Endy Croes
Wak Croes (pagina di referencia) pa un otro nificacion di topico.
| Pais di nashonalidat | Reino Hulandes  |
|---|---|
| Nòmber di dilanti | Jan, Hendrik |
| Fam | Croes |
| Nòmber di kariño | Endy |
| Fecha di nasementu | 1968 |
| Lugá di nasementu | Aruba |
| Dominio di idioma | Papiamentu, Hulandes |
| Funshon | Minister of Education and Sport |
| Partido polítiko | Movimiento Electoral di Pueblo |
| Deporte | beisbòl |
| Miembro di | World Baseball Softball Confederation, Parlamento di Aruba |
| Ta remplasá | Rudy Lampe |
Jan Hendrik (Endy) Croes (☆ 24 di juli 1967 na Aruba) ta un politico Arubiano. E tabata minister di Enseñansa y Deporte den gabinete Wever-Croes II di 20 di september 2021 te 16 di october 2024. Entre 2017 y 2021 e tabata miembro di Parlamento di Aruba pa partido MEP.
Bida
[editá | editá fuente]Endy Croes a lanta den districto di Santa Cruz y ta un di e cuater yiu di Sofia Theresita Rasmijn y Everaldo Benedicto (Efe) Croes, comerciante.[1][2] Den su hubentud e tabata practica deporte; e deporte di softball y baseball tabata su pasion. Na Hulanda e ta obtene na 1989 su MBO como analista kimico y na 1991 su "Associate Degree" den mesun ramo. Bek na Aruba e ta traha den refineria Coastal di 1991 pa 2001, despues di cual e ta bira empresario lantando varios negoshi. Entre 2001 y 2010 e tabata director general di Fundacion Lotto pa Deporte (FLPD), despues di e sirbi varios aña como miembro di directiva di FLPD, tanto den funcion di vicepresidente como presidente.[3] Den e epoca aki Croes tabata promotor di evento y a ocupa diferente posicion como dirigente deportivo, local y internationalmente. Banda di presidente di Aruba Softball Bond el a keda eligi den directiva di Confederacion Mundial di Baseball Softball (WBSC) na 2009; Confederacion Pan Americano di Softball (CONPASA) y Confederacion Anglo-Caribense di Softball (ECASC) na 2010 y Confederacion Suramericano di Softball (CONSURSA) na 2011.[2]
Na 2013 Croes a debuta como candidato number 13 riba e lista di MEP den eleccion parlamentario, obteniendo 504 voto personal. Na eleccion di 2017 e ta logra drenta Parlamento di Aruba y na juni 2021 ta mantene su asiento logrando 1.006 voto personal. Cu formacion di gabinete Wever-Croes II e ta wordo nombra minister di Enseñansa y Deporte y ta huramenta dia 20 di september 2021. Banda di esey e ta ocupa e puesto di secretario-general di partido MEP. Dia 16 di october parlamento di Aruba a pasa un mocion di desconfiansa contra su persona pa motibo di e forma cu Croes a atende cu e caso di fraude na Stichting Sportsubsidie Aruba (SSA) y e influencia cu el a eherce den e fundacion, e.o. pa loke ta trata su maneho di fondo.[4] For di september 2024 a sali na cla mediante dos investigacion di Algemene Rekenkamer Aruba (ARA) cu tabatin iregularidadnan y malversacion di fondo den SSA.[5]
Croes ta casa cu Dilaila Odor y ta tata di shete yiu.[2]
Asunto FLPD
[editá | editá fuente]Na 2010 Croes, director general di Fundacion Lotto pa Deporte, ta wordo retira pa medio di un decreto di huez basa riba un rapport di investigacion di accountants Ernst & Young Aruba (EY) alegando irregularidadnan financiero.[6] Pa sanea su nomber Croes ta entama na 2015 un caso contra EY pa actonan ilegal, cual demanda ta wordo otorga den Corte di Apelacion na 2018. Ta keda constata cu durante e investigacion a comete fayonan, entre otro dor di no atene na e procedura di skucha tur dos banda. Apesar cu e veredicto tambe a wordo ratifica den Corte di Casacion, EY a keda mantene su posicion tras di e contenido di su rapport.[7] Desde 2019 Croes tin un caso hudicial andando contra EY pa daño y perjuicio.[8]
Fuente, nota i/òf referensia
|