Recife

Recife
Kaart	Wapen



	Vlag


Land	Brasilië
Deelstaat	Pernambuco
Koördinate	08°03′S 34°54′W / 8.050°S 34.900°W / -8.050; -34.900
Gestig op	12 Maart 1537
Inkorporasie as 'n dorp	1709
Inkorporasie as 'n stad	1823
Oppervlakte:
- Totaal	218 vk km
Hoogte bo seevlak	10 m
Bevolking:
- Totaal (2020)	1 653 461
- Bevolkingsdigtheid	7 133,2/vk km
- Metropolitaanse gebied	3 743 854
Tydsone	UTC -3 (BRT)
Burgemeester	João Henrique Campos (PSB)
Amptelike webwerf	recife.pe.gov.br

Recife (Portugees: [ʁeˈsifi], luister (hulp·inligting)) is die hoofstad van die Brasiliaanse deelstaat Pernambuco en lê ongeveer 100 km onder die mees oostelike punt van die Suid-Amerikaanse vasteland. Die stad self huisves 1,6 miljoen inwoners en die metropolitaanse gebied ongeveer 3 miljoen. Die stad lê op die walle van die Beberibe- en Capibariberivier. Beide riviere mond hier uit in die Atlantiese Oseaan.

Geskiedenis

Die area rondom Recife was een van die eerstes in Brasilië waar die Portugese 'n gemeenskap gevestig het.

In 1534 het Johannes III van Portugal Brasilië in verskillende oorerflike Kapteinskappe ("Capitanias Hereditárias" in Portugees) verdeel; die Portugese het besef dat hulle nie die menslike of finansiële bronne gehad het om in so 'n uitgebreide en veraf kolonie te belê nie en het besluit om die taak aan private entrepreneurs oor te laat, genoem "Donatários" (hierdie sisteem was toe reeds suksesvol geïmplimenteer in die Portugese kolonies in Afrika).

Die meeste Kapteinskappe het egter gefaal, grootliks as gevolg van te min ondersteuning van die Portugese metropolis. Een van die min wat gefloreer het was die Kapteinskap van Pernambuco, waarin Recife geleë is.

Vanaf 1630 tot 1654 was 'n groot deel van Brasilië onder Nederlandse bewind (Nederlands-Brasilië). Die hoofstad van Nederlands-Brasilië was Recife (die stad het toe as Mauritsstad bekend gestaan). Die Nederlandse fort Cinco Pontas in die stadsentrum herinner nog aan hierdie tyd. Tydens hierdie tydperk is die eerste sinagoge in die Amerikas gestig. Die Nederlanders is egter verdryf deur 'n leërtjie van Portugese en plaaslike opstandelinge. Hierdie opstand staan vandag bekend as die 'Restauração Pernambucana'. Die grootste deel van die Joodse gemeenskap het gevlug na Amsterdam en sommige na Noord-Amerika, waar hulle die eerste Joodse gemeenskap in Nieu-Amsterdam oprig, asook die Karibiese gebied.

Gedurende die 18e eeu het opstande dwarsoor die stad uitgebreek waarin die ryk boere van Olinda en die handelaars van Recife gebots het. Recife had 'n groot voordeel oor Olinda: Olinda het nie 'n hawe nie, terwyl Recife een van die beste aan die Atlantiese Oseaan het. Recife se bourgeoisie het 'n oorwinning behaal oor die dekadente suikeraristokrate van Olinda. Dit was 'n beslissende faktor in Recife se groei. Recife is vandag 'n groot stad terwyl Olinda 'n klein historiese dorpie is.

Recife se Estádio Ilha do Retiro is tydens die FIFA Sokker-Wêreldbekertoernooi in 1950 vir wedstryde ingespan, terwyl tydens beide die FIFA Sokker-Konfederasiebeker in 2013 en FIFA Sokker-Wêreldbekertoernooi in 2014 van die Arena Pernambuco gebruik gemaak is.