En Durmersheim interalie vivas la german-japana esperantista familio Kleemann. La paro renkontiĝis en la IJK 1965 en Japanio, en kiu ekestis tuta vico de german-japanaj esperantistaj familioj. Dieter Kleemann post finstudo de medicino malfermis grandan kuracistan praktikejon de interna medicino en la komunumo, do de multaj jardekoj estas en fokuso de la loka publika atento, tiel ke la fenomeno de esperantlingva familio estas konata al multaj komunumanoj. Ambaŭ filoj, Thomas kaj Andreas, estas denaskaj esperantistoj, en infanaĝo partoprenis multajn Internaciajn Infanajn Kongresetojn, poste aktivis en GEJ kaj intertempe ambaŭ mem fondis esperantlingvajn familiojn. En Durmersheim je granda parto tradukiĝis kaj fine publikiĝis esperantlingva versio de la infanlibro Malgranda Sorĉistino de Otfried Preussler.
