Iskandariya

(Nota: tipal, Misre refere a la nasion moderna, e Egipte refere a la rena antica.)

Iskandariya (arabi: الإسكندرية‎ al-ʾIskandariyya; arabi misri: اسكندرية‎ Eskendereyya; copta: ⲣⲁⲕⲟϯ Rakodī; elinica: Αλεξάνδρεια Alexandria) ance conoseda como Alexandria, es la site du en grandia en Misre (Egipte) e un sentro economial major. Con 5,200,000 abitantes, lo es la site la plu grande a la Mar Mediteraneo, la site ses en grandia en la mundo arabi, e la site 9 en grandia en Africa. La site estende sirca 40 km a la costa norde de Misre longo a Mar Mediteraneo. Iskandariya es un destina popular per turistes, e es ance un sentro industrial importante, la resulta de sua tubones de gas natural e olio de Suais.

Iskandariya ia es fundida sirca 331 aec par Alexandro la Grande, re de Macedonia e la xef de la Alia Elinica de Corinthos, durante sua concista de la Impero Acemenan. Un vila egiptian nomida Rhacotis ia esiste a la loca e crese a la cuatri egiptian de Iskandariya. Iskandariya ia crese rapida e deveni un sentro importante de sivilia eliniste e ia resta la capitol de Egipte ptolemean, roman, e bizantian per cuasi un mil anios, asta la concista de Egipte par la muslimes en 642 ec, cuando un capitol nova ia es fundida a Fustat (plu tarda asorbeda par la site Cairo). Iskandariya eliniste ia es la plu bon conoseda per la Faro de Iskandariya, un de la Sete Mervelias de la Mundo de la eda medieval. Iskandariya ia es la sentro cultural e inteletal de la mundo antica de la Mediteraneo per la plu parte de la eda eliniste e antica tarda. Lo ia es a un ves la site la plu grande en la mundo antica, ante ce lo ia es pasada ultima par Roma.

La site ia es un sentro major de cristiania temprana e ia es la sentro de la Patriarcia de Iskandariya, cual ia es un de la sentros major de cristiania en la Impero Roman Este. En la mundo moderna, la Eglesa Ortodox Copta e la Eglesa Ortodox Elinica de Iskandariya declara la site como sua erita antica.

Seguente la concista de Egipte par la arabis en 641 ec, la site ia es sacada e ia perde sua sinifia, ante reemerji en la eda moderna. De la sentenio 18 tarda, Iskandariya ia deveni un sentro major de la industria de barconi internasional, e un de la sentros la plu importante de comersia en la mundo. Lo ia profita de la lia fasil sur tera entre la Mar Mediteraneo e la Mar Roja, e la comersia profitosa en coton egiptian.