Krev-maizo

Aparato por krev-maizo, uzata heme, kun krevita maizo.

Krev-maizo esas rostita grani di maizo qua por specale ca skopo esas kultivata, maxim ofte Zea mays ssp. mays.

Krev-maizo ofte esas servata kun fuzita butro e sukro o salo. Krev-maizo povas esar preparata heme, en kasrolo kun lido, o mem en vakua lada kontenilo (buxo, bidono). Pro ke la procedo lasas harda brulita restaji, multa homi uzas anciena kasrolo. Anke existas mashini por preparar krev-maizo, ed existas forjetebla pakaji qui povas esar pozit en mikro-ondoforno.

Manjar krev-maizo precipue asociesas a spektar filmo, precipue en cinemi, ma anke heme. Ca asocio kopiesis del Usa. Krev-maizo ofte esas obtenebla en cinemi, konseque pendas penetrant odoro de krev-maizo.