Malacca
Malacca es una vila de Malàisia situat sus la riba meridionala de l'Estrech de Malacca. Es la capitala de l'Estat de Malacca e sa populacion èra de 455 300 abitants en 2009. Pòrt pus ancian dau país, aguèt lòngtemps un ròtle politic e economic important en causa de sa posicion estrategica.
Fondat en 1396, lo pòrt de Malacca èra situat a un endrech estrategic dau comèrci asiatic de la fin de l'Edat Mejana. Au començament dau sègle XVI, aquò li permetiá de venir lo centre d'un sultanat que venguèt la premiera poissança dau Sud-Èst Asiatic. La ciutat èra alora poblada de 100 000 a 300 000 abitants (compres leis esclaus) e sa zòna d'influéncia s'estendiá en Mar de China Meridionala e sus la màger part de l'archipèu indonesian. En 1511, la vila foguèt conquistada per lei Portugués que l'utilizèron coma basa principala de son ret marchand en Asia dau Sud-Èst. Ne'n gardèron lo contraròtle fins a 1641 quand la vila foguèt presa per lei Olandés. Aquò marquèt l'acomençament de son declin car leis Olandés donèron pauc a pauc la prioritat au desvolopament de Batavia. En 1824, aviá plus gaire d'importància e foguèt donada au Reialme Unit dins l'encastre dau partiment de la region entre Britanics e Neerlandés. Foguèt integrada au sen de la Malàisia Britanica que venguèt independenta en 1956.