Lu
Un danvez pennad eo ar pennad-mañ ha labour zo d'ober c'hoazh a-raok e beurechuiñ.
Gallout a rit skoazellañ Wikipedia dre glokaat anezhañ.
Evit implijoù all, gwelet Lu (disheñvelout).
| Iskevrennad eus | aozadur armet  |
|---|---|
| Arvez | military affairs |
| Tachenn labour | military science, military affairs |
| Studiet gant | military history, military sociology |
Un arme, ul lu (liester : luioù pe luoz gant Meven Mordiern) a reer eus ur strollad tud armet, pe eus hollad an dud armet ez-reoliek war tiriad ur riez pe ur vroad.
Koulskoude e c'heller gwelout luioù ha n'int ket bodet gant ur riez ofisiel. O vezañ er-maez eus al lezenn etrebroadel e c'hellont bezañ trec'h war lu ar riez m'emaint o stourm outañ ha dre-se sevel ur riez nevez, pe bezañ trec'het, pe tizhout ur feur-emglev peoc'h.
Ul lu a c'hell ivez bezañ nann-milourel pa dalvez ar ger kement ha kalz tud bodet diouzh o intent (Lu ar Salvidigezh da skouer) pe diouzh o stadoù (lu an dud dilabour). Hogos an holl riezoù o deus ul lu ofisiel, war-bouez ar re vihanañ (Monaco, San Marino ha Liechtenstein, da skouer) ha n'eus ket a nerzh milourel e Stad Costa Rica dre m'eo berzhet gant he bonreizh.
-
Broioù hervez an niver a soudarded evit 1000 den e 2020
Aozadur hollek al luioù
[kemmañ | kemmañ ar vammenn]En ur riez ha seul vui ma vezont niverus e c'heller envel "lu" eus un nebeud korfoù milourel kenstrollet. Al luioù-se a vez roet un niver dezho hag ur pennjeneral en o fenn.
Da skouer, pep rann an talbenn brezel a zo dezhañ ul lu evit stourm war an hed termenet evitañ. War an dachenn vrezel a-bezh e c'hell bezañ ul lu tachenn rannet etre rannluioù o zo renet o obererezhioù brezel gant ur penngarter, sez ar pennjeneral. Hemañ a glask lec'hiañ mat ar rannoùluioù, kas darn anezho da lec'hioù an talbenn ma 'z eus ezhomm evit difenn ur bastell-vro pe bouezañ war an enebour.
Rummoù al luioù
[kemmañ | kemmañ ar vammenn]Peurliesañ e vez rannet lu ur riez hervez an araezioù treuzdougen arveret evit brezeliñ warno.
- An tirlu pe arme-douar, ennañ soudarded war droad, gopret, bodet e rann an droadegiezh. Gwechall ez ae an droadeien war droad end-eeun, met hiziv e vezont treuzdouget e e kirri ordinal pe hobregonet.
- An aerlu evit an nerzhioù milourel treuzdouget gant nijerezioù ha biñsaskelloù.
- ar morlu evit an nerzhioù milourel treuzdouget gant listri gorre ha listri-spluj. Koulskoude e c'heller kavout listri pe nijerezioù e rannluioù-douar 'zo ha soudarded gouest da stourm war an douar goude bezañ bet treuzdouget war listri (troadegiezh ar morlu).
- ar gwardoù-bro, anvet "milisoù" ivez diwar ar galleg, n'int ket luioù e pep degouezh : a-wechoù e harpont al lu reoliek pe a-wechoù ez int nerzhioù polis milouriet.
