Kefir

Siminces (å mitan) avou deus bocås di kefir a l' aiwe djusse aprestés (li fike est co å fond)

Li kefir, c’ est ene maxheure di yesses et d' bactereyes laeçreces, ki s’ mopliyèt raddimint dins l’ aiwe avou do souke, et adon siervi a-z aprester ene abwesson.

Gn a do kefir a l’ aiwe et do kefir å laecea.

Istwere

C’ est ene môde ki vént des djins do Cocåze, k’ endè boevèt come di l’ aiwe dispu estant efant. On vout k’ ça soeye po çoula k’ i vicnut vîs (disk’ a 110 ans, dit-st on).

Ricete do kefir a l’ aiwe

Ingredyints

I vos fåt :

• del simince di kefir (d’ onk k’ endè fwait)
• deus ou troes bocås ki cloyèt bén (weks, botayes di djus d' frut, grands pots d’ confiteure).
• sacwants fikes
• do souke
• on citron

Muzeures 

Po on bocå d’ on lite :

• troes coyîs a sope di smince
• 4 coyîs a sope di fén souke, plinnes a houpe
• 1 fike
• ¼ di citron, bén lavé, po rsaetchî les prodûts d’ pouverijhaedje k’ i gn åreut co dsu (ou on citron « biyo »)

Aprestaedje

Rimplixhoz vosse bocå avou del nete aiwe. Maxhîz comifåt po fé fonde lo souke. Cloyoz l’ tot serant bén l’ covra.

Après 24 eures, rimaxhoz co vos bocås.

Vosse kefir est presse après 48 a 72 eures. A fwait k’ ça ferminte, gn a des bouyetes di gåz sol veule do bocå et sol citron. Cwand vosse fike rimonte å dzeu, c’ est k’ ça est bon.

Rascodaedje

• pressez vosse citron, po l’ djus s’ maxhî a l’ aiwe.
• passez vosse maxheure dins ene passete.
• metoz l’ aiwe dins des botayes a wårder å frigo ou dins ene froede plaece.
• schoyoz vosse passete dins on ptit bocå, et l’ rispåmer avou del prôpe aiwe dins ç’ bocå la : c’ est çoula ki frè del simince po rfé vosse kefir li côp ki vént. Avou on pô d’ souke, i s’ va wårder kékes djoûs. Si vos l’ vloz wårder pus lontins, ricandjîz l’ aiwe tos les deus troes djoûs et rmete on pô d’ souke tchaeke côp.