Cvetana Pironkova
|
C'l artìcul chè 'l è scrit in
Miranduléś |
La Cvetana Pironkova-Kirilova (Plovdiv, 13 ad Setémbar dal 1987, a sa scriv Цветана Пиронкова-Кирилова in bùlgar) l'è na tenìsta bùlgara, prufesiunìsta da 'l 2002. L'è élta 180 cm e la péśa 65 chilo. La dróa al bras dèstar e la tira 'l arvèrs a dū maṅ.
La śóga bèṅ dimóndi in sl'èrba in dua l'è rivàda in semifinàl a Wimbledon in dal 2010.
In dla sò caréra l'è rivàda a èsar la nùmar trént'òṅ dal mónd al 13 ad Setémbar dal 2010 e l'à vins siē tìtui ITF, 'l ùltim in qvél da sènt-mila dòlar ad Bordeaux cóntar la nisàrda Alizé Cornet, e 'n tìtul Premier WTA a Sydney cóntar l'Angelique Kerber in dal Śnar dal 2014.
Caréra
La taca la sò caréra in dal mónd dal tènis in dal 2002 in dua la śóga dū finàli ITF vinsénd-an una cóntar la Monica Niculescu ma 'l an dòp la fà incóra méj parchè la s in mét in bisàca tri.
La bùlgara la śóga al sò prim turnèo WTA in dal 2005 a Ìstanbul. Dòp avér fat al qualificasiòṅ, la céd giùst in semifinàl a la Venus Williams par 1-6 3-6. In Luj la gh'à di punt asâ par tōr part a 'l turnèo ad Palèrum. Chè la fà fóra subìt la nùmar òṅ dal tablòṅ, la Silvia Farina Elia, par 7-6 2-0 bandòṅ e pò anc l'Anna Smashnova e la Nathalie Vierin ma pò la s férma in semifinàl cun l'Anabel Medina Garrigues. La sèra 'l an a la puśisiòṅ utànt'òt.
In dal 2006 la vèra 'l an mandànd a cà subìt la Venus Williams da gl'Australian Open, 2-6 6-0 9-7 al puntéǵ, anc se pò l'è lē a far al valìś al tùran dòp. A Miami la pasa 'l qualificasiòṅ baténd na śóvna Viktoryja Azaranka in tri sét ma pò la s férma lè. In sl'èrba ad Birmingham la pèrd in di utàṿ da la Francesca Schiavone par 6-3 3-6 1-6 mént'r a Wimbledon l'incróśa in dal secónd tùran l'Agnieszka Radwańska, in alóra nùmar 217 dal mónd, e la gh pèrd par 5-7 6-7. In Agóst la bat in di quàrt la Na Li a Stucólma ma pò cun la Jie Zheng la và a cà in dū sét. In Utóbar la mùcia sù dū scunfìti cun la Jelena Janković a Stucàrda (utàṿ) e a Śurîg (prim tùran).
La taca mâl al 2007 pardénd subìt a Melbourne da l'Akiko Morigami par 5-7 6-2 4-6 e la cuntìnua acsè anc a Doha, Indian Wells, Miami, Bùdapest, Varsàvia e Praga in dua l'è bòna ad bàtar sōl la Stéphanie Foretz Gacon pardénd invéci cun la Francesca Schiavone, cun la Marion Bartoli, cun la Kaia Kanepi, cun la Gisela Dulko, cun l'Agnieszka Radwańska e cun la Julia Schruff. In Agóst, baténd la Stéphanie Cohen-Aloro in tri sét, la riva in semifinàl a Stucólma ma incóra na vòlta la pèrd da l'Agnieszka Radwańska par 4-6 3-6. Dòp un secónd tùran a gl'US Open (4-6 0-6 da la Justine Henin), la s mét in dal bisachèṅ 'l ITF ad Bordeaux cóntar la padròna ad cà, l'Alizé Cornet.
In dal 2008 la s fà nutàr a Róma in dua, parténd da 'l qualificasiòṅ, la mét in riga la Klára Zakopalová 6-4 6-2, l'Ana Ivanović 6-4 5-7 6-2 e la Viktoryja Azaranka 6-2 1-0 bandòṅ. In di quàrt la pèrd però in tri sét da l'Anna Čakvetadze acsè cum a sucéd anc a Ìstanbul cun l'Agnieszka Radwańska ch'la vins sèg in semifinàl par 7-6 3-6 6-1. A New Haven la bat la carta salvàdga Bethanie Mattek-Sands par 7-6 0-6 6-0 ma pò la pèrd da la Marion Bartoli, nùmar trédas dal mónd. In Setémbar la tōś part a 'n ITF a cà sua a Sòfia ma la 'l pèrd in finàl cun la Nuria Llagostera Vives.
In dal 2009 la partìs cun gl'utàṿ a Brisbane (7-6 5-7 3-6 da la Sara Errani) e c'n i quàrt a Hobart (4-6 1-6 da la Virginie Razzano) ma a gl'Australian Open la pèrd incóra na vòlta da la Marion Bartoli a 'l secónd tùran. In Primavéra la mét in fila tri prim tùran a Miami (3-6 7-5 3-6 da la Francesca Schiavone), a Marbella (7-6 2-6 4-6 da la Roberta Vinci) e a Barcelóna (1-6 6-3 0-6 da la Lucie Šafářová). A Stucàrda la pèrd da la sò bistiàsa négra, l'Agnieszka Radwańska, e pò la 'l fà cun tuti, tacànd da la Flavia Pennetta a Róma, la prima ad déś scunfìti a 'l prim tùran. Quànd pò la śóga 'l qualificasiòṅ, cuma a Eastbourne, a New Haven e a Linz, la n è bòna gnanc ad pasàr-i. Giùst a Mósca la cumbìna quèl, rivànd in di quàrt vinsénd cun l'Anastasija Pavljučenkova e cun la Vera Zvonarëva.
'L inìsi dal 2010 par la bùlgara al sà da pôc parchè in fiṅ a Maǵ la n è bòna ad pasàr mai a 'l secónd tùran. A Varsàvia la riva in di quàrt par via ad dū partìdi vinti cun l'Aleksandra Wozniak e cun l'Elena Dement'eva ma pò la s férma cun la ruména Alexandra Dulgheru par 4-6 5-7. In Istâ la śóga al turnèo dla vita a Wimbledon. La Pironkova la riva fàcil in semifinàl sénsa mai pèrd'r un sét, dand anc la paga a la Marion Bartoli par 6-4 6-4 e a la Venus Williams par 6-2 6-3. Cun la Vera Zvonarëva la vins al prim sét ma pò la s férma lè, cun la rusa ch'la gh'à la méj sèg par 3-6 6-3 6-2. A 'ndàr a la fiṅ d'l an però la mùcia sù sōl di prim e di secónd tùran.
Diśàstar cumplét par lē in dal 2011. La bùlgara la vins sōl quàt'r incóntar in siē méś pardénd-an invéci quatórdas cun la Shuai Peng, la Monica Niculescu, la Barbora Záhlavová-Strýcová, la Svetlana Kuznecova, l'Alizé Cornet, la Lourdes Domínguez Lino, la Dinara Safina, la Marion Bartoli, l'Alberta Brianti, l'Ágnes Szávay, la Daniela Hantuchová, la Francesca Schiavone, la Gisela Dulko e la Serena Williams. A Wimbledon però la tórna a far la vóś grôsa baténd la Camila Giorgi 6-2 6-1, la Petra Martić 6-1 6-4, la Vera Zvonarëva 6-2 6-3 e la Venus Williams 6-2 6-3. Sōl la Petra Kvitová, e sudànd dimóndi, la la bat in tri sét in di quàrt. Dòp 'n àtar quàrt a Palèrum (2-6 2-6 da la Flavia Pennetta), la tórna a pasàr i prim tùran a fadìga, muciànd sù dal scunfìti cun la Christina McHale, cun la Monica Niculescu, cun la Shuai Peng, cun la Vera Zvonarëva, cun la Samantha Stosur e cun la Svetlana Kuznecova.
In dal Śnar dal 2012 la pèrd a 'l secónd tùran a Hobart cun n'Anna Čakvetadze, in cal méntar crudàda śò a 'l 234śum pòst. A gl'Australian Open e a Parì a 'l quèrt la n fà minga méj, bcand-as un 4-6 4-6 da la Galina Voskoboeva e un 0-6 3-6 da la Klára Zakopalová. A Doha la bat la Polona Hercog par 6-0 6-4 e l'Angelique Kerber par 6-4 6-1 ma in di utàṿ la céd a la Marion Bartoli par 3-6 3-6. A Miami, dòp avér pigâ la Petra Martić, la và a cà cun la Roberta Vinci par 5-7 1-6. Dòp quàtar prim tùran, a Bruxelles la gh'à la méj cun l'Eleni Daniilidou e cun la Nadia Petrova ma minga cun la Kaia Kanepi in di quàrt. A 'l Roland Garros la pèrd a 'l secónd tùran da la Francesca Schiavone in tri sét. In Śugn la taca la stagiòṅ in sl'èrba baténd fàcil l'Agnieszka Radwańska par 6-2 6-4 e pò anc la Stéphanie Dubois par 6-0 4-6 6-4. In di quàrt la cata però 'l us sarâ cun la Tamira Paszek. A Wimbledon la pòrta la Marija Šarapova a 'l tèrs ma da piò la n pōl briśa far e la fà 'l valìś a 'l secónd tùran. A gl'US Open la s insfìlsa in di utàṿ baténd la Camila Giorgi, l'Ayumi Morita e la Silvia Soler Espinosa par pò farmàr-as cun l'Ana Ivanović c'n al puntéǵ ad 0-6 4-6. A la fiṅ d'l an la tōś part a 'l Master "B" ad Sòfia cun na carta salvàdga in bisàca e la vèṅ batùda in semifinàl da la Caroline Wozniacki par 4-6 1-6.
In dal prim turnèo dal 2013, a Hobart, la Cvetana la pasa dū tùran e pò la và a cà cun la Mona Barthel par 3-6 3-6. 'L è 'l inìsi 'd un arbgàt dimóndi lung fat ad sèt prim tùr'n ad fila. A Marrakech la tórna a vìnsar cun la Karolína Plíšková ma pò la in pèrd sinc una a drē a c'l atra. In sl'èrba la s tira sù, faghénd secónd tùran a Birmingham (4-6 4-6 da la Sorana Cîrstea), quàrt a 'S-Hertogenbosch (6-2 4-6 4-6 da la Carla Suárez Navarro) e utàṿ a Wimbledon. Chè la bat l'Anastasija Pavljučenkova 6-0 6-1, la Barbora Záhlavová-Strýcová 7-5 6-3 e la Petra Martić 6-1 4-6 6-2. La pèrd pò da l'Agnieszka Radwańska in tri sét. Cum a 'l sòlit, dòp Wimbledon, al sò śōg al fà vgnir al lat a i śnòć. La bùlgara la pèrd subìt a Båstad, a gl'US Open e in Lussembûrgh, la n pasa minga al qualificasiòṅ a Cincinnati, a New Haven, a Tokyo e a Pechîn e la pèrd tri partìdi su tri a 'l Master "B" ad Sòfia, in dua lē la pōl śugàr sōl par via dna carta salvàdga parchè in dla sò caréra la n à mai vins gnanc un tìtul WTA.
Crudàda in clasìfica, da 'd là da 'l sentéśum pòst in clasìfica, la Pironkova l'è custréta a śugar al qualificasiòṅ a Shenzhen in Cina ma la gh và mâl parchè la pèrd da la nùmar 196 dal mónd, la śvisra Viktorija Golubic. In Śnar la i pasa invéci a Sydney. Chè la và avànti baténd subìt la Sorana Cîrstea 6-4 6-1 e pò anc la Varvara Lepchenko 6-3 6-2 e la Sara Errani 7-6 6-3. 'L éra da 'l 2010 che la bùlgara la n éra minga bòna ad pasàr i quàrt in un turnèo WTA. La Cvetana la gh cata gust e la bat pò anc la Petra Kvitová in semifinàl par 6-4 6-3 e l'Angelique Kerber in finàl par 6-4 6-4.