Ferovoyo Madeira-Mamoré
.jpg?lang=io)
La ferovoyo Madeira-Mamoré esis ferovoyo konstruktita en la nuna stato Rondonia, en Brazilia, de 1907 til 1912. Ol havis entote 366 kilometri di extenso, e ligis urbi Porto Velho e Guajará-Mirim. Nun, nur cirkume 8 kilometri duras prezervata, ed uzesas por turismo.
La ferovoyo konstruktesis por faciligar l'exportaco di Boliviana produkturi, nam rivero Mamoré, an la frontiero inter la du landi, e parto di rivero Madeira havis multa rapidaji qui impedis navigado di bateli transportanta vari. Konstruktar la ferovoyo esis parto dil interkonsento inter Brazilia e Bolivia establisita en tale nomizita "kontrato di Petrópolis", segun quo Bolivia cedis Acre a Brazilia.
La projeto por konstruktar ca ferovoyo lansesis unesmafoye en 1870, ma faliis pro granda mortado pro malario. Fine, Usan entraprezisto Percival Farquhar decidis konstruktar ol. Entote, cirkume 20 mil personi de 50 diferanta nacionanesi laboris en lua konstrukto. Pos itere eventir granda mortado di laboristi pro tropikala morbi e manko di higieno, en 1910 Farquhar pregis helpo de Braziliana mediko Oswaldo Cruz, qua konsilis e direktis agadi por saneskar la regiono e kombatar moskiti qui transmisas malario. Tamen, ante ke la plubonigo di higieno-standi e kombato a la prolifero di moskiti diminutis la mortostatistiko, Madeira-Mamoré surnomizesis "la ferovoyo di la diablo".
La ferovoyo rekuperis lua strategiala importo dum la duesma mondomilito, nam ol faciligis transportar kauchuko produktita en la regiono ed uzita en la milito-esforco di la Federiti. Ye la 25ma di mayo 1966, lora prezidanto Humberto de Alencar Castello Branco imperis l'elimino di la ferovoyo e lua remplaso per choseo. La chosei BR-425 e BR-364 nun uzesas por transporto en la regiono. Ye la 10ma di junio 1972 la ferovoyo lastafoye uzesis komplete.