Cogoma

Quest articol chì l'è scrivud in lombard, con la Noeuva Ortografia Lombarda

La cogoma (cuccumella in napolitan, IPA [kukkuˈmɛllə]) a l'è una cafetera che la se dopera in sul fornell, inventada in Franza ma tipega de Napoli. A diferenza de la pussee famosa moka la dopera no la forza del mes'ciozz aqua colda/vapor in pression per tirà foeura el cafè ma domà la forza de gravità, desgià che la gh'ha de vesser sgirada de l'utent quand che l'aqua l'è colda, la da foeura donca un cafè filter, pussee compagn a 'n cafè american che a 'n cafè espress italian, e l'è malfà doperà 'n cafè masnad per l'espress o per la moka.

Storia

A l'è stada inventada del franzes Morize in del 1819 e, se cunta su, che la sibia stada ciamada "napolitana" perchè l'era inamorad de 'na tosa de la capital di Do Sicilie, e la s'è spantegada in Italia, soratut in la Bassitalia, per fà el cafè in cà, ma l'è stada poeu sopiantada de la Moka dopo de la segonda guerra mondial, foeura che per la zona de Napoli indova che l'è tradizzion doperàlla.

A bon cunt, a l'è probabel che la sibia stada sì inventada in Franza, ma perfezzionada in di materiai in Bassitalia, indova che l'havaria ciapad el nom.

Costruzzion

La cogoma a l'è de solet fada de alumini, ma ghe n'è anca de azzal per doperài in sui piastre a induzzion. A l'è partida in trè part: vuna che ghe va dent l'aqua e che l'è quella che la va in sul foeugh, una sezzion de filter indova che se met el cafè e una sezzion indova che ghe riva dent el cafè fad, che 'l po vesser mitud in la tazzina grazzia al bechet integrad.

Fonzionament

Per fà un cafè con la cogoma se impieniss de aqua la part de bass, se met el cafè masnad, senza schisciàll, in del filter, e se monta el contenidor per el cafè e se met poeu tut in sul foeugh. Quand che poeu l'aqua la bujiss, la se ciapa di manegh e la se sgira, inscì de permeter a l'aqua de percolà a travers de cafè e fà la bevanda e quand che la procedura l'è finida, e ghe poden vorè anca 5 o 10 menut a segonda de la quantità de aqua e del tipo de cafè, se versa.

El cafè el gh'ha de vesser masnad pussee gross rispet a quell per la moka o l'espress, desgià che la filtrazzion a gravità la gh'ha de besogn de 'na grana pussee grossa per fà del cafè bon, ma de solet se masna un zich pussee fin che per el cafè filter american, inscì de havégh un savor pussee fort. Per i raport, a inn consejad i midem che se doperen per el classegh cafè filter, cioè aqua a 92-96° e 60 gram de cafè per liter.

Per la tradizzion napolitana, se dopera una miscela de cafè aposta e tostada ben benon, e se met un chignoeul de carta in sul bechet, inscì de lassà no andà via l'aroma, ciamad Cuppetiello.

Nom

El nom napolitan, cuccumella, a l'è 'n diminutiv de cuccuma, che 'l vegn del latin cucuma, o ben pairoeul. El termen lombard el vegn de la midem origin e, in veneto e in d'un quaj dialet de l'Emilia l'indica propi la cafetera in sgeneral.

Riferiment

Alter proget

Wikimedia Commons el gh'ha dent imagin o alter archivi su Cogoma