Heaton Nicholls

Senator George Heaton Nicholls was 'n Suid-Afrikaanse politikus en diplomaat.

Hy is in 1876 in Hounslow, Londen gebore en sluit hom later aan by die Britse leër en doen diens in die Duke of Cornwall's Light Infantry in Opper-Birma en Afghanistan. Nicholss kom in 1900 tydens die Tweede Vryheidsoorlog van Ceylon na Suid-Afrika, sluit aan by die Noord-Rhodesiese Polisie, waar hy as polisiekommissaris in Noordwes-Rhodesië dien, en vergesel hoofman Lewanika op sy besoek aan Londen vir die kroning van koning Edward VII.

Ná verdere diens in die res van Afrika, vestig Nicholls hom in Natal as suiker boer waar hy bekendheid verwerf as voorsitter van die Zululand Sugar Planters' Union en stig ook die Umfolozi Co-operative Sugar Planters.

In 1920 word hy die eerste keer tot die Parlement verkies as lid vir Zoeloeland, waar hy blyk 'n sterk voorstander van die Britse saak te wees. Hy was lid van die parlementêre afvaardiging na Kanada in 1928 en woon die Rykskonferensie in Londen in 1931 as raadgewer by, onderhandelinge oor die toekoms van Indië asook baie ander belangrike gebeure.

Hy is later aangestel as voltydse lid van die Naturellesake-kommissie. Daarna dien hy van 1944 as hoë kommissaris van die Unie in Londen en administrateur van Natal. In 1948 word hy senator.

Hy bedank uit die Verenigde Party en word op 'n hoë ouderdom leier van die Verenigde Federale Party in 1953, maar die party ontbind kort daarna nadat dit geen steun werf nie. Nicholls bedank in 1954 as senator. Die party was 'n herlewing in veral Natal van die Britsgesinde Unionisteparty en die Dominiumparty van vroeër jare.

Uit sy pen het verskyn 'n roman genaamd "Bayete", wat gehandel het oor die swart bedreiging vir die wit beskawing. Nicholls sterf op 26 September 1959 in Durban.