Liektovs

Liektovs - sonkesnės ož uora uorlaivės, torontės varīkli, īr kelams sparnū. Liektovams priskėrami - vėinsparnis liektovs, dvėsparnis liektovs (biplans) ė trėsparnis liektovs (triplans). Retās atvejēs pasėtaika ė specėfėniu konstrukcėju, tuokiu kāp skrendontis sparns, aba sparnų natorons skrendontis kūns. Tonkiausē liektovā skėrstuomi i tas kateguorėjės:

Palē paskīrėma: vainuos aba torontis gėnkloutė, aba civilinē
Palē skrėdėma atstoma: vėitėni, artėma, vėdotėni ė tuolėma skrėdėma atstoma
Palē varīklė tėpa: rektyvinę i su imontoutu sraigtu
Palē dėdliausi skrėdėma atstoma: vėršgarsėnē ėr ikigarsėnē
Palē lėimens tėpa: vėinlėimenē, dvėlėimenē ė belėimenē
Palē kīlėma ė topėma būda: kīlontis vertėkalē, trompa ėr ėlga kīlėma
Palē pilotavėma būda: pilotoujamė ė nepilotoujamė
Palē varīkliu skaitliu ė anū tėpa: dažniausē liektovā tor nu 1 ligė 8 varīkliu

Svarbiausės liektova dalis: lėimou, sparnā, važiuoklė, oudega, varīklis, valdīma ėr elektras ironga. Liektuvou būtėns uors ėr atvėrs pluots pakėltė ė nusileistė. Daugomā liektovu rēk uora ousta aba aerodruoma. Iprastā liektovā kīl ė tūp ont žemės, ale īr liektovu, pritaikītu kėltė nu leda, snėiga aba net nu ondėns.

Svarbiausė nutėkėmā, sosėjė̄n so liektovās: George Cayley (1773-1857 m.) īr laikuoms dabartėnė čiesa liektova kūriejo. Gabriel Voisin 1905 m. Parīžiou sokūrė pėrmuoji hidroplana (liektova, katros kīl nu ondėns pavėršiaus) 1912 m. spalė 16d. ivėkdīta pėrmuojė vainas operacėjė su liektuvo. 1919 m. bėrželi ivīka pėrms skrīdis be sustuojėma per Atlanta ondėnīna. 1968–1969 m. pristatītė pėrmė̄jė keleiviu vėršgarsėnē liektovā Concorde ė TU-144. Ale diel konstrukcėniu biedū masėškā neėšpopulērėjė. 2000 m. sodūža pėrms Concorde liektovs. Užsėdegos anuo vėinam ėš varīkliu, kėik čiesa paskrėda ė grētā nokrėta žemīn. Žova vėsė žmuonis. 1981 m. svieta ėšvīda naikėntovs F-117. 1988 m. parbūdavuots dėdliausis svietė kruovėnėnis liektovs AN-225. Torons šešės varīklios, ans bova skėrts SSRS kuosmėnē programā „Buran“. Anai nutrūkos, liektovs bova vieliau modifikouts ė pritaikīts kruovėniams gabentė. Ėšvėin gal ons gabentė daugiau nekāp 200 tuonu kruovėniu. 2005 m. pėrmuoji miegėnėma skrīdi atlėka Airbus A380 liektovs - dėdliausis ligė šiuol pagamėnts keleiviu liektovs. Anou gal skrėstė nu 500 ligė 800 keleiviu.