Depresión de Sarrión

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Envista de la val d'Olba, en lo cabaixo de la depresión de Sarrión.

La depresión de Sarrión u depresión de La Puebla de Valverde-Sarrión ye una antiga cuenca sedimentaria que se formó entre lo macizo de Chabalambre y las serranías de Gúdar, y que se plenó con sedimentos d'edat neochena.

Se situa a lo nord-este de la sierra de Chabalambre, a l'este de la sierra de Camarena, a lo sudeste de la sierra de los Cabezos y a lo sud de la depresión de Rubiuelos (cabaixo de las serranías de Gúdar). Enta l'este contina a traviés de las depresions de Millars meyo y de Palancia.

Cheolochía estructural

Por debaixo de los materials d'edat neochena bi ha rocas sedimentarias de lo Cretacio inferior (destacando las facies Weald), en una disposición monoclinal entre lo Churasico de lo macizo de Chabalambre y lo Cretacio de las serranías de Gúdar. En las foces que ha formau lo ret fluvial de Millars afloran los materials cretacios.

Bi ha unas fallas de 200 a 300 m en contacto con las serranías de Gúdar que corresponden a una etapa de deformacions de lo Plioceno superior cuan s'alzoron en forma de domo los macizos de Chabalambre y Gúdar, deformando-se la superficie d'erosión fundamental de zaguers de lo Terciario, lo que creyó la disposición fundida actual.

Cheomorfolochía

En la depresión de Sarrión destaca un modelau con glacis y foces. Tamién bi ha muelas, faixas fluvials y toscars con formación de calsineras travertinicas.

Dende lo macizo de Chabalambre baixan dos glacis que ocupan buena part de la superficie de la depresión: lo de Sarrión y lo de La Puebla de Valderde, encaixando-se lo segundo bels 20–40 m en lo segundo. Estos glacis no cubren la superficie en lo sector nordoriental, a on que bi ha muelas.

• Lo glacis de Sarrión tiene archilas royencas d'edat villafranquiana inferior (primers de lo Plioceno superior).
• Lo glacis de La Puebla de Valverde tiene gravas y lentillons d'arena y ye d'edat villafranquiana mes recient, entre lo Plioceno superior y lo Pleistoceno).

Los atros glacis y las faixas fluvials de Millars son mes recients que no los dos glacis. En lo cabalto de la depresión los encaixamientos fluvials son modestos, pero en lo cabaixo son espectaculars, plegando dica bels 300-400 en las foces de Millars.

Bibliografía

• (es) Julio Muñoz Jiménez y Concepción Sanz Herráiz: Guía Física de España. 5 Las Montañas. Alianza Editorial, 1995.
• (es) Gonzalo Mateo Sanz, Manuel-Benito Crespo Villalba y Carlos Fabregat Llueca: X curso de botánica práctica. La flora y vegetación del Sistema Ibérico. Manual auxiliar para el curso. Teruel, chulio de 1998.
• (es) Eduardo Viñuales Cobos (coordinador): Red natural de Aragón. nº 9, Gúdar-Javalambre PRAMES, S.A., 2006.
• (es) José Quereda Sala: Geomorfología, publicau en o libro La provincia de Castellón de la Plana, tierras y gentes, Caja de Ahorros y Monte de Piedad de Castellón, 1985.
• (es) José Luis Peña Monné et al.: Geomorfología de la Provincia de Teruel. Instituto de Estudios Turolenses, 1984.
• (es) Mateo Gutiérrez Elorza: Geologia y Recursos Minerales de la Provincia de Teruel. "Cartillas Turolenses Nº 1". Instituto de Estudios Turolenses.
• (es) Mateo Gutiérrez Elorza y José Luis Peña Monné: Las formas del relieve de la provincia de Teruel. "Cartillas Turolenses Nº 7º". Instituto de Estudios Turolenses, 1990.
• (es) José Luis Peña Monné, Luis Alberto Longares Aladrén y Marta Espinalt Brillas: Paisajes naturales de la provincia de Teruel. Guía del medio natural. Instituto de Estudios Turolenses, 2000.

• Datos: Q65398673