinin inzibati mərkəzi. 2012-ci ilin məlumatına əsasən şəhərin 70 mindən çox əhalisi var.

Şərqi Karpatın dağarası çuxurunda, Bistritsa çayının (Someş hövzəsi) sahilindədir. 12 əsrdə Transilvaniyanın şimalında Macarıstan kralı II Geza tərəfindən salınmış, Almaniyadan gəlmələrlə məskunlaşmışdır. İlk dəfə şəhər kimi 1264-cü ildə qeyd olunur. 13 əsrdən Bistritsaya macarların axını güclənmişdir. 1241–1242-ci illərdə monqollar tərəfindən dağıdılmışdır. 1353-cü ildə macar kralı Böyük Layoş şəhərə yarmarka keçirmək hüququ vermişdir.

Orta əsrlərdə Bistritsa sənətkarlıq, həmçinin macar torpaqlarından Dunay knyazlıqlarına gedən yolda ticarət mərkəzi olmuşdur. 1465–1515-cü illərdə planlı şəkildə tikilən şəhər ikicərgəli qala divarı ilə əhatə olunmuşdur. Orta əsr yaşayış tikililərindən bir hissə, o cümlədən Gümüş ustasının evi və Prixod evi saxlanılmışdır. Fransiskçilər monastırının pravoslav kilsəsi, barokko üslubunda katolik kilsəsi və rəssamlıq məktəbi var. Xalq yaradıcılığı və ənənələri mərkəzidir. Ağac emalı, mebel sənayesi müəssisələri fəaliyyət göstərir, süd məhsulları, şüşə məmulatlar, tikinti materialları istehsal olunur.

Mənbə

• Azərbaycan Milli Ensiklopediyası (25 cilddə). 4-cü cild: Bəzirxana – Brünel (25 000 nüs.). Bakı: "Azərbaycan Milli Ensiklopediyası" Elmi Mərkəzi. 2013. səh. 148. ISBN 978-9952-441-03-1.