Lompat ke isi

Kartini

Wikipedia Minangkabau - Lubuak aka tapian ilimu
Raden Ayu Adipati

Kartini Djojoadhiningrat
Repro negatif potret Raden Ajeng Kartini (foto 1890-an)
Lahia21 April 1879
Mayong, Jepara, Hindia Belanda
Maningga17 September 1904 (umua 25)
Rembang, Hindia Belanda
Resting placeTMP Bulu, Kec. Bulu, Kabupaten Rembang, Jawa Tengah
Namo lainRaden Ayu Kartini
Dikana dekEmansipasi wanita.
PasanganK.R.M. Adipati Ario Singgih Djojoadhiningrat (m. 1903 - 1904, kematiannya)
AnakSoesalit Djojoadhiningrat
Signature

Raden Ayu Adipati Kartini Djojoadhiningrat (lahia di Mayong, Jepara, 21 April 1879 – maningga di Rembang, 17 September 1904 pado umua 25 taun - ) atau sabalun manikah acok baimbau galanyo : Raden Ajeng Kartini, adolah tokoh Jawa jo Pahlawan Nasional Indonesia.[1] Kartini adolah pajuang kamerdekaan jo kadudukan kaumnyo, pado wakatu itu utamonyo kaum padusi Jawa.[2] Inyo punyo tanggal lahia nan samo jo Dr. Radjiman Wedyodiningrat, samo-samo lahia pado 21 April 1879.

Kartini dilahiakan dalam kaluarga bangsawan Jawa di Hindia Belanda (kini Indonesia). Sasudah salasai di sikolah dasar nan manggunoan bahaso Balando, inyo nio malanjuikan ka pandidikan labiah lanjuik, tapi padusi Jawa pado maso itu dilarang untuk mamparoleh pendidikan tinggi. Inyo batamu jo babarapo pajabaik dan urang-urang nan bapangaruah, tamasuak J.H. Abendanon, nan batugas untuak mangarajokan Kebijakan Etis Belanda.

Sasudah inyo maningga, saudara padusinyo malanjuikan mandidik anak padusi jo padusi.[3] Surek-surek Kartini ditabikan di sabuah majalah Balando dan akianyo, pado taun 1911, manjadi karya: Habis Gelap Terbitlah Terang, Kehidupan Perempuan di Desa, jo Surat-surat Putri Jawa. Ari ulang taunnyo kini di Indonesia dikana sabagai Ari Kartini untuak manganang jaso-jasonyo, sarato babarapo sikolah dinamoi jo namo inyo dan sabuah yayasan didirikan ateh namonyo untuak mambiayai pendidikan anak padusi Indonesia.

Biografi

[suntiang | suntiang sumber]

Raden Adjeng Kartini barasa dari kalangan priyayi atau kelas bangsawan Jawa. Inyo marupokan anak dari Raden Mas Adipati Aryo Sosroningrat,saurang patih nan diangkek manjadi bupati Jepara sasudah Kartini lahia. Kartini adolah anak dari bininyo nan partamo. Ibunyo banamo Mas Ajeng Ngasirah, anak dari Nyai Haji Siti Aminah jo Kyai Haji Madirono, surang guru agamo di Telukawur, Jepara. Kakek Kartini dari pihak ayah, Pangeran Aryo Tjondronegoro Adiningrat IV, manikah jo Gusti Kangjeng Ratu Ayu, putri ka-10 dari Sultan Hamengkubuwana VI. Naneknyo adolah saudara saibu jo Sultan Hamengkubuwana VII dari panikahan jo permaisuri Gusti Kangjeng Ratu Sultan atau Gusti Kangjeng Ratu Hageng.[4] Garih katurunan Bupati Sosroningrat bahkan dapek ditiliak baliak ka istana Karajaan Majapahit. Sajak Pangeran Dangirin manjadi bupati Surabaya pado abaik ka-18, niniak Sosroningrat mangisi banyak posisi nan pantiang di Pangreh Praja.[5]

Ayah Kartini pado mulonyo adolah seorang wedana di Mayong. Paraturan kolonial pado maso itu maharuskan bupati untuak mampunyoi saurang bangsawan. Dek karano Mas Ajeng Ngasirah indak marupokan bangsawan tinggi,[6] mako ayahnyo manikah baliak jo Raden Ajeng Woerjan (Moerjam), katurunan langsuang Rajo Madura.[7] Sasudah panikahan itu, ayah Kartini ditunjuak sabagai bupati di Jepara untuak manganti jabatan ayah kandung R.A. Woerjan, R.A..A. Tjitrowikromo.

Kartini adolah anak ka-5 dari 11 badunsanak kandung jo badunsanak tiri. Dari sadonyo dunsanak nan sakanduang, Kartini adolah anak padusi nan paliang tuo. Kakeknyo, Pangeran Aryo Tjondronegoro Adiningrat IV, diangkek manjadi bupati Demak pado umua 25 taun dan dikenal pado pertengahan abaik 19 sabagai salah satu bupati partamo nan maagiah pendidikan Barat untuak anak-anaknyo.[8] Kakak Kartini, Sosrokartono, adolah urang nan pandai dalam bidang bahaso. Sampai umua 12 taun, Kartini dibuliahan basakolah di Europeesche Lagere School (ELS). Disiko Kartini baraja bahaso Balando. Tapi, sasudah 12 taun, inyo harus tingga di rumah karano inyo musti dipingit.

Dek karano Kartini pandai babahaso Balando, inyo mulai baraja surang di rumah dan manulih surek kapado kawan-kawan korespondensi nan barasa dari Balando. Salah surangnyo adolah Rosa Abendanon nan banyak mandukuangnyo. Dari buku, koran, jo majalah Eropa, Kartini tertarik jo kamajuan pamikiran padusi Eropa. IOleh sabaik itu, timbul kainginannyo untuak mamajuan padusi pribumi dek karano ia maliek padusi pribumi barado pado status soial nan randah.

Kartini banyak mambaco surek kaba Semarang De Locomotief nan diasuah dek Pieter Brooshooft. Inyo jugo manarimo lestrommel (paket majalah nan dibagikan toko buku untuak langganan). Di antaronyo ado majalah budayo jo sains nan cukuik barek, jugo ado majalah padusi Balando De Hollandsche Lelie. Kartini pun kamudian mangirim tulisannyo babarapo kali jo dimuek di De Hollandsche Lelie. Dari surek-sureknyo, Kartini tampak mambaco apo sajo dengan panuah paratian sambari mambuek catatan-catatan. Kadang-kadang Kartini manyabuiksalah satu karangan atau mangutip babarapo kalimat.Paratiannyo indak hanyo perihal emansipasi padusi, tapi jugo masalah sosial nan umum. Kartini maliek pajuangon padusi untuak mandapekan kabebasan, otonomi jo persamaan hukum sabagai bagian dari gerakan nan labiah lueh. Di antaro buku nan dibaco Kartini sabalun baumua 20 tahun, ado judul Max Havelaar jo Surek-surek Cinta karya Multatuli, nan pado November 1901 alah dibaconyo duo kali. Salain itu, Kartini jugo mambaco De Stille Kraacht (Kakuatan Gaib) karya Louis Coperus jo karya Van Eeden nan bamutu tinggi, karya Augusta de Witt nan sadang-sadang sajo, roman-feminis karya Nyonya Goekoop de-Jong Van Beek jo roman anti-parang karangan Berta Von Suttner, Die Waffen Nieder (Letakan Senjata). Sadonyo babahaso Belanda.

Dek urang gaeknyo, Kartini dijodohan jo bupati Rembang, K.R.M. Adipati Aryo Singgih Djojoadiningrat,[9] nan alah punyo tigo bini. Kartini manikah pado tanggal 12 November 1903. Suaminyo mangarati kahandak Kartini, sahinggo Kartini diagiah kabebasan jo didukuang untuk managakan sakolah padusi di sabalah timur pintu gerbang kompleks kantor kabupaten Rembang atau di sabuah bangunan nan kini dipakai sabagai Gedung Pramuka.

Anak satu-satunyo Kartini, Soesalit Djojoadhiningrat, lahia pado tanggal 13 September 1904. Babarapo hari kamudian, pado tanggal 17 September 1904, Kartini maningga pado umua 25 taun. Kartini dimakamkan di Desa Bulu, Kabupaten Bulu, Rembang.

Karano gigiahnyo Kartini, balakanganko didirian Sekolah padusi dek Yayasan Kartini di Semarang pado taun 1912, dan kamudian di Surabaya pado 1912, Yogyakarta, Malang, Madiun, Cirebon, jo daerah lain. Namo sakolah iko adolah "Sekolah Kartini". Yayasan Kartini iko didirian dek kaluarga Van Deventer, surang tokoh Politik Etis.

Walaupun indak dapek babuek banyak untuak kemajuan bangsa jo tanah air, Kartini manyatokan ide-ide pembaharuan masyarakaik nan malampaui jamannyo malalui surek-sureknyo nan bersejarah.

Cita-citanyo nan tinggi dituangkan dalam sirek-sureknyo kapado kenalan jo sahabatnyo urang Belanda di lua nagari, sarupo Pak EC Abendanon, Pak MCE Ovink-Soer, Pak Zeehandelaar, Prof Dr GK Anton jo Pak HH von Kol, dan Pak HG de Booij-Boissevain. Surat-surat Kartini ditabikan di nagari Belanda pado taun 1911 dek Mr JH Abendanon jo judul Door Duisternis tot Licht. Di tarjemahkan ka bahaso Indonesia dek sastrawan pujangga baru Armijn Pane pado taun 1922 jo judul Habis Gelap Terbitlah Terang.[10]

Referensi

[suntiang | suntiang sumber]
  1. ↑ "Diperingati Setiap 21 April, Ini Biografi Singkat RA Kartini dan Sejarah Ditetapkannya Hari Kartini". Tribunnews.com (dalam bahasa Indonesia). Diakses tanggal 2024-08-19. 
  2. ↑ poerbakawatja, Soegarda (1976). Ensiklopedi Pendidikan. Jakarta: Gunung Agung. pp. 140-141. 
  3. ↑ "Indonesia and the Dutch 1800-1950 by Sanderson Beck". www.san.beck.org. Diakses tanggal 2024-08-19. 
  4. ↑ Mandoyokusumo, K.P.H. (1988). Serat Raja Putra Ngayogyakarta Hadiningrat. Yogyakarta: Bebadan Museum Karaton Ngayogyakarta Hadiningrat. pp. 46. 
  5. ↑ On feminism and nationalism: Kartini's letters to Stella Zeehandelaar 1899-1903. Monash University Press. 4 Nopember 2005. p. 2. ISBN 1876924357. https://archive.org/details/onfeminismnation0000kart. 
  6. ↑ Quarterly, Asia; Parlay, Prediksi. "Prediksi Bola Paling Jitu di Indonesia". www.asiaquarterly.com (dalam bahasa Indonesia). Diakses tanggal 2024-08-19. 
  7. ↑ On feminism and nationalism: Kartini's letters to Stella Zeehandelaar 1899-1903. Monash University Press. 4 Nopember 2005. p. 2. ISBN 1876924357. https://archive.org/details/onfeminismnation0000kart. 
  8. ↑ On feminism and nationalism: Kartini's letters to Stella Zeehandelaar 1899-1903. Monash University Press. 4 Nopember 2005. p. 2. ISBN 1876924357. https://archive.org/details/onfeminismnation0000kart. 
  9. ↑ Safwan, Mardanas (2001) (dalam bahaso id). R.A. Kartini: riwayat hidup dan perjuangannya. Mutiara Sumber Widya. ISBN 978-979-9331-17-5. https://books.google.co.id/books?id=ewtxAAAAMAAJ&newbks=0&printsec=frontcover&dq=%22Kartini%22&q=%22Kartini%22&hl=id&redir_esc=y. 
  10. ↑ developer, medcom id (2015-04-21). "Arti Kartini di Masa Kini". medcom.id (dalam bahasa Indonesia). Diakses tanggal 2024-08-19. 
Diambiak dari "https://min.wikipedia.org/w/index.php?title=Kartini&oldid=3154716"