Immunsystem
Den Immunsystem ass en Netzwierk u biologesche Systemer, dat e Liewewiese viru Krankheete schützt. Et erkennt a reagéiert op eng Villzuel vu Krankheetserreeger, vun de Virusse bis hinn zu de Parasitte wéi de Wierm, an och op Kriibszellen a frieme Géigestänn am Kierper, wéi Spläiteren. Den Immunsystem ënnerscheet all déi Elementer vum eegene, gesonde biologeschen Tissu vum Organismus.
Bei villen Aarte ginn et zwee grouss Ënnersystemer vum Immunsystem. Den ugebuerenen Immunsystem bitt eng virkonfiguréiert Reaktioun op eng breet Palett vu Situatiounen a Reizer. Den adaptiven Immunsystem liwwert eng moossgeschneidert Äntwert op all Reiz, an deems e léiert, Moleküller ze erkennen, deenen e virdru scho begéint ass. Béid Systemer gebrauche Moleküller an Zellen, fir hir Funktiounen ze erfëllen.
Bal all Organismus huet eng Aart Immunsystem. Bakterien hunn e rudimentären Immunsystem a Form vun Enzymer, déi viru Virusinfektioune schützen. Aner grondleeënd Immunmechanismussen hu sech an ale Planzen an Déieren entwéckelt a sinn an hire modernen Nokommen erhale bliwwen. Wierbeldéiere mat Gebéck, dorënner de Mënsch, hu komplex Ofwiermechanismussen. Dozou zielt d'Fäegkeet, sech unzepassen, fir Krankheetserreeger méi effizient ze erkennen. Déi adaptiv Immunitéit schaaft en immunologescht Gediechtnes, dat bei spéidere Begéinunge mat dem selwechte Krankheetserreeger zu enger verstäerkter Reaktioun féiert. Dee Prozess ass d'Grondlag vun der Impfung.
Eng Feelfunktioun vum Immunsystem kann Autoimmunerkrankungen, Entzündungskrankheeten a Kriibs verursaachen. Eng Immundefizienz oder Immunschwächt läit vir, wann den Immunsystem manner aktiv ass wéi normal, wat zu Infektioune féiert, déi ëmmer erëm kommen a liewensbedrolech kënne sinn. Beim Mënsch kann d'Immundefizienz d'Konsequenz vun enger genetesche Krankheet sinn, oder awer d'Konsequenz vun enger Viruserkrankung (zum Beispill HIV/AIDS). Et kann och d'Folleg vum Anhuele vu Medikamenter sinn, déi d'Immunsystem ënnerdrécken (Immunsuppressiva genannt).
D'Autoimmunitéit entsteet duerch en hyperaktiven Immunsystem, deen den normalen Tissu ugräift, wéi wann et sech dobäi ëm e friemen Organismus géif handelen. Zu den heefegsten Autoimmunerkrankungen zielen d'Hashimoto-Thyreoiditis, déi zu enger chronescher Entzündung vun der Schilddrüs féiert, d'rheumatoid Arthritis, Typ-1-Diabetes a Lupus.
D'Immunologie ass d'Wëssenschaft, déi sech mam Immunsystem befaasst.
Kuckt och
[änneren | Quelltext änneren]| Commons: Immunsystem – Biller, Videoen oder Audiodateien |
