Cecropis daurica

Cecropis daurica; andarina arroxada
Estáu de caltenimientu
	; Esmolición menor (IUCN)
Clasificación científica
Reinu:	Animalia
Filu:	Chordata
Clas:	Aves
Orde:	Passeriformes
Familia:	Hirundinidae
Xéneru:	Cecropis
Especie:	C. daurica; (Linnaeus, 1771)
Distribución
Sinonimia
	Hirundo daurica
Consultes
	[editar datos en Wikidata]

Les especies d'aves con nome común en llingua asturiana márquense como ^NOA. En casu contrariu, conséñase'l nome científicu. L'andarina arroxada^[1] (Cecropis daurica), pa otros autores Hirundo daurica, ye un pequeñu páxaru de la familia de les andarines. Habita nos países de clima templáu del sur d'Europa y Asia, dende la Península Ibérica nel oeste hasta Xapón nel este, aportando al África tropical pel sur. Los exemplares indios y africanos son residentes, pero les andarines europees y de delles zones asiátiques son migratories, envernando n'África y na India.

Les andarines arroxaes son asemeyaes en costumes y aspeutu a otres especies de la familia Hirundinidae. Les partes cimeres de la tiesta, envés y ales son d'un color azul bien escuru. El so pechu y banduyu ye castañu roxu con pequeñes y numberosos llixos escuros; el obispillu suel tener un color asemeyáu al del banduyu. Tien una cola bien llarga y bien aforcada, de color negru uniforme, tanto penriba como pembaxo. Les sos ales son anches y apuntiaes. Son voladores rápides y aliméntense d'inseutos.

Ye paecida a l'andarina, pero estrémase porque ye más escura y el mancha colorada del gargüelu ye munchu más claru y estendíu, presentando tamién una zona amarellentada na nacencia de la cola. Amás les plumes de la cola son claramente más anches.

Les andarines arroxaes constrúin ñeros con forma de media esfera con folla que recueyen colos sos picos, y guaren ente 3 y 6 güevos en cada puesta, de mayu a xunu. De normal añeren en zones de pedreros y altos, pero afáense con facilidá a les construcciones humanes (pontes o edificios). El nial recuerda al de l'andarina apegona (Delichon urbicum) na so forma y material, pero cunta con una entrada tubular de la qu'escarez el nial d'esti postreru.

De normal esta especie nun forma grandes colonies de cría, pero son bastante gregaries fuera de la dómina d'apareamientu. Les bandaes más numberoses pueden reparase nes estenses llanures de la India. Na Península Ibérica ye braniza de marzu a setiembre. Ye una especie n'espansión, más abondosa na metá sur.

Les dimensiones d'esta andarina son asemeyaes a les de l'andarina (Hirundo rustica), tien un valumbu alar d'unos 33 cm y el llargor del so cuerpu ye d'alredor de 17 cm.

Enllaces esternos

Referencies

↑ URL de la referencia: http://www.sabencia.net/nomenclator.php.

Ficha de la especie (PDF), por Javier Blasco-Zumeta

[25371c05886d508f0bd3b89319c1e188ec3c8883-1] URL de la referencia: http://www.sabencia.net/nomenclator.php.

[1]