Nuova Compagnia di Canto Popolare

'A Nuova Compagnia di Canto Popolare o NCCP è nu gruppo musecale napulitano criatose 'ind'ô 1970 cu 'o scopo 'e spannere 'e valure rigginale d' 'a tradizione d' 'o popolo campano.

'A NCCP è na cosa rivoluzionaria,'nu veru "riscatto" ppe 'a museca popolare,'nu tipo 'e museca 'nfino a tanno cunziderata cosa 'e nient',ca però se facette notà grazie a 'o maestro Roberto De Simone e 'a nu gruppo 'e giuvane 'e talento.

Grazie a studie filologgeche e ricerche etnomusecologgeche,chisti giuvane sonano cu succiesso 'a museca popolare campana 'ind'ô stile sujo rigginale,cu 'a forza d' 'e voce 'ruosse e d' 'e gieste triatale.'O straordinario succiesso ca 'o gruppo avette a 'o Festival 'e Spoleto d' 'o 1972 e 1974 servette pp' 'e ffà canoscere a leviello 'nternazziunale.'A tanno 'a NCCP ha stato a tutte 'e cchiù 'mpurtante Festival 'e ll'Europa e oltreoceano sia cu 'nterpretazziune triatale ca musecale.

'A fine 'e ll'anne sittanta na parta d' 'o gruppo lassaje 'a NCCP,abbiaje accussì nu periedo 'e crisi ppe 'a museca popolare,ma 'o gruppo rummanette fedele a 'o scopo sujo 'e continuaje a gghì a 'e maggiure festival 'taliane e 'nternazziunale.

'O 1992 vede 'o ritorno d' 'a NCCP cu ll'albùm Medina,'ngopp'â ll'onna d' 'a world music.D' 'o gruppo rigginale arrumaneno sulamente Fausta Vetere e Corrado Sfogli(ajjonto 'ind'ô 1976).'O 'ruosso succiesso 'e ll'albùm arape ppe lloro 'e pporte d' 'o Mar Mediterraneo ma pure d' 'o festival 'e Sanremo addò venceno 'o Premio d' 'a Critica cu 'a canzone Pe Dispietto.'Ind'ô 1995 cu ll'albùm Tzigari s'vede 'o ritorno a 'o stile rigginale d' 'a NCCP ca se cunfermaje ll'anno ca venette 'ind'â ll'albùm InCanto Acustico,'n arrecocchio d' 'e live cchiù belle d' 'e turnèe d' 'o 1996.

Sempe cu 'o genio 'e museca nova e rigginale 'ind'ô 1998 jesce Pesce d' 'o mare ca 'e pporta 'n'ata vota a Sanremo accà s'vedarrà 'a trasuta 'e 'n'atu membro Gianni Lamagna(ppe sustituì Giovanni Mauriello uno 'e ll'urdeme funnature a lassà).Pijeno parte a ll'albùm pure museciste 'e divierze genere musecale comme Angelo Branduardi,Zulu d' 'e 99 Posse e Marcello Colasurdo atu granne canoscitore d' 'a museca popolare campana.

'Ind'ô 2001 jesce ll'albùm La voce del grano,'n'albùm ca ammesca sunate napulitane e mediterranee e ca porta n'ata vota 'o gruppo 'ind'ê prencepale cità d' 'o munno,'ind'ô 2005 a finale vene pubblecato ll'albùm Candelora,ll'urdema fatica discografeca d' 'a NCCP,albùm ca ammesca 'a canzone classeca napulitana cu nu pucurillo 'e rap.

Discografia

• Cicerenella (1972)
• Lo guarracino (1972)
• La serpe a Carolina (1972)
• NCCP (1973)
• Li sarracini adorano lu sole (1974)
• Tarantella ca nun và bbona (1975)
• La gatta Cenerentola (1976)
• 11 mesi e 29 giorni (1977)
• La cantata dei pastori (1977)
• Aggio girato lu munno (1978)
• Storie di fantanasia (1981)
• Medina(1992)
• Tzigari (1995)
• InCanto acustico (1996)
• Pesce d' 'o mare (1998)
• La voce del grano (2001)
• Candelora (2005)