Io confesso
|
C'l artìcul chè 'l è scrit in
Miranduléś |
 I Confess
| ||
| Io confesso | ||
 Montgomery Clift in na figùra dal film | ||
| A cunfès 1953 | ||
|---|---|---|
| Regìa: Alfred Hitchcock | ||
| Scritōr: Paul Anthelme • George Tabori William Archibald | ||
| Atōr: Montgomery Clift • Anne Baxter • Dolly Haas Karl Malden • O.E. Hasse • Brian Aherne Roger Dann • Charles Andre • Henry Corden Ovila Légaré • Gilles Pelletier • Judson Pratt | ||
| Müsica: Dimitri Tiomkin | ||
| Léngua: Ingléś | ||
| Dürä dal film: 95 minüt | ||
| Nasiōṅ: Stat Unî • Cànada | ||
Io confesso (A cunfès) 'l è 'n film americàṅ e canadéś dal 1953 'd Alfred Hitchcock trat da 'l drama teatràl dal 1902 “Nos Deux Consciences” ad Paul Anthelme, pseudònim ad Paul Bourde. 'L è stâ girâ in biànc e négar e 'l è stâ preśentâ in cuncōrs a 'l sèst Fèstival ad Cannes.
Par la part dla prutagunìsta Hitchcock 'l iva sarnî la śvedéśa Anita Björk ch'l'éra rivàda in Cànada cun 'l amànt sèg e 'l fiōl abû fóra da 'l matrimòni. La Warner Bros., scutàda par qvél ch'l éra sucès cun Roberto Rossellini e l'Ingrid Bergman, l'à pò decìś invéci ad tōr a 'l sò pòst l'Anne Baxter.
Al film al n gh'à minga abû sucès anc p'r al fat ch'al pùblic minga catòlic al n psiva briśa cumpréndar bèṅ al sacramènt dla cunfesiòṅ.
Sunt
Pàdar Michael Logan (Montgomery Clift) 'l è 'n prevòstar catòlic dna céśa ad Quebec City. Par tgnir a drē la canònica al tōś a lauràr sèg dū tedésc in buléta, marè e mujér, Otto Keller (O.E. Hasse) e l’Alma (Dolly Haas). Par purtàr a cà di àtar bèsi, 'l óm al fà anc al giardinér par soquànti famìji dla sità.
Na nòt Keller al dmanda a pàdar Logan ad cunfesàr-as e pò al gh cònta ch'l éra andâ a rubàr in cà 'd òṅ ch'al gh'iva śibî un lavōr, 'l avucàt Villette (Ovila Légaré). Dòp èsar stâ arcgnusû, cun la paùra che lò al ciamìs la pulisìa, al 'l iva cupâ. Avénd cuntâ incòsa in dal cunfès, al prēt al gh'à da tgnir tut dèntar anc s'al sà la véra.
'L ispetōr Larrue (Karl Malden) in cal méntar al vèṅ a savér da dū baghéti che lì lōr, al dè dal masamènt, i aṅ vdû vgnir fóra da la vila d'l avucàt 'n óm cun un gabàṅ adòs. Al fat che Otto al s fus vistî da prēt ch'la sira là al mét in di guàj pàdar Logan anc parchè Villette al saìva incòsa dla sò relasiòṅ da śóvan, prima ad dvintàr un religióś, cun na ragàsa ad nóm Ruth (Anne Baxter) che pò l'iva spuśâ invéci un pulìtic anc s'la gh vliva incóra bèṅ. 'L avucàt 'l iva tacâ anc a ricatàr la dóna.
Al prevòstar al gh'à da taśér, al n s pōl minga diféndar, méntar la pulisìa la pénsa ch'al sia lò 'l sasèṅ e al 'l àppia fat par far fóra un testimòṅ dascòmad dla sò relasiòṅ cun na dóna spuśàda.