Jannie Boerema

Jannie Boerema (Nörg, 1946) is een Drèentse schriefster die in 't Drèents en Nederlaands schrif.

Boerema kump uut een boerengezin en studeerde Engelse taal en lettern an de Universiteit van Cambridge. Weerumme in Nederlaand warkte ze as directie-secretaresse, gaf Engels en deu journalistiek wark; ze woonde achterienvolgens in Yde, Vreeis en Zeijen. Ze is beëdigd tolk/vertaalster Drèents en Engels.

Veureerst schreef Boerema in 't Nederlaands; de Drèentse dichter en radiomaker Hans Heyting wees heur op de meugelijkheden van heur moedertaal, 't Noordenvelds. Gedichten en verhalen van heur stunden in de tiedschriften Oeze Volk en Roet. Ze vertaalde wark van Shakespeare en Oscar Wilde in 't Drèents en schreef liedteksten veur Drèentse zangers. In 1985 was ze de eerste ontvangster van de literaire anfieterpries van Roet, de Reyer Onno van Ettingen-pries.

Op 't gebied van de Drèentse taal hef Boerema ok nog aandere activiteiten uut stro ezet. Ze redigeerde Stoelendaans (1985), een boek mit teksten van en informatie aover twintig Drèentse schrievers. In 1988 organiseerde ze Perspextief, een samenwarkingsproject van Drèentse keunstenaars en dichters. Ze warkte mit an 't cursusboek Noordenvelds Wieder met mekaor en was een toertien bestuurslid van de Drentse Schrieverskring. Begun jaoren negentig maakte ze as redacteur van 't Maandblad Drenthe interviews mit spraokmakende Drenten.

In 2006 kwaamp der van Stichting Drentse Taol een schrieverspetret veur video en dvd van Jannie Boerema uut.

Schrieverije

• Onder andere over olijven (proza, 1979, Nederlaandstalig)
• Het begint te dooien (poëzie, 1980)
• Leeid van de sirene (proza en poëzie, Zuudwolde, 1985)
• Dialoog met een eilaand (poëzie, Möppelt, 1986)
• Een roze wolk (proza, sprokies, Amsterdam, 2000, verschenen in een Drèentstalige en een Nederlaandstalige editie)
• Over de Regenboog (poëzie, Zuudwolde, 2005)
• Kinderen van de NSB (2010)
• Leeive Lieve Eva (poëzie, Beilen, 2017)

Bronnen

• Rouke Broersma (red.) (2003), Scheupers van de taol: Bloemlezing van de Drèentse Schrieverij 1837-2003, Zuudwolde: Stichting Het Drentse Boek (blz. 149-53)
• Huus van de Taol aover Jannie Boerema

Dit artikel is eschreven in 't Zuudwest-Drèents.