Leonid Kravcuk

**Leonid Kravcuk**

Moted:	10 yanul 1934 Velykyi Zhytyn[*]
Deadam:	10 mayul 2022 München
Cal(s):	hibolitan[], hikonömavan[]
Tatät(s):	Sovyätabalatam, Lukrayän, Polän
Matan(s):	Antonina Kravchuk[*]
Cil(s):	Oleksandr Kravchuk[*]
Resodatoped calöfik:	https://leonid-kravchuk.com.ua/
Dispenäd:

Hiel ‚Leonid Makarovüc Kravcuk’ (Lukrayänapüko: ‚Леонід Макарович Кравчук’; pemotöl tü 1934, yanula d. 10^id tö ‚Velüküy Jütün’ in Volünän, nutimo in Lukrayän; edeadöl tü 2022, mayula d. 10^id in ‚München’ in Deutän) äbinom bolitan Lukrayänik, kel dü yels: 1991–1994 ‹ äbinom presidal balid Lukrayäna nesekidik pos säbinädikam Sovyätabalatama.

Lifajenäd

El ‚Leonid Kravcuk’ pämotom in vilag: ‚Velüküy Jütün’ in Volünän, kel ätimo ätopon in Polän e pos volakrig telid evedon dil Sovyätabalatama. Ästudom konömavi in ‚Küyiv’, kö pägredätükom ün 1958, ed ävobom as tidan. Ün yel ot ävedom liman paleta kobädimik Sovyätabalatama, pro kel ävobom dü yels mödik pö räyun propagida. Ävedom paletasekretan paleta kobädimik Lukrayäna (‚K.P.U.’) tefü lejon dialik ün 1988 äsi limasteifädan (ün 1989) e liman (ün 1990) bolitabüra paleta at.

Tü 1990, yulula 3^id el ‚Kravcuk’ ävedom i presidan sovyäta löpikün Sovyätarepüblika sogädimik Lukrayänika. Kodü fainikam nämäda paleta kobädimik atos äsinifon, das jenöfo äbinom dugan repüblika. Ün yel ot älüvom paleti kobädimik. Do el ‚Kravcuk’ äbinom saman patedik ela ‚apparatcik’, ritöf oma äfeamufikon vifiko lüodü utans, kels äslopons nesekidi Lukrayäna.

Pos luvolut imiplöpöl in ‚Moskva’, ‚Kravcuk’ änotädom nesekidi Lukrayäna, e dubo äpledom rouli lonädik demü säbinädikam Sovyätabalatama. Tü 1991, dekula d. 1^id pädavälom ad presidal Lukrayäna as steifädan nenpaletik. As presidal äbinom kefünan (kobü presidalas Rusäna e Vieta⸗Rusäna: ‚Boris Yälzin’ e ‚Stanislav Jujkevic’) kobäläna tatas nesekidik ed älesiom, das el ‚K.T.N.’ no ävedon Sovyätabalatam telid, ab bis kevoböf tatas voiko nesekidikas.

Ün yel: 1994 ‹ ‚Kravcuk’ ästeifadom dönu ad presidal, ab päperädükom fa läxreiganefapresidan: hiel ‚Leonid Kujma’. Pos peräd oka ävedom depütäb in dail Lukrayänik ä liman paleta sogädademokratimik pebalöla Lukrayäna (ela ‚SDPU(o)’). Äbinom cif paleta at de 2002 jü 2006. In presidaladaväls yela: 2004 ‹ äslopom steifädi hiela ‚Viktor Yanukovüc’. Ün 2006 el ‚SDPU(o)’ no äplöpon ad bemastikon davälastöbi, sodas ‚Kravcuk’ äperom pladi oka in dail. Ün 2009 älüvom paleti, kel pätanon ku dustostans liegikün e krimöf penoganüköl. In presidaladaväls yela: 2010 ‹ äslopom jisteifädani votastidimik: ‚Yuliya Tümojänko’.

Pos nütatak Rusäna ini Lukrayän ün febul yela: 2022 ‹ el ‚Kravcuk’, kobü läxpresidals: ‚Leonid Kucma’ e ‚Viktor Yujcänko’, japiko äblamom komipiäl Rusänik.^[1]

Magodem

Presidals Lukrayäna, Vieta⸗Rusäna e Rusäna: ‚Leonid Kravcuk’, ‚Stanislav Jujkevic’ e ‚Boris Yälzin’ dispenoms fini Sovyätabalatama ün 1991.
El ‚Kravcuk’ ko presidal Kasakäna: ‚Nursultan Nasarbayäv’ ün 1991.
El ‚Kravcuk’ in löpadail Poläna (2013).
Ked telid: läxpresidals fol Lukrayäna timü cälodam presidala nulik: ‚Volodümür Selänsküy’ ‹ ün 2019. De nedet jü det: ‚Petro Porojänko’, ‚Viktor Yujcänko’, ‚Leonid Kucma’, ‚Leonid Kravcuk’.

Noets

↑ "Ви вщент знищили віковий міф про велич Росії": Кравчук, Кучма і Ющенко звернулися до українців. TSN, 2022 febul 27^id.

Dugans Lukrayäna sis yel 1917
Pöparepüblik Lukrayänik	Presidan zänacäma: Müqaylo Hrujävsküy (1917-1918)
Tat Lukrayänik	El ,hetman’: Pavlo Skoropadsküy (1918)
Pöparepüblik Lukrayänik	Cifs dilekanefa: Volodümür Vünnücänko (1918-1919) • Sümon Pätlyura (1919-1920)
Pöparepüblik Vesüda⸗Lukrayänik	Presidal: Yävhän Petrujevüc (1918-1919)
Sovyätarepüblik Sogädimik Lukrayänik	Lesekretans ü sekretans balid Paleta Kobädimik Lukrayäna: Yuriy Pyatakov (1919) • Stanislav Kosior (1919-1920) • Vyaceslav Molotov (1920-1921) • Feliks Kon (1921) • Dmütro Manuyilsküy (1921-1923) • Emanuyil Kviring (1923-1925) • Lasar Kaganovic (1925-1928) • Stanislav Kosior (1928-1938) • Nikita Qrujcov (1938-1947) • Lasar Kaganovic (1947) • Nikita Qrujcov (1947-1949) • Leonid Mälnikov (1949-1953) • Olexiy Kürücänko (1953-1957) • Mükola Pidhornüy (1957-1963) • Petro Jeläst (1963-1972) • Volodümür Jcärbüzküy (1972-1989) • Volodümür Ivajko (1989-1990) • Stanislav Huränko (1990-1991)
Lukrayän nesumätik	Cif tataguvanefa: Yaroslav Stäzko (1941)
Lukrayän nensekidik	Presidals: Leonid Kravcuk (1991-1994) • Leonid Kucma (1994-2005) • Viktor Yujcänko (2005-2010) • Viktor Yanukovüc (2010-2014) • Olexandr Turcünov (2014) • Petro Porojänko (2014-2019) • Volodümür Selänsküy (sis 2019)

[1] "Ви вщент знищили віковий міф про велич Росії": Кравчук, Кучма і Ющенко звернулися до українців. TSN, 2022 febul 27^id.

[1]