Planeta
| Planeta | |
|---|---|
| tipu d'oxetu astronómicu | |
planemo (es)  y objeto subestelar (es) | |
 | |
 |
Un planeta[1] ye un cuerpu celeste qu'orbita alredor d'una estrella o un restu estelar, ye grande abondo pa tar arrodiáu pela so propia gravedá, nun ye grande abondo pa producir la fusión termonuclear y, acordies col criteriu de la Xunión Astronómica Internacional (XAI), que nun ye compartíu por tolos planetólogos, tien llimpiao la so órbita de planetesimales, esto ye, tien dominancia orbital[2].
El términu planeta ye un términu antiguu, con resonancies históriques, astrolóxiques, científiques, mitolóxiques y relixoses. Hai cinco planetes del Sistema Solar, amás de la Tierra,que son visibles a simple vista, y que foron vistos por munches cultures primitives como dioses o emisarios de los dioses. L'avance del conocimientu científicu fizo cambiar la percepción humana sobre los planetes, y entamó a aplicase esti nome a bien d'oxetos de carauterístiques estremaes. En 2006 la Xunión Astronómica Internacional adoptó una resolución que define lo que ye un planeta nel Sistema Solar. La definición ye controvertida, porque esclúi oxetos de masa planetaria basándose en aú o alredor de qué orbiten. Magar que ocho de los cuerpos planetarios descubiertos primero de 1950 siguen siendo planetes, acordies cola nueva definición, hai otros cuerpos celestes, como Ceres, Palas, Juno y Vesta, caún un cuerpu celeste del cinturón d'asteroides, y Plutón, el primer oxetu estelar tresneptunianu descubiertu, que foran consideraos planetas pola comunidá científica, perdieron esa categoría cola nueva definición.
Toloméu creyía que los planetes orbitaben la Tierra con movimientos epicíclicos. Magar que la idea de qu'orbitaben alredor del Sol fora suxerida delles veces, nun sería hasta'l sieglu XVII cuando esta intuición fora confirmada a partir de les primeres observaciones astronómiques feches, por Galileo Galilei, con un telescopiu. Al tiempu, al traviés del analís cuidadosu de los datos observaciones obteníos, primeru del descubrimientu del telescopiu, por Tycho Brahe, Johannes Kepler concluyó que les órbites de los planetes nun yeren circulares, sinón elíptiques. Al dir ameyorando los instrumentos d'observación los astrónomos decatáronse de que, neto que la Tierra, los demás planetes rotaben alredor d'un exe inclináu con respectu al so polu orbital, y dellos compartíen col nuestru planeta otres carauterístiques, como la presencia de casquetes polares o estaciones. Nes caberes décades, l'únviu de sondes espaciales permitió comprobar que les carauterístiques compartíes pola Tierra y los otros planetes son aún más: el vulcanismu, los furacanes, la esistencia de l'actividá tectónica y, inclusive, la hidroloxía.
Los planetes del Sistema Solar son de dos tipos principales: grandes planetes xigantes gaseosos de baxa densidá, y planetes rocosos, nomaos terrestres, más pequeños. Acordies cola definición de la XAI[2] hai ocho planetes, que son, n'orde de distancia creciente al Sol, cuatro terrestres, Mercuriu, Venus, Tierra y Marte, y cuatru xigantes gaseosos: Xúpiter, Saturnu, Uranu y Neptunu. Seis de los planetes son orbitaos por ún o más satélites naturales.
Fuera del Sistema Solar, na Vía Lláctea, tienen descubiértose varios miles de planetes, nomaos planetes estrasolares o exoplanetes. A 1 d'avientu de 2020 hai catalogaos 4.379 planetes estrasolares en 3.237 sistemes planetarios, de los que 717 son sistemes planetarios múltiples. No que cinca al tamañu d'estos exoplanetes hailos dende tan pequeños como la Lluna hasta'l doble de grandes que Xúpiter. Más de 100 son d'un tamañu asemeyáu al de la Tierra, y nueve tán a la mesma distancia relativa de la so estrella que la Tierra del Sol, esto ye, na so zona d'habitabilidá[3][4]. El descubrimientu de los primeros d'estos exoplanetes de tamañu semeyante a la Tierra foi publicáu el 20 d'avientu de 2011 pol equipu que trabayaba nel telescopiu espacial Kepler: son los planetes nomaos Kepler-20e y Kepler-20f, qu'orbiten una estrella de tamañu similar al solar, la Kepler-20[5][6][7]. Un estudiu publicáu en 2012, qu'analizó los datos recoyíos con microlentes gravitacionales, estimó qu'había una media de al menos 1,6 planetes orbitando alredor de cada estrella de la Vía Lláctea[8]. Amás, piénsase qu'una de cada cinco estrelles asemeyaes al Sol puede tener un planeta del tamañu de la Tierra na so zona habitable[9][10].
Los planetes del sistema solar
[editar | editar la fonte]
Nel sistema solar hai ocho planetes que graviten alredor del Sol:
Etimoloxía y cronoloxía de les observaciones
[editar | editar la fonte]La pallabra planeta vien, al traviés del llatín, de la forma griega πλανήτης, derivada del verbu πλαναω (esviar del camín, andar al debalu) . La espresión πλανήτης αστέρες (astros que se mueven) estremaba a los planetes de les estrelles, que se mantienen inmóviles nel firmamentu.
Asina, la pallabra planeta usábase na antigua astronomía xeocéntrica pa designar a los siete astros visibles a simple vista y que se desplacen con respectu a les estrelles del firmamentu: el Sol, la Lluna, Mercuriu, Venus, Marte, Xúpiter y Saturnu.
Cola teoría heliocéntrica de Nicolás Copérnicu, la tierra pasó a tar considerada un planeta y el sol y la lluna dexaron de selo, quedando reducíu a seis el númberu de planetes.
En 1781, William Herschel descubrió Uranu; en 1846, Johann Gottfried Galle y Urbain Le Verrier, basándose nes perturbaciones gravitacionales exercíes sobre Uranu, señalaron la esistencia de Neptunu. Por fin, en 1930, Clyde Tombaugh descubrió Plutón, que sería consideráu planeta hasta'l 24 d'agostu de 2006, que pasaría a nomase planeta nanu.
Definición de los planetes
[editar | editar la fonte]El descubrimientu de dellos oxetos asemeyaos a Plutón, como Sedna o 2003 UB313 punxo n'entredichu la definición tradicional del términu planeta. Dellos científicos proponen quitar a Plutón de la llista de los planetes y en cambiu otros proponen ampliar esta llista colos oxetos tresneptúnicos que formen parte del cinturón de Kuiper .
Según la definición que se -y dea al términu planeta, el so númberu ye diferente. Asina, l'Academia Nacional de ciencies de los Estaos Xuníos considera que un planeta ye un cuerpu de menos de dos mases xupiterines que gravita alredor d'una estrella. Según esti criteriu, 2003 UB313 diba ser el décimu planeta del sistema solar.
Sicasí nun hai anguaño consensu nuna definición. En 2005 Michel E. Brown propunxo varies diferentes:
- Si aceptamos el puntu de vista históricu , los planetas son nueve : Mercuriu, Venus, la Tierra, Marte, Xúpiter, Saturnu, Uranu, Neptunu y Plutón.
- Según el puntu de vista históricu puestu al día han de tenese en cuenta los nuevos descubrimientos. Tienen asina la consideración de planeta tolos anteriores y cualquier oxetu nuevu que se descubra mayor que Plutón.
- El criteriu de la esfera gravitacional, define como planeta acualquier oxetu arredondiáu pola mor de la so fuercia gravitacional que gravita direutamente alredor del sol y, por estensión d'una estrella. Según esta definición, el cuerpu Ceres del cinturón d'asteroides forma parte de los planetes.
Otros sistemes planetarios
[editar | editar la fonte]Dende qu'en 1995 se descubrió'l primer planeta estrasolar o exoplaneta, tiense la certeza de qu'esisten otros planetes alredor d'otres estrelles.
D'entós pa acá identificáronse más de 170, lo que paez indicar que la esistencia de planetes estrasolares ye bastante corriente. Anque tolos detectaos hasta agora son planetes xigantes, polo menos de la talla de Xúpiter o Neptunu, los astrónomos esperen alcontrar dalgún planeta de carauterístiques similares a la Tierra, lo que podía xustificar les investigaciones sobre la posible vida estraterrestre.
Tipoloxía y formación de planetes
[editar | editar la fonte]Considérase que los planetes fórmense al tiempou que la so estrella por acrecimientu y condensación d'una nube de gas y de materia interestelar baxo influencia de la gravitación.
Los cuerpos planetarios nacen de les perturbaciones nel discu d'acrecimientu y atrayen oxetos nel so campu gravitacional. Esta fase de creación realízase por impautos sucesivos d'oxetos que circulen nel espaciu a velocidaes relativamente importantes (ente varios quilómetros y decenes de quilómetros por segundu ), produciéndose una gran cantidá de calor en cada colisión.
Los planetas formaos de recién tán asina compuestos de materiales en fusión, y la calor pu conservase varios millones d'años si la superficie enfría lo bastante pa endurecer en froma de roques o de gas.
Puen esistir dos tipos de planetes: los planetes gaseosos y los planetes telúricos (o rocosos)
Referencies
[editar | editar la fonte]- ↑ Esti términu apaez nel Diccionariu de l'Academia de la Llingua Asturiana. Ver: planeta
- ↑ 2,0 2,1 IAU General Assembly: Results of the IAU Resolution votes. International Astronomical Union, 2006.
- ↑ NASA discovery doubles the number of known planets. Noticia del diariu USA Today del 10 de mayu de 2016.
- ↑ Schneider J, Interactive Extra-solar Planets Catalog, en The Extrasolar Planets Encyclopaedia. 16 de xineru de 2013.
- ↑ Johnson M, NASA Discovers First Earth-size Planets Beyond Our Solar System Archiváu 2019-05-04 en Wayback Machine. NASA, 20 d'avientu de 2011.
- ↑ Hand E, Kepler discovers first Earth-sized exoplanets. Nature, 20 d'avientu de 2011. doi:10.1038/nature.2011.9688
- ↑ Overbye D, Two Earth-Size Planets Are Discovered. Artículu del The New York Times (20 d'avientu de 2011).
- ↑ Cassan A, Kubas D, Beaulieu JP, Dominik M et al. One or more bound planets per Milky Way star from microlensing observations. Nature, 481(7380):167-9. doi:10.1038/nature10684
- ↑ Sanders R, Astronomers answers key question: How common are habitable planets?, artículu na web de la Universidá de Berkeley (4 de payares de 2013).
- ↑ Petigura EA, Howard AW, Marcy GW, Prevalence of Earth-size planets orbiting Sun-size stars. Proceedings of the National Academy of Sciences, 110 (48):19273-19278.
