Judita

La Libro de Judita es un libro de la Biblia, incluida en la Septuaginta e la Atesta Vea de la eglesa Catolica e cristian ortodox, ma escluida de la canon ivri e poneda en la apocrifa par protestantes. La libro conteni multe anacrones, cual es la razona perce alga eruditas aora vide lo como nonistorial.

La nom Judita (ivri: יְהוּדִית, Yehudit, "lodada" o "fem iudi") es la forma fema de Juda.

An si lo ia es probable scriveda par un iudi en la periodo de la Templo du, on ave no indicas ce la Libro de Judita ia es a cualce ves videda como autoriosa o un aspirante per canon par cualce grupo iudi. La testo masoretica de la Biblia ivri no conteni lo, e lo no ia es trovada entre la Enrolas de la Mar Mor, o refereda en cualce leteratur rabal temprana. La razonas per sua esclui inclui la tardia de sua composa, orijina posible elinica, suporta clar de la dinastia Hasmonean (a cual la rabia temprana ia es oposada), e posible la carater egosa e seduosa de Judita.

Ma pos desapare de presentia entre la iudis per plu ca un milenio, referes a la Libro de Judita, e la figur de Judita mesma, ia reapare en la leteratur relijiosa de la criptoiudis ci ia evade sede a la Califia de Cordoba. La interese renovida ia ave la forma de "naras de la eroe fema", poesias, comentas sur la Talmud, e linias en la codigos legal iudi.

La Padres de la Eglesa influente, incluida Augustino de Hipon, Ambrosio de Milan, e Hilario de Poitier, ia vide la Libro de Judita como scrives santa, e Pape Inosente 1 ia declara lo un parte de la canon. En la Prefasa a Judita par Jeronimo de Stridon, el dise ce la Libro ia es trovada par la Consilio Nisean como un scrive santa. La santi de Judita es rejetada par protestantes, ci aseta sola la libros cual es trovada en la canon iudi.

Lo es asetada jeneral ce la Libro de Judita no es istorial. La natur naral es clar de sua fusa de istoria e nara. La carater de Judita es plu grande ca comun, e el ia gania un rol en la tradisiones, arte, poesia, e drama iudi e cristian. Sua nom, cual sinifia "el ci va es lodada" o "fem de Judea", sujesta ce el representa la spirito eroin de la popla iudi, e la mesma spirito, e sua puria, ia cari el a cristiania.

La resulta de sua dedica relijiosa serta, el es capas de vade estra sua rol como un vidua, e vesti e ata en un modo sesal provocante en cuando resta fida a sua ideales en la mente de la lejor, e sua sedui e destesti de la repulsante Holofernes en cuando juante esta rol ia es inspira rica per artistes de multe jeneras. A su es un colie de esemplos: