Jump to content

Edjean Semeleer

Añadí lenk
Di Wikipedia, e ensiklopedia liber
E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.
Edjean Semeleer
Imagen desea: Edjean Semeleer
Informacion basico
Nomber completo Edjean Azzeddin Semeleer
Nacemento 10 di december 1983
Aruba
Obra
Aña activo 1994–presente
Ofishi Cantante
Productor
[Edita Wikidata] · [Manual]

Edjean Azzeddin Semeleer (☆ 10 di december 1983 na Aruba) ta un cantante, productor, promotor di concierto, empresario cultural y creativo, presentador, productor di TV y filántropo Arubano. E ta wordo considera como un di e artistanan di mayor renombre cu Aruba a conoce den su historia musical.

Bida y Carera

[editá | editá fuente]

Infancia y Hubentud

[editá | editá fuente]

Edjean ta e prome yiu di Edmundo “Eddy” Semeleer (Boneiro, 1953) y Rosaura “Chichi” Semeleer-Quandt (Aruba, 1955) y a lanta den bario di Dakota. Na 1993 e famia a muda pa bario di Paradijswijk. E fam Semeleer ta procedente di e bario Nort di Saliña, den Kralendijk na Boneiro.

Desde chikito Edjean a canta y entretene na celebracionnan familiar. Riba su di tres cumpleaños el a duna un “mini-concierto” espontaneo na su propio fiesta, cantando y tocando riba su mini-cuatro, hunto cu Donny Boekhoudt riba su guitara. Cu su 4 aña, Edjean a presenta e cancion La Bamba cu Tipico Boneriano, durante celebracion di 40 aniversario di boda di su welo Piet “Siso” Semeleer y su wela Maria Semeleer-Thomas na Boneiro. Na 1989 Edjean a presenta na Telearuba den un grupo di baile hunto cu cantante Silviene Semerel, durante e popular programa “Showtime” di Tico Kuiperi.[1].

E mesun aña ey, durante “graduacion” di su kleuterschool Jacintha Kleuterschool, Edjean a presenta contando chasco, bailando y cantando. Eynan su soño di un dia bira artista ta crese mas aun. Esnan mas cerca di dje semper tabata convenci cu un dia e lo a bira un artista y cantante excelente.

Na 1993, tempo cu Edjean tabata den 3e klas di Juf. Ethel Marchena, el a dicidi durante un test cu e lo canta “Atardi” di Rudy Plaate pa asina por a ricibi un punto pa “Muziek”. Su voz a conmove Juf. Ethel asina tanto cu desde e dia ey Juf. Ethel a keda insisti cu hoofd di scol Sr. Eric Rincones pa permiti Edjean canta como solista durante Prome Santa Comunion di e aña ey den misa Fatima di Dakota. Asina tambe Edjean a ricibi otro plataforma pa demostra su talento y habilidad vocal.

Carera Musical

[editá | editá fuente]

Su carera musical ta cuminsa oficialmente dia 13 di maart 1994, na momento cu el a subi escenario di Cas di Cultura pa prome bes, representando su skol Pius X di Dakota, den pre-final di festival Voz-I-Landia, cantando un composicion di Roy Olive, titula “Respeta mi”. Un cancion a wordo componi specialmente pa conscientisa contra abuso di menor. E cancion aki a wordo entrega oficialmente na Fundacion Respeta Mi. Desde inicio di su carera musical, Semeleer semper a interpreta cancionnan cu tin significado profundo y importante. E ta termina na di 3 lugar den Voz y di dos lugar den Cancion.[2]

Menos di dos luna despues, Edjean ta lansa un tema promocional na emisoranan di Aruba, componi door di Roy Olive titula “Mami Pordona mi” pa e celebracion di Dia di Mama. E cancion aki a resulta den e exito di mas grandi na tur radio emisora local pa e temporada ey. Asina tambe Edjean su nomber a bira conoci den mayoria hogar na Aruba y el a cuminsa cosecha exito tras di exito.

Un personahe masha popular cu a mira potencial artistico den Edjean, e popular y stima Eddie Peterson “Jan Poets’, a cuminsa invit’e pa presenta na su Bingonan Popular den Tropicana Showroom. E mesun personahe aki a bira un di e personanan cu mas a apoya y promove Edjean durante henter su carera.

Na November di e mesun aña (1994) Edjean ta lansa e prome di hopi exito di fin di aña. Un composicion di Junior de Freitas titula “San Nicolaas, please corda riba mi”. Un musicalisacion mahestuoso di Hildward Croes, cu a conta cu apoyo di Erin Croes como productor ehecutivo. Personahenan cu for di un principio a marca Edjean su carera positivamente pa semper.

Asina a nace e idea pa crea un album musical cu varios composicion na Papiamento. Esaki a bira un realidad y cu apoyo di “Pueblo Food Center”, e joya musical aki a wordo lansa den gran forma riba 3 di juni, 1995.[3] Varios compositor y musico a bini hunto pa haci e album aki un realidad manera Roy Olive, Natasha Maldonado, Junior de Freitas, Emma Sint Jago, Nico Melaan, Robert Jeand’or, Hubert Thiel, Hildward Croes, Fio Wester, Hubert “Ipi” Martes, Efi Thiel y Gregory Goedgedrag. Esaki a bay den historia como e prome disco compacto musical di un cantante solista infantil den henter Caribe. Fuente: Sr. Tony van Veen, Disc Makers, New Jersey.

E mesun aña ey, Edjean a wordo aserca door di Emily Hudson y Miriam Kock-Salazar pa ta un di e presentadornan di un programa radial masha popular na canal 90 cu a haya e nomber “Nos Muchanan”. Esaki tabata comienso di otro etapa: “Edjean como presentador”. Pa e motibo ey y mirando tambe su habilidad y facilidad pa combersa y presenta dilanti di camara, Edjean a keda encarga cu e tarea pa ta un di e presentadornan di varios programa di television di carnaval dirigi na hobennan local. Talento y habilidad cu Ruben Garcia y Emily Hudson a ripara desde un principio.

Promotornan grandi y importante di decada 90 manera entre otro Ruben Garcia, Erin Croes, Jan Poets, Mavis Albertina, Jachmin Pinedo, Leoncita Arends, Nelson Farah "Joe Black" y Don Tico Kuiperi a mira potencial di Edjean y a brind’e oportunidad pa presenta durante programanan di television popular y den espectaculonan historico manera concierto di Pedro Fernandez (den cual Edjean a canta duo cu e cantante aki; na Aruba y Corsou), tambe cu Mariachi Vargas de Tecalitlán y varios otro evento grandi mas.

Peticionnan y invitacionnan cu tabata drenta constantemente pidiendo pa presentacion di Edjean riba e islanan Aruba, Boneiro[4] y Corsou, y tambe premionan prestigioso cu a wordo entrega na Edjean na varios ocasion, manera entre otro “Premio Motito y Rufo Wever” y “Den Ambiente Awards”, a sigui marca Edjean su carera den un direccion di exito.

Na 1997 Edjean a cuminsa traha seriamente riba su habilidadnan vocal durante su pubertad, door di tuma terapia y lesnan vocal intensivo serca profesora di canto Sra. Mayra Kock Garrido pa varios aña y despues a sigui cu lesnan intensivo serca coach vocal Sra. Tica Giel.

Riba 28 di November 2003, 8 aña despues di e lansamento di su prome album, Edjean ta tuma rienda di su propio carera musical y e ta lansa su di dos album, pero cu ta bira e prome volumen di un tradicion musical di 8 album di fin di aña cu a marca su trayectoria di artista pa hopi aña. E tradicional y popular “Hey… ta Pasco!”

Cu esaki Edjean a cuminsa e tradicion tambe di scohe madrina y padrinonan pa su albumnan, cu ta personanan cu a significa hopi pa Edjean su carera musical. Madrinanan di e prome “Hey… ta Pasco!”: Sra. Maybelline Arends-Croes y Sra. Edwina Werleman. Padrinonan: Hubert Booi y Edjean su abuelo, Rosendo Aparicio.

Desde 2003, Edjean a sigui cu e tradicion di lansa un album musical tur fin di aña y na 2006, el a forma su propio orkesta bao direccion di Hildward Croes y asina cuminsa organisa y presenta un concierto pa compaña e proyectonan aki di fin di aña[5].

Edjean a bira aun mas conoci y respeta for di momento cu el a anuncia su prome concierto cu a tuma lugar 6 di december den Cas di Cultura. E motibo di esaki ta cu e no ta solamente e protagonista di e conciertonan, pero cu e mes ta organisador y productor di esakinan. Den su prome concierto el a demostra atrobe cu e no ta solamente un cantante excelente pero tambe un entrepreneur creativo cu por dirigi y maneha su propio carera den e direccion cu e ta desea. Asina a sigui masha hopi concierto cu a alegra curazon di miles di hende.

Memorabel ta su conciertonan grandi di fin di aña presenta den Renaissance Convention Center cu continuamente tabata "sold out".

Conciertonan cu el a presenta na beneficio di, y pa recauda fondo pa varios fundacion y causa tambe ta wordo considera como hazañanan hopi positivo.

Banda di cancionnan alegre y popular di fin di aña, e ta popular tambe pa su cancionnan dedica na Aruba, pa stimula e sentido di orguyo y fomenta compromiso pa e bienestar y progreso di Aruba. Pues na Maart 2005, Edjean a lansa un album dedica na e isla, titula “Mi Pais”.

Den e mesun luna ey, Edjean su carera ta conoce otro etapa y dimension nobo. Cu acercamiento di TeleAruba, Edjean a cuminsa presenta e programa “Simplemente Aruba” hunto cu Silvhyanne Vrolijk. For di un principio, publico local a encanta su forma formidable di presenta programanan televisivo y transmicionnan en bibo. Esaki a habri caminda pa Edjean por a haci reportahenan special tambe pa “Nos Pais TV” di Corsou y “NOS” di Hulanda.

E ta popular tambe pa varios exito romantico, cual ta refleha su karakter trankilo, gentil y caluroso.

Na 2007 Edjean a wordo invita dos biaha pa presenta na Hulanda. E prome presentacion tabata durante Aruba Dag organisa pa Arubahuis. E di dos ocasion tabata riba 15 di december 2007 durante “Koninkrijksconcert” na Nijmegen organisa pa Famia Real y Gobierno Hulandes pa conmemora Dia di Statuut. Edjean a wordo invita pa representa Aruba durante e celebracion musical aki.

Desde december 2006 te cu awe Edjean a surpasa 50 concierto presenta. Hopi di nan, conciertonan cu lo keda den historia como hazañanan memorabel[6][7][8]. Aki por menciona su conciertonan di fin di aña of conciertonan na localidadnan historico y poco usual manera Stadhuis di Oranjestad,[9] teatro di Ser’i Noka[10][11], riba awanan di Lagoen den Klip[12], den e antiguo “Casa Mathias”[13][14] y na Nicolaas Store cu su orkesta bao direccion di Ivan Quandus.[15].

Numeroso presentacionnan na Boneiro, Corsou[16], Sint Maarten y Hulanda tambe ta parti importante di su carera impresionante.

Edjean ta conoci pa semper busca horizonte nobo y perspectiva continuamente. E ta desaroya su mes den e industria di entretenimento door di explora oportunidadnan nobo y desafionan aun mas grandi. Su empeño pa proteha y promove Aruba su herencia ta remarcabel.

El a traha cu musiconan y artistanan riba centenares di proyectonan musical.
Edjean a canta duo y a comparti escenario ambos cu cantantenan local y internacional manera: Padu Lampe, Edwin Abath, Los Impala, Gloria Vega, Dave Benton, Dhaddy Brokke, Lidwina Booi, Leslie Vos, Jossy Brokke, Sharon Rose, Tony Sherman, Jeanedy Semeleer, Robert Jean D'or, Teddy Phillips, Jack Tromp, Roderick "Rocco" Franken, Henry Stephen, Boy Thode, Angela Croes, Pedro Fernandez, Nancy Ramos, Mirna Ríos, Stevie Ann, Mathilde Santing, The Mighty Dow, Tania Kross, Randal Corsen, Melania v/d Veen, Maruja Boogaard, Danny Janga, Izaline Calister, Debbie Beaujon, Grupo di Betico y Mariachi Vargas de Tecalitlán.

Den su afan di expande su capacidadnan, el a bisti e petchi di promotor y organisador di evento na 2010, na momento cu e ta organisa un anochi di fiesta cu un leyenda Latino-Americano, e popular Henry Stephen di Venezuela. Asina a sigui un lista largo di artistanan cu Edjean a contrata pa varios espectaculo manera entre otro Nancy Ramos, Rudy Márquez, Los Impala, Tony Sherman, Boy Thode, Melania van der Veen y mas.

25 aña di carera artistico y "Hey... ta Pasco!"

[editá | editá fuente]

Na aña 2019 Edjean mes a scohe pa celebra e hecho cu el a yega 25 aña den e mundo di entretenimento cu varios concierto na beneficio di numeroso fundacion riba Aruba. Tambe el a intensiva su esfuerzonan pa duna bek na comunidad arubano y pa conscientisa door di promove un sentido di pertenencia entre tur ciudadano di comunidad. Pa e ser humano bira mas consciente di e rol importante y positivo cu e por tin den desaroyo sostenibel di su pais. Un ehempel di esaki ta Edjean su iniciativa y esfuerzo pa delibera cu Parokia di Santa Cruz pa brinda cooperacion y autoriza Go Cultura Foundation pa cuminsa cu e esfuerzonan di rescate, restauracion y renobacion di e anfiteatro historico di Ser'i Noka. E acuerdo aki a wordo anuncia na principio di e luna di september 2019. E teatro di Ser'i Noka ta un plataforma cu por tin un rol protagonico den pone cultura y creatividad na e desaroyo sostenibel di Aruba.

Na comienso di november 2019, Edjean a anuncia e regreso despues di 5 aña di e popular concierto "Hey... ta Pasco!" cu lo a wordo presenta den e teatro di Ser'i Noka diahuebs 19 di december 2019. Ya despues di dos siman di e fecha di anuncio, tur carchi di entrada pa e concierto aki tabata bendi.

E proyecto "Hey... ta Pasco!" a ensera mas cu un solo concierto. E tabata mas cu un luna di presentacionnan na diferente casnan di nos grandinan, pa varios di e organisacionnan cu ta cay bao di Stichting voor Verstandelijk Gehandicapten Aruba, pa stichting FAVI y mas.

Tambe Edjean a regala un concierto na alumnonan y maestronan di Maria School y Colegio San Hose riba e mainta di 19 di december. Esaki a sosode den e teatro di Ser'i Noka, cu colaboracion di artistanan y musiconan local. Varios empresa local tambe a brinda nan sosten pa henter e proyecto por tabata un realidad.

E anochi di 19 di december a presenta e concierto "Hey... ta Pasco!" den e anfiteatro di Ser'i Noka. E orkesta grandi tabata bao direccion di Ivan Quandus a compaña Semeleer i e invitadonan special, manera e hobennan Jaylon Machado, Georvin Angela, Jeanedy Semeleer, Maryann Rodriguez y "Buddy Love" Jeanchris Jair Vesprey. Durante e concierto Xiomara Maduro, ministro di Finansa, Asuntonan Economico y Cultura a otorga un reconocemento y homenahe special na Semeleer pa su 25 aña di excelencia artistico.

Riba 23 di december, den cadena nacional, e grabacion y version edita di e concierto "Hey... ta Pasco!" a wordo estrena na television local. Canalnan DiarioTV, TeleAruba y Canal 22 a uni pa simultaneamente transmiti esaki pa deleite di tur hende.

E proyecto "Hey... ta Pasco!" a sirbi como forma tambe pa recauda fondo pa sigui cu e proceso di rescate, restauracion y renobacion di e teatro historico di Ser'i Noka.

Trabaonan humanitario

[editá | editá fuente]

Edjean ta lider fundador di Go Cultura Foundation[17][18][19], un organisacion non-profit cu tin como mision pa stimula y engrandece e sector artistico y cultural di Aruba[20]. Pa duna Industrianan Cultural y Creativo e lugar y prominencia cu nan merece y asina pone Cultura y Creatividad na e curazon di e desaroyo sostenibel Arubano[21][22][23][24].

Banda di esaki, Edjean ta conoci pa haci hopi trabao voluntario durante aña, tur aña. Contribuyendo na un lista largo di fundacion y organisacion Arubano. Door di “Haci donacion cu su talento”, pero tambe promoviendo importancia di y aprecio pa arte y creatividad. Fomentando aprecio pa Aruba su herencia cultural.

Pa Edjean semper e tabata importante pa duna bek na comunidad, pa inspira y pa compromete su mes na continuamente construi un nacion poderoso. Desde 1994 e ta activo como voluntario y asina aporta y canta pa varios actividad cultural, celebracion- y eventonan special; canta pa instancianan caritativo[25][26], skolnan, organisacion cultural, social y deportivo riba nos isla. E lista ta mucho largo pa menciona.

Desde aña 2014 Edjean ta activo cu su propio conciertonan riba e barco Freewinds, pa yuda recauda fondo pa numeroso fundacion riba nos isla.

For di augustus 2014 te cu februari 2020, el a yuda recauda mas cu Afl. 450.000,- [27] cu su conciertonan y presentacionnan pa causanan y fundacionnan importante riba nos isla manera Animal Rights Foundation, Scol Cacique Macuarima, Fundacion pa hende muher den dificultad, FADA[28][29], Pasadia Briyo di Solo, New Life for Paws Foundation[30], damnificadonan di Horcan Irma na St. Maarten[31], Go Cultura Foundation[32][33][34][35], Fundacion Zinnia, Women's Club of Aruba, Fundacion Frank Polanco[36], damnificadonan di horcan Dorian na Bahamas, recauda fondo pa hobennan musico manera Chris Kross y Jonathan Croes[37][38][39] por sigui cu nan estudio den exterior y hopi hopi mas.

Desde Januari 2019, e ta colabora y ta miembro voluntario y activo di e comision consultativo di "Oranjestad Aruba Sister Cities Association" (OASCA) pa asina asisti den crea mas oportunidad pa Aruba su ciudadanonan via e plataforma mundial di Sister Cities International[40].

SER'I NOKA Na comienso di September 2019, Edjean a anuncia un proyecto historico cu ta inicio di e esfuersonan pa e hazaña di rescate, restauracion y renobacion di e monumental teatro di Ser’i Noka. Un noticia cu a wordo ricibi cu un recepcion hopi positivo door di henter comunidad Arubano.

Via Edjean, fundacion Go Cultura a ricibi autorisacion for di Parokia di Santa Cruz encabeza pa Pastoor Jairo Maduro, pa cuminsa cu e trabaonan urgente y necesario di rescate di e amfitheater encantador aki cu a wordo inaugura riba 8 di December na aña 1963.

E ta bisto cu Edjean como idealista y visionario ta purba continuamente na conscientisa cu mester traha na e pilarnan di un comunidad nobo pa medio di arte, cultura y creatividad. Cu su expresionnan varios bes e ta purba pone un spiel dilanti di nos comunidad y pa cada ken puntra nan mes, ken nos ta, di unda nos a bin, unda nos ta para den actualidad y ki rumbo nos kier scohe pa cana ariba.

Legado

[editá | editá fuente]

Edjean ta wordo considera como un artista, embahador cultural y ser humano sumamente talentoso, inspirativo, influyente, independiente, determina, comprometi, creativo y optimista cu a haci un diferencia den bida di miles di persona.[41]

Semper dunando otro artistanan, specialmente hobennan, e oportunidad pa ta hunto cune riba escenario den su conciertonan.

Conoci pa su numeroso proyectonan y conciertonan “sold out”.

Respeta pa su voz y un sin fin di logronan.

Admira pa su determinacion, compromiso di inspira, brinda otronan oportunidad y pa ta un diferencia positivo.

Stima pa su personalidad carismatico y simpatico.


Reconocemento, Premio y Logronan

[editá | editá fuente]
  • 1994: Cantante Infantil y Hubenil mas popular – “Den Ambiente Awards"
  • 1994: Cantante Infantil di aña - "Den Ambiente Awards"
  • 1994: 3 september ganador absoluto Festival Nacional Infantil y Hubenil di Mariachi & Cantante mas popular
  • 1994: 29 di december, plakaat di reconocemento como "Cantante Hubenil di Aña" – Matutino DIARIO
  • 1994: 31 december, reconocemento di "Cantante infantil di Aña" - Canal 90 fm
  • 1995 & 1996: Cantante Hubenil di Aña – “Premio Mo Tito y Rufo Wever”
  • 1995: Album Musical mas popular di Aña "Cantando pa su Pueblo" – "Den Ambiente Awards"
  • 1995: Cantante Hubenil di aña - “Den Ambiente Awards”
  • 1997: Cantante Hubenil mas Popular - “Den Ambiente Awards”
  • 1997: Cantante Hubenil di Aña - "Premio Mo Tito y Rufo Wever"
  • 2001: Ganador Absoluto Festival “Un Canto na nos Himno y Bandera"
  • 2004: Ganador Absoluto Festival “Un Canto na nos Himno y Bandera"
  • 2004: Rey di Dande
  • 2005: Album Musical di Aña “Mi Pais” – Prensa Local
  • 2003 – 2008 : Cantante Solista di Aña (Varios medio local)
  • 2007: Cantante di Aña – Revista Focus
  • 2007: Personalidad Xclusivo di Aña – Revista Xclusivo
  • 2007: Artista Local di Aña – Top 95 FM/Canal 90 FM
  • 2008: Premio Cultural/Personahe di Aña, Centro di Bario Playa Pabao
  • 2009: Focus Magazine Ruby Award for the achievement of 15 years in the Entertainment Business
  • 2011: Rey di Dande[42][43]
  • 2013: Rey di Reynan di Dande[44]
  • 2018: Rey di Dande[45][46]
  • 2019: 20 di mei Edjean ta wordo reconoci y homenahea door di Biblioteca Nacional di Aruba, Departamento di Cultura y Gestor Cultural Sr. Mirto lacle, pa su 25 añanan den e industria di entretenimento[47][48]
  • 2019: 13 di juli Edjean ta wordo reconoci un bes mas. E biaha aki door di maestronan local cu "Premio di Cultura" como "Mihor artista y personahe cultural" den Renaissance Convention Center. Esaki pa conmemora su celebracion di 25 aña como cantante y promotor cultural.
  • 2019: 12 di november, durante e programa "E Strea di Fin di Aña", Edjean ta wordo sorprendi cu un "Strea Musical" door di presentadora Sandra Croes como homenahe y reconocemento pa su 25 añanan como cantante y baluarte cultural.
  • 2019: 19 di december, durante Edjean su concierto "Hey... ta Pasco!" e ta wordo sorprendi door di Gobierno di Aruba representa door di Ministro di Finansa, Asuntonan Economico y Cultura Sra. Xiomara Maduro cu un homenahe y reconocemento pa su 25 aña di excelencia artistico den e industria di entretenimento.
  • 2019: 31 di december Edjean ta haya otro reconocemento pa su 25 aña di carera artistico y tambe su esfuerzo y dedicacion na ehecuta proyectonan cu tin impacto positivo riba muchanan y hobennan di Aruba. E reconocemento aki a wordo duna door di Stichting Stylo Aruba cu ta haci numeroso proyectonan na beneficio di hubentud di e isla.

Discografia

[editá | editá fuente]
  • Cantando pa su pueblo (1995)
  • Alma y Curason di nos Himno y Bandera – coleccion composicionnan di Casin Giel (2002)
  • Hey… ta Pasco!, Vol 1 (2003)
  • Hey… ta Pasco!, Vol 2 (2004)
  • Pordona mi (2004)
  • Hey… ta Pasco!, Vol 3 (2005)
  • Mi Pais (2005)
  • Hey… ta Pasco!, Vol 4 (2006)
  • Hey… ta Pasco!, Vol 5 (2007)
  • Hey... ta Pasco!, Vol 6 (2008)
  • Mi Pais+ (2013)
For di "https://pap.wikipedia.org/w/index.php?title=Edjean_Semeleer&oldid=125793"