Regno d''e Ddoje Sicilie

Regno d"e Ddoje Sicilie
(dettaglie) (dettaglie)
Regno d"e Ddoje Sicilie - Localizzazione
Date ammenistrative
Nomme ufficiale	Regno d"e Ddoje Sicilie
Lengue ufficiale	Taliano, latino.
Lengue parlate	Taliano, napulitano, siciliano, grieco, francoprovenzale, albanese, croato, occitano.
Inno	Inno ô Rre (Giovanni Paisiello)
Capitale	Napule (1817-1861)
Ate capitale	Paliermo (1816-1817)
Puliteca
Forma 'e guvierno	Munarchia
Re	Re d"o Regno d"e Ddoje Sicilie
Nasceta	1816 cu Ferdinando I
Causa	Aunione d"e regne 'e Napule e 'e Sicilia doppo 'o cungresso 'e Vienna.
Fine	1861 cu Francesco II
Causa	Occupazzione garibaldina e annessione ô Regno 'e Zardegna.
Territorio e populazzione
Bacino giugrafeco	Abruzzo ('nclusa Cittaducale), Mulise, Campania ('ncluse Sora e Gaieta), Puglia ('ncluse 'e isule Pelaguse), Baselecata, Calavria, Sicilia.
Territorio origginale	Sicilia, Italia Meridiunale.
Massima estensione	111.900 km² int'ô 1855/1858
Populazzione	9.000.000 ca. int'ô 1859
Suddivisione	22 pruvincie, 76 distrette, 684 circundarie
Economia
Valuta	Ducato, Grano (tarì, carlino, piastra), Tornese.
Cummerce cu	Impero britannico, Spagna, Franza, state taliane, state turesche, Belge, Danemarca, Sguezia, Impero russo, State Aunite d'Amereca, Impero Ottomano, Impero austriaco, Brasile.
Religgione e suggità
Religgiune preminente	Cattolicesemo
Religgione 'e Stato	Cattolicesemo
Religgiune minoritarie	Ortodossia, Protestantesemo.
Evoluzzione storica
Preceduto da	Regno 'e Napule Regno 'e Sicilia
Succeduto da	Regno d'Italia

'O Regno d''e Ddoje Sicilie fuje nu stato esistuto d' 'o 1816 ô 1861. Fuje 'o cchiù gruosso stato d''a penisula italeca apprimma d''a accussì ditta "aunificazione 'e ll'Italia" ('o stato italiano nun era stato maje custituito ancóra).

'O Regno venette addichiarato d' 'o rre Ferdinando 'e Burbone, quanno, 'int'o 1816, aropp'o Cungresso 'e Vienna e 'o Trattato 'e Casalanza, 'o suvrano lluvaje 'a miezo 'o Regno 'e Napule e 'o Regno 'e Sicilia cu' tutta 'a custituzzione ch' 'e sparteva, jognenno ll' uno cu' ll'ato. Ferdinando, 'nfatte, già primma 'e 'stu Cungresso, guadagnava stesso isso 'a curona napulitana (al di qua del Faro), comme Ferdinando IV, e chella siciliana (al di là del Faro), comme Ferdinando III.

Territorio

'O Regno cumprenneva chelle ca mmò songono 'e reggiune: Abruzzo, Basilicata, Calabbria, Campania, Mulise, Puglia e Sicilia, chiù gran parte 'e chello che mmò è 'o Lazzio meridiunale (Sora e Gaeta) e 'o Cicolano (distretto 'e Cittaducale), chella ca mò è ll'aria urientale d' 'a pruvincia 'e Rieti.

'A cità 'e Beneviento (ogge Campania) e Pontecorvo (ogge 'int'o Lazzio) ereno, 'mmece, 'nclave punteficie.

Riggene d' 'o nomme

Alfonso 'o Magnanimo, primmo Re d' 'e Ddoje Sicilie

'O nomme è assaje particulare pe' chello che d'è 'a storia d'Italia. 'A primma menziona ufficiale l'avimmo quanno Alfunso V d'Aragona, ditto "'o Magnanimo", jognette 'o Regno 'e Sicilia e 'o Regno 'e Napule sott'a curona 'e Rex Utriusque Siciliae. Ll' uso d' 'e pparole Regno 'e Sicilia "al di là del Faro" e Regno 'e Sicilia "al di qua del faro", e quinne 'o faro 'e Messina e 'o stretto cu'o stesso nomme, ave però riggene già quanno, 'ncurunato Carlo d'Angiò rex Siciliae 'a Clemente VI, 'a corte aragunese 'e Catania e Palermo cunziderava 'stu titolo comme fosse 'o suojo.

'A Pace 'e Caltabellotta, d'ô 1302, 'a dette essa 'sta spartuta (siconno ll'accuorde, muorto 'o rre aragunese Federico d'Aragona, ll'isula avessa avuto turnà a ll' Angiuine, cosa ca maje succedette).

Sutt'ô guvierno spagnuolo 'e dduje regne cuntinuajeno a essere innipenniente, uno cu' capitale Napule, ll'ato cu' capitale Paliermo.

Ô 1816, quanno se steveno oramai pe' se tenè sia 'o Cungresso 'e Vienna ca 'o Trattato 'e Casalanza, Regno 'e Napule e Regno 'e Sicilia fujeno p'â siconna vota ufficialmente riaunificate, aropp'a quase 600 anne, cu'o nomme 'e Regno d' 'e ddoje Sicilie.

Storia e puliteca d' ô regno

A primma vota che se parlaje 'e Ddoje Sicilie fuje dint'ô 1265, quanno Papa Clemente IV 'ncurunaje a Carlo d'Angiò e ausaje p'â primma vota 'o termine "Doje Sicilie". Mentre 'a primma vota che se parlaje aufficialmente 'e Regno d'ê Ddoje Sicilie fuje quanno Alfunso V d'Aragona aunifeca sulamente pe' nomme 'o Regno 'e Napule e 'o Regno 'e Sicilia sutt'â curona e REX UTRIUSQUE SICILIAE. Primma d'â Rivuluzzione franzesa d'ô 1789 e d' ê uerre napulioniche ca aroppo venetteno, 'a dinastia d'ê Burbone guvernava 'o stesso 'ngopp'a Napule e 'a Sicilia ,spartute però ll'uno cu' ll'ato (cu ll'isola 'e Malta comma cuncessiona territuriale p'ô Suvrano Melitare Urdeno 'e Malta). Generalmente s'ausa 'o termine "Regno d'ê ddoje Sicilie" pe' 'nzignà tutto 'o periedo ch'ê Burbone hanna guvirnato 'ngopp'a 'sti terre (a partì zoè d'ô 1734).

Carlo 'e Burbone

Carlo 'e Burbone

'O 10 'e majo 1734 Carlo 'e Burbone, figlio 'e Filippo V re 'e Spagna e d'Elisavetta Farnese, trasette a Napule; 'o 25 'e majo 1734 scunfeggiette definitivamente ll'austriace a Bitonto (Guerra 'e succissione pulacca), cunquistaje poje 'a Sicilia e 'o 2 'e jennaro 1735 addiventaje Rre 'e Napule "senza numerazione specifica"; a luglio venette 'ncurunato a Paliermo pure Re 'e Sicilia. Pe'tramente, cu' decreto 'e ll'8 'e giugno 1735, Carlo istituette 'a Real Camera 'e Santa Chiara, nuovo organo giurideco-ammenestrativo.

'O regno addivintaje effettivamente innipennente d'â Spagna sulo aroppo 'a pace 'e Vienna, 'ncap'ô 1738, ca chiudette 'a guerra 'e succissione pulacca. Siconno ll'accorde 'e 'sta pace, ll'Austria cedeva a Carlo III 'e Burbone 'o Stato d'ê Presidie, 'o Regno 'e Napule comme pure 'o Regno 'e Sicilia, ca stesso ll'Austria aveva scagnato cu'â Zardegna dint'o 1720 aropp'â Pace 'e ll'Aja, cunzignannola mman'o Piemonte. A aùsto d'ô 1744,'o Rial Esercito, cu'ô rre Carlo 'ncapa a tutte, scunfiggiette n'ata vota ll'austriace a Velletri, ca circavano 'e s'arrepiglià stesso chillu regno ch'aprimma aveveno arrefuso (Guerra 'e succissione austriaca).

'A situazzione puliteca ed ecunomica ca Carlo areditaje 'int'o 1734 steva 'nguajata comm'a cche,'o guvierno spagnuolo 'e primma , 'nfatte, aveva rignuto 'e tasse d'ô regno stesso, â siconna mmità d'ô viceregno spagnuolo 'ncopp'a tutto (quanno nce fuje cioè 'a rrevutata 'e Masaniello), comme pure p'ê guerre, ca vedeveno nu cuofano 'e napulitane 'mpignate a cumbattere a ll'Europa e all'Amereca (esempio 'int'o Tercio Viejo de Napoles), e ca purtajeno 'e campagne d' 'o regno a na ruìna e a n'abbandono ca fin'a tanno nun s'eva maje visto.

'A primma riforma c''o suvrano facette fuje chella ca vedeva abbolite nummarose privilege ecclesiastice: ô 1741, cu nu cuncurdato fujeno ridotte, ma assaje ridotte, 'o deritto d'asilo e ate immunità; 'e bene ecclesiastice fujeno poje tassate. Succiesse 'e 'sta manera nun s'avettero però pe' chello ca fuje nu tentativo d'abolizzione d' 'a feudalità: 'a classe d' 'e nobbele 'e cumbinaje 'e tutt'manere pe' nn' se vedè abbolite 'e priviliege ca pe' siecule ereno state a pieno deritto 'e lloro.

C' 'o guvierno 'e Carlo, ca c' 'e riforme d' 'e soje aveva criato nu regno novo, stabbile e forte, se reggistraje nu sviluppo 'e ll'econumia assaje nutevole, duvuto â acchianata d' 'a produzziona agricula e d' 'e scagne commerciale ca 'a chesta dipennevano. 'Stu ddijo 'e sviluppo fuje possibbele grazzje pure ê nummaruse trattate cummerciale e â lotta sempe meglio appriparata contro 'a pirateria moresca. Ô 1755 fuje istituito 'int'a ll'Univerzità 'e Napule 'a primma cattedra d' economia puliteca in Europa, chiammata "cattedra di commercio e di meccanica" affidata a nu masto teorico d'economia comm' Antonio Genovesi. 'E corze (pe' taliano e no in latino), friquintate assaje, fujono tenute, comme ditto aprimma, da Antonio Genovesi, uno d' 'e meglie illuministe 'e ll'Italia meridiunale. 'Stu sviluppo puliteco-economico d' 'e ddoje regne fuje parte 'e n'ebbreca ca 'nteressaje ll'Europa sana sana, ll'ebbreca d' 'o cussidditto "dispotismo illuminato".

Ferdinando IV e 'a repubbreca

Ô 1759, partuto Carlo, addivintato re 'e Spagna, sagliette comme rre all'età 'e sule 8 anne Ferdinando. Principale espuniente d' 'o Cunziglio 'e Reggenza fujeno Domenico Cattaneo, principe 'e San Nicandro, e 'o marchese Bernardo Tanucci. Asotto a 'sta reggenza, comme pure 'ind'o periedo appriesso, fuje principalmente Tanucci a s' 'a cummannà 'ngopp'e ddoje regne e a cuntinuà 'e riforme accumminciate asotto a Carlo. Pe' chello ca riguardava l'aspetto giurideco, prugresse assaje fujeno fatte 'a Tanucci pe' mmiezo 'e Gaetano Filangieri, ca, cu' ll'opera soja "Scienza della legislazione" (acumminciat'ô 1777), pô essere cunziderato uno d' 'e meglie precursore d' 'o deritto moderno.

Ô 1768 Ferdinando s' 'nzuraje cu' Maria Carolina, figlia 'e ll'imperatrice Maria Teresa e sora d' 'a riggina 'e Franza Maria Antonietta. 'A riggina (pe' vvija 'e nu 'ngrippo assaje curiuso pe' dinto 'e patte matremmunniale ca ll'cunzenteva 'e fà parte d' 'o Cunziglio 'e Stato d'ô juorno d' 'a nasceta 'e ll'erede ô trono), a differenza d' 'o marito,s' impignaje assaje p' 'o guvierno d' 'o regno. Ll' uniche parte, 'nfatte, addò Ferdinando s' impignaje overamente fujeno pe' ll'opere pubbleche, 'e rapporte cu'a Chiesa e 'a rializzazzione d' 'a colonia 'e San Leucio (Caserta), esperimento 'e legislazzione sociale e 'e sviluppo manifatturiero, pure si fuje stess'a riggina ca ispiraje 'o Codice d' 'e legge leuciane.

'E primm' anne 'e guvierno, Maria Carolina s'addimustraje na rinnovatrice e moderatamente favureule ô sustegno d' 'e libbertà innividuale. 'E cose cagnajeno però aroppo 'a Rivuluzzione Franzesa, quanno cu' ll' abbuccata d' 'a monarchia, ll'esecuzzione d' 'o Rre e ll' anne d' 'o "terrore" 'a nobiltà d'Europa s' appauraje sana sana , purtannose appriesso l'opposizzione a ogne tipo 'e riforma libberale. Aropp'a decapitazzione d' 'o rre e d' 'a riggina 'e Franza, 'e manere 'e repressione d' 'e Burbone 'e Napule purtajeno a na ddijo 'e crise 'nfra munarchia e classe intellettuale ca 'a tanno ogne 'mpegno d' 'a riggina p' 'o sviluppo d' 'o cussidditto "dispotismo illuminato", e quinne 'a cullabborazzione cu' ll'intellettuale stesse, fernette pe' sempe.

'E francise ereno già trasute all' Italia 'int'o 1796 cu' Napulione Bonaparte, ca già , una appriess'a n'ata, faceva carn'e maciello 'e ll'esercite austriace e d' 'e debbule guvierne lucale. Ô 1798, 'e francise occupajeno Romma. Nu tentativo napulitano pe' circà 'e fermà 'e francise nce fuje stesso chillo anno: 'o 23 'e ottovre, 70.000 uommene 'e ll'esercito napulitano, cummannate d' 'o generale austriaco Karl von Mack, trasetteno 'nd'o territorio d' 'a Repubbreca Rummana, ca stesso 'e francise 'eveno criato aroppo 'a cunquista d' 'a cità stessa, pe' sistimà 'o papa, ca pe'tramente era caduto, n'ata vota ô posto suojo, ma, 'o 14 'e dicembre appriesso, na cuntruffenziva francese custrignette subbeto subbeto 'e napulitane a se ritirà. L'operazzione fuje picciò n' insuccesso assaje gruosso, tanto ch' accussì 'e francise se truvajeno 'a vija araputa pe' Napule. 'O 22 'e dicembre 1798, 'o rre abbandunaje 'o Regno 'e Napule pe' se ne fujì â Sicilia, lassanno stesso Napule praticamente senza difesa ; ll' unice a s'opporre all'envasione francese (d'ô 13 'e jennaro ô 23 'e jennaro 1799) fujeno 'e cussidditte "lazzare". 'O populo se mettette a difesa d' 'a cità contr'e surdate 'e Napulione cu' na resistenza disperata ma forte assaje, comme ricette pure stesso 'o generale francese Championnet. 'E lazzare subbetteno pure nu bumbiardamento stesso d' 'e giacubbine napulitane ca ereno 'ngarrat'a trasì dinto Castel Sant'Elmo. 'A battaglia p' 'a cunquista d' 'a cità custaje 'a vita a mmerzo 8.000 napulitane e 1.000 francise. 'O 22 'e jennaro 1799 (siconn' ate 'o 21), ppe'tramente 'e lazzare n'ata vota cumbatteveno, 'e giacubbine napulitane ( mmiez'a chiste pure Mario Pagano, Francesco Lomonaco, Michele Granata, Domenico Cirillo, Nicola Fasulo, Carlo Lauberg, Giuseppe Logoteta) addichiarajeno 'a repubbleca. 'A Repubbreca Partenupea nun duraje assaje, 'nfatte s'abbuccaje 'ind'a niente ,pe' vvija 'e na dicisiva riazzione da parte 'e ll'ati putenze europee e p' 'o mancato sustegno d' 'e classe popolare, comme pure 'e chille territorie ch' 'e francise nun ereno occupate, a ll'ideale d' 'a Repubbleca stessa. 'O cuntrollo d' 'e francise 'ngopp'a Repubbleca fuje pesante assaje,'o genio 'e innipennenza d' 'a Repubbleca stessa fuje ,picciò, sempe assaje limitato.

'O guvierno repubbrecano 'ngarraje 'o stesso a purtà ll'innovazzione sperata ('ngopp'a tutto fernette 'a feudalità), ca però nun avetta pratica attuazzione 'ind'e cinche mise 'e vità d' 'a Repubbleca stessa. A liviello europeo, 'a Repubbleca sapette dà nu cuntribbuto intellettuale assaje gruosso, grazzje soprattutto ô movimento libberale meridiunale, comme 'o giurnale Monitore Napoletano, diretto da Eleonora Pimentel Fonseca, femmena 'mpignate anema e core 'ind'o sviluppo a Napule comme a tutto 'o Meridione d'Italia 'e ll'ideale demucratico, n' impegno ch' 'a purtaje a murì pe' mmano d' 'e restaurature na vota caduta 'a Repubbreca. 'Ind'e pruvincie s'avetteno assaje 'rrevutat'e popolo; fujeno nummarose ll'episodie 'e viulenza sia d' 'e repubblecane sia de' ll'"insorgenti" anti-repubblecane,comme pure chille fatte pe' mmano d' 'e francise. Accussì, si dint'e poche mise d' 'a repubbleca venetteno cundannate a morte e fucilate, aropp'a furmale pruciesse pulitece, 1.563 cittadine d' 'o Regno, altrettante pisante fuje 'o cumpurtamiento d' 'o ciussidditto Esercito d' 'a Santa Fede, quase cumpretamente n'eserceto addò nce steveno pupulane, lazzare e pure cierte brigante, comm'a Fra' Diavolo.

'O 13 'e giugno 1799, 'e sanfediste, cummannate d' 'o cardinale Fabrizio Ruffo, s'arrepigliajeno Napule turnannola arreto â monarchia burboneca (regnante, p' 'o periedo d' 'a Repubbleca, sulo ngopp'o Regno 'e Sicilia). Ppe'tramente, 'o 7 'e majo, 'a cità 'e Napule s'eva già già stata abbannunata d'ê francise, chiammate ô Nord d'Italia pe' vvija ca ll'esercito russo 'e Suvorov aveva passato 'o cunfine d' 'a Penisula ('o 29 'e majo abbandunarranno pur'a Repubbreca Cisalpina). 'E francise, fujenno, se purtajeno appriesso nu bottino d' opere d'arte gruosso assaje (arrubbato d' 'e chiese e d' 'e residenze nobbiliare napulitane). 'Ind'e mise ca venetteno, na cummissione annummenata da Ferdinando accummenciaje 'e pruciesse contro 'e repubblecane: 'ngopp'a mmerzo 8.000 priggiuniere, 124 venetteno cundannate a morte, 222 all'ergastolo (mmiez'a chiste 6 grazziate d' 'a pena capitale), 322 a cundanne cchiù liggiere, 288 a deportazzione e 67 all'esilio, ppe'tramente ate fujeno libberate.

'O periedo napulioneco

'E cinch' anne aroppo vedetteno 'o guvierno burboneco cunfuso assaje dint'e rapporte cu'a Franza 'e Napulione, ca, si 'a na parte 'dummaneva assaje forte 'ngopp'o continente, 'a chell'ata ,'mmece, manteneva na stratiggia paricchio difenziva stesso pe' 'copp'o mare: 'sta situazzione ccà nun permetette ô Regno - strateggicamente allocato mmiez'o Mediterraneo - 'e s'mantenè neutrale 'ind'a guerra 'e Patreterno ca tanno cumbatteveno 'Ngrise e Francise.

Gioacchino Murat

Doppo 'a vittoria d'Austerlitz d' 'o 2 'e dicembre 1805, Napulione sistemarrà definitivamente 'a situazzion'a Napule, addichiaranno 'a 'rrecettata d' 'a dinastia d' 'e Burbone e nummenanno 'o frato suojo Giuseppe rRe 'e Napule.

Ferdinando, ca se ne fujette n'ata vot'â Sicilia, s'avetta subbeto cunfruntà cu'e cunferenze 'e ll'angrise, ca vuleveno fà addivintà stesso chella isula nu prutetturato (comme pe'tramente ggià 'eveno fatto cu' Malta). Doppo Giuseppe Bonaparte, ca ô 1808 se ne jette a guvernà â Spagna (manco a dd'o fà apposta, ô posto d' 'o frat'e Ferdinando, Carlo IV), arrivaje Gioacchino Murat, rignante 'nfin'ô majo d' 'o 1815, ca s' arrepigliaje pe' isso 'o titulo 'e Re d' 'e Ddoje Sicilie scancillanno ll'autorità ammenistrativa d' 'o Regno 'e Sicilia, addò pe'tramente 'eva sbarcato stesso Ferdinando, e facenno d' 'o Regno una nazziona sola cu' capitale a Napule.

Sott'a riggenza 'e Giuseppe Bonaparte, 'o 2 'e aùsto 1806, ascette 'a famosa legge contr'o sistema feudale stesso dint'o Regno 'e Napule. 'A pulitica d'abbulizzione d’’a feudalità, ca maje fuje accussì forte comme a dinto 'stu mumento ccà, grazzie pure a ll'ajuto d' 'e giuriste Giuseppe Zurlo e Davide Winspeare, fuje purtata annanzo pure da parte d' 'o stesso Gioacchino Murat e ,affinale ,'ngarraje a purtà ll'effetto sperato e a crià na base borghese pure 'ind'a chelli zone cchiù socialmente ed economicamente arretrate, pure si, p' 'a maggior parte, 'e ccose bone s'vedetteno sulo addò 'o sviluppo ggià ce steva. 'A fine d' 'a feudalità purtaje comunque assaje progresso pure pe' dint'e settore giurisdizziunale ed ammenistrative.

'Sti riforme 'e francise 'e purtajeno pure a Napule, ca, comme capitale e cchiù 'mportante cità d' 'o Regno, perdette assaje prestiggio, pure pecchè stess'e francise avviajeno a s'applicà, lloro p' 'a primma vota, 'ngopp'o sviluppo d' 'e copoluoghe pruvinciale o d'ati cità sempe cchiù assaje arretrate, nu sviluppo ca se vedette assaje p' 'o settore 'e ll'ammenistrazzione civile, comme pure p' 'o settore militare, giudizziario e finanziario.

Cu' tutto ca s'eva 'o rre 'e Napule, Gioacchino Murat cuntinuaje a luttà 'nzieme cu' Napulione e cu' ll'esercito napulitano d' 'o suojo 'ind'a ati guerre. Cumbattette 'ind'a campagna 'e Russia e, pe sarvà 'o trono suojo da mano a ll'austriace, s' mettette 'ngapa a n'esercito ca pe' nniente nun 'ngarraje a conqustià sana sana ll'Italia. 'Sta guerra, passat'â storia cu'o nomme 'e guerra austro-napulitana, affinale vedette a Murat 'e 'rrefonnere 'ind'a famosa battaglia 'e Tolentino e, cu'o trattato 'e Casalanza d' 'o 20 'e majo 1815, 'o ritorno a Napule d' 'e Burbone.

Ristaurazzione

Quanno Ferdinando turnaje a Napule p' 'a siconna vota, nun ce stettero repressiune assaje. Isso mantenette 'a maggior parte d' 'e riforme d' 'e francise (fuje però, pe' ffà n'esempio, abbulito 'o divorzio), addivintanno 'e 'sta manera 'o masto 'e na cchiù moderna monarchia ammenistrativa avviata d’’e francise. Ll'unica granda ristaurazzione ca Ferdinando facette s'avette cu'e rapporte cu'a chiesia, ca turnaje a divintà na realtà assaje 'mpurtante dint'a vita civile d' 'o Regno. Doppo 'o Cungresso 'e Vienna e 'o Trattato 'e Casalanza (20 'e majo 1815), ll' 8 'e dicembre 1816, Ferdinando IV jognette Napule e Sicilia 'ind'a nu regno sulo cu'o nomm'e "Regno d' 'e ddoje Sicilie" e, abbandunato 'o nomm'e Ferdinando IV 'e Napule e III 'e Sicilia, se dette chello 'e Ferdinando d' 'e dduje Sicilie. 'Stu fatto, comme conseguenza, scancellaje 'a Custituzzione ca stesso Ferdinando aveva dato â Sicilia. Nfin’’a primma d’’o Cungresso 'e Vienna, 'o Regno 'e Sicilia 'eva mantenuto ll'innipennenza soja, rapprisintata d'ô Parlamento Siciliano, cu' tutto 'e ll'aunione personale (cioè nu sulo Rre ppe' dduje Regne) cu'o Regno 'e Napule; 'a realtà era ca nce steveno dduje regne innipenniente ll'uno 'a ll'ato; Ferdinando s'applicava però cchiù pe' Napule ca p' 'a Sicilia stessa, scuntentanno 'o populo siciliano.

Ô 1812, 'o Rre Ferdinando 'e Burbone, fujenno 'a Napule occupata 'a Napulione, s' arretirava â Sicilia, addó 'o steva aspittanno tutto nu populo a ffesta, e nun sulo: 'e siciliane nce chiedetteno na Custituzzione ca nc'avessa saputa dà na stabbiletà e nu deritto cchiù fforte a lloro e stessa â Sicilia. Dato ca pure 'e 'ngrise 'o sfruguliaveno assaje a Ferdinando 'ngopp'a 'stu fatto d' 'a Custituzzione,e dato ca pure lloro teneveno assaje interesse 'ngopp'a chell' isola, Ferdinando 'a Custituzzione c' 'a dette, na Custituzzione a base 'ngrese, grande esempio 'e libberalità pe' ll'Europa d' 'o tiempo. Ô 1814, però, doppo 'o Cungresso 'e Vienna, 'o Rre Ferdinando 'e Burbone, facette a 'ngarrata: jognette 'o Regno 'e Sicilia e 'o Regno 'e Napule 'ind'a unu sulo, crianno 'o Regno d' 'e Ddoje Sicilie; chello ch' d'era o' Parlamento Siciliano, picciò, nun teneva cchiù raggiona d'esssere e "de facto" s'abbuccaje. 'A munarchia burboneca facette 'a ristaurazzione d' 'a soja, nun 'eva 'rrepigliato cioè chello ca 'e dduje regne ereno primma d' 'o 1789, ma pijaje ,ô ccuntrarjio, na dicisione ca purtava "de facto" Napule e Sicilia a chello ch' d'ereno cinche secule apprimma, cioè ,comme succedette asotto a Carlo d'Angiò, nu Regno sulo. 'Stu fatto nun jette propjio a ggenio â classe puliteca siciliana, ca se vedeva luvato chello ca oramaje s'eva nu regno innipenniente 'a cchiù 'e 700 anne.

Ferdinando I

Quase subbeto accummenciaje a se spannere 'o sentimiento "anti-burbonico", cu' dimostrazzione d'orgoglio e identità siciliana , 'ngopp'a tutto grazzjie all' opera 'e ll'aristocratic'e Paliermo. 'A 'rrevutata vera e propria accumminciaje ô 1820, avviat'a Paliermo, ca purtaje all'inzediamento 'e nu guvierno pruvvisorio, addeciaratuse separatista. 'Sta 'rrevutata fernette però ambresso ambresso, 'e meglie cità d' 'a Sicilia nun 'ngarrajeno a truvà n'accordo vero e proprio ll'une cu' ll'ate (a Messina e a Catania nun jeva 'a ggenio ca s' 'a cummanasse Palermo sulo) e p' 'e Burbone fuje facile overamente a d' 'a luvà a miezo stesso 'sta 'rrevutata. 'O primmo 'e luglio 1820, â nutizzia ca â Spagna êva stata ripristinat'a Custituzzione d' 'o 1812, a Nola na cumpagnia 'e surdate cu' Michele Morelli e Giuseppe Salvati 'ngapa a tutte arrevutaje. 'Sta 'rrevutata ll'appujajeno pure cierte ufficiale 'mpurtante 'e ll'esercito, comm'a Guglielmo Pepe. Ferdinando, visto ca nun s'eva possibbile a dda fà fernì stessa 'sta 'rrevutata, accuntitaje a tuttuquante e c' dette 'sta Custituzzione, nummenanno 'o figlio Francesco comm'a vecarjio d' 'o suojo. 'O primmo 'e ottobre accummenciaje 'a costruzziona d' 'o parlamento d' 'o nuovo, ca fernette a aùsto, addò poje ambresso se spannette ll'idiale burghese ca stess'e francise êveno purtato a Napule cocche anno apprimma.

'O parlamento dette n' accunciata a ll'ammenistrazzione d' 'e pruvincie e d' 'e comune e sistimaje 'e llegge 'ngopp'a libbertà 'e religgione e 'a libbertà 'e stampa. 'Sti ccunfedenze ch' 'o Rre Ferdinando cuncedette ô populo suojo ,però, nun jetteno assaje a ggenio a ll'ati rignanti d'Europa, tanto ca chiste cca s' 'o chiammajeno a Lubiana. 'O Rre nun vulette partì, comme pure 'o figlio suojo Francesco. Doppo 'o Congresso ca poje stesso a Lubiana se facette, ô Regno venetteno ll'austriace a ffà 'a guerra e a scancillà na vota e pe' ssempe 'sta ddijo 'e Custituzzione. Ll'esercito napulitano, cu' Guglielmo Pepe 'ncapa a tutto, nun sparaje na botta, pure pecchè stesso 'o Rre dicette ,'ngapa a isso, ca 'sta guerra nun s'avev'a fà e ca ll'austriace, scis'a Napule pe' vvija stesso d' 'a Costituzzione, aveveno venut'a ffà 'o bbene d' 'a cità.

'O 23 'e marzo 1821 Napule venette occupata, 'a custituzzione venette luvat'a miezo e accummenciaje 'a repressiona: affinale se cuntajeno 13 ergastole e 30 cundanne a morte, mmiezo a cheste pure chell'e Morelli e Silvati - fucilate ô 1822 - e chell'e Michele Carrascoso e Guglielmo Pepe, ca 'ngarrajeno a se ne fujì 'a Napule primme d'essere pure lloro accise.

Francesco I

Ê primm'e gennaro d' 'o 1825 Ferdinando murette e addivintaje re 'o figlio d' 'o suojo Francesco, cu'o nomm'e Francesco I. Ll'anne suoje 'e guvierno fujeno 'nzignate 'a nu sviluppo economeco e tecnologgeco assaje gruosso. 'A puliteca soja addummanette, però, tale e quale a chella llà d' 'o pate , e ccioè riazziunaria, cu' tutto ca stesso isso , quanno nce stetteno 'e rrevuluzziune asotto 'o guvierno stesso 'e Ferdinando, addimustraje ll'appoggio suojo p' 'a rivuluzzione stessa. Murette a Napule dint'ô nuvembre 1830.

Ferdinando II

Mappa d' 'o Regno

Muorto Francesco, ll'8 'e nuvembre 1830, 'o Regno passaje mmano ô figlio Ferdinando, cu'o nomm'e Ferdinando II, ca tanno teneva sulo vint'anne. 'O rre d' 'o nuovo s'addimustraje quase subbeto nu rignant'e progresso e, 'ngopp'a tutto, assaje 'e core cu'o populo suojo. 'O guvierno d' 'o suojo, 'nfatte, nfin'ô 1848, fuje nu guvierno 'e riforme d'economia e d'ammenistrazzione d' 'o Stato. 'Ngopp'a tutto, ô settore finanziario , jette a scennere assaje 'a prissione fiscale, pure pecchè Ferdinando sistimaje 'e spese pubbliche e sparagnaje 'ngopp'e spes'e corte. Ferdinando turnaje pure a chiammà tutta chella ggente innispensabbele pe' Napule,ma che stessa da Napule se n'era avut'a fuità (in primìs Pepe e Carrascosa), isso 'e dette n'ata vota ô posto lloro 'e fatica, cu' cocche privileggio 'e cchiù pe' chille ca cchiù s' 'o mmeretavano, e, mmiezo a tutte 'sti menistre funzionarjie impiegate e ufficiale d'esercito ,cu' tutto ca cierte 'e lloro 'eveno faticate pure asotto a Murat, 'ngarraje a truvà chella fiducia e chillu rispetto ca ll'servetteno a meglio guvernà 'o Regno stesso. Faticaje comm'a cchè pure 'ind'o sociale , motode 'e punizzione d' 'e carcirate politice e ammenistrazzione d' 'e priggiune addivintajeno meglio assaje, e fuje sempe isso pe' primmo ch' applicaje 'e principie 'e correzzione e rieducazzione stesso p' 'e carcirate.

P' 'a puliteca estera, Ferdinando circaje 'e mantenè 'o Regno d' 'o suojo 'a fora d'ogne 'nfluenza furastiera: "Innipennenza",chesta s'êva 'a parola d'ordine d' 'a soja. 'O Rre, mperò, circaje 'e cummuglià stesso 'ind'o Regno quanta cchiù investimiente estere pussibbele,e pe' ddà na mossa ô ll'avanzamento tecnologgico e pe' s'affiancà comme sviluppo e progresso tanto quant'â Franza, comme 'a Ngreterra; ppe'tramente, però, proprio pe' 'sta puliteca d' 'a soja, isso se facette nemmice ll'ate state d'Europa, ca, puliticamente, 'o lassajeno "fore morra". Assaje fujeno poje 'e primate ca asotto 'o regno suojo se facetteno: 'a primma ferruvia d'Italia ('a "Napule-Puortece", inaugurat'ô 1839), 'o primmo telegrafo elettrico e 'o primmo faro lenticolare d'Italia, senza cuntà ll'innovazzione ca stesso isso purtaje a ll'ingegneria e a ll' industria.

S'ha dda arricurdà poje ch'ô 1816 'o Guvierno vretanneco se facette dà da Ferdinando 'o monupolio d' 'o sfruttamiento d' 'o zurfo siciliano (quase 'o 90% d' 'a produzziona mondiale) pe' na cosa 'e sorde ca quase nun'era niente. 'O zurfo tanno teneva na ddijo d'impurtanza a leviello strateggeco, faticanno stesso 'ngopp'o zurfo 'nfatte se produceveno povere da sparo e acido sulforeco, quinne s'eva 'mpurtante assaje a mantenè 'stu monopolio,e pe' ll'innustria d' 'a guerra e pe' fatte militare strateggece d'ogne relevanza. Ferdinando II, ca tanno vuleva 'nzoccà 'a tassa 'ngopp'o mmacenato, na tassa ca nun jeva assaje a ggenio ô populo suojo ,'ngopp'a tutte a chille cchiù puverielle, decidette 'e luvà stesso 'stu monopolio da man'ê 'ngrise p' c' 'o cunzignà ê francise, ca pavaveno cchiù d' 'o duppio 'e primma: scuppiaje accussì chella ca fuje chiammata "quistione d' 'e zzurfe". Lord Parlmerston mannaje subbeto na flotta militare annanz'o Gurfo 'e Napule, cu' ll'intenzzion'e bumbardià 'a cità. Ferdinando però se facette anem'e curaggio e appriparaje pure isso flotta (ca tanno s'êva forte assaje) e ll'esercito d' 'e ssuoje p'accummencià 'sta uerra. Quase pe' nniente nun succedete 'o guajo, grazzjie pure ô Rre Luigge Filippo 'e Franza, ca 'nvitaje a raggiunà e 'a Ngreterra e stesso a Ferdinando.

'O Rre Ferdinando II d' 'e ddoje Sicilie

'O regno, però, ô 1848, venette n'ata vota mise sott'e 'ngoppa 'a ll'innipennenniste siciliane, nu ddijo 'e guaio ca s' purtaje appriesso tutto nu strascino d'ati 'rrevutate ca ambresso ambresso se spannettero sane sane tanto a ll'Italia quanto a ll'Europa. Succieso 'st'ato maciello, 'o Rre cuncidette n'ata vota 'a Custituzzione, 'o primmo a ll'Italia, cu'o decreto regio d' 'o 29 'e jennaro, na Custituzziona a modello francese - ca tanno s'eva 'o meglio - (tale e quale facette 'o Regno 'e Zardegna dduje mise aroppo).

Ô jennaro d' 'o 1848, a Paliermo, â Chiazza d''a Feravecchia, accummenciaje n'ata 'rrevutata, cu' Giuseppe La Masa 'ngap'a tutto. Aroppo a na seri'e battaglie pure assaje violente, La Masa e ll'esercito popolare d' 'o suojo 'ngarrajeno a vencere contr'e surdate burbonoce e a libberà ,accussì, sana sana 'a Sicilia. A frevaro venette addichiarato 'o «comitato generale rivuluzziunario» , poco cchiù tarde 'stu stesso comitato criaje nu guvierno provvisorio a Paliermo,cu'o libberale moderato Ruggero Settimo nummenato presidente. Ll'11 'e frevaro fuje firmata 'a Custituzzione, giurat'o 24 'e frevaro, 'o stesso juorno quanno cioè proprjio â Franza ,addò pareva ca nun avessa succiesso maje niente 'e chello ca 'ngoppa sta scritto tanto d' 'a libbertà ca stesso lloco nc'avess'a avuta essere e addò steveno 'o stesso succedenno macielle 'e tutte manere, se n'avett'a fujì da Parigge 'o rre Luigge Filippo. Doppo a tutto 'stu burdello, 'o 25 'e marzo 1848, s'avette 'a primma riuniona d' 'o Parlamento Generale 'e Sicilia, cu stesso Ruggero Settimo e ll'ate menistre d' 'e suoje ca addichiarajeno ll'innipennenza ufficiale 'e ll'isola. 'Stu guvierno, però, fin'e subbeto s'mbrugliaje mane e piede, cu'e moderate 'a na parte , 'e democratece a n'ata e 'e mazziniane a n'ata ancora, 'o Parlamento Siciliano nun 'ngarrava a se truvà maje bbuono 'ngoppa a nisciuna decisiona, 'e cità siciliane poje si steveno bbuono mmane a ll'innipennenniste,'e paise e 'e campagne steveno 'mmece organizzate assaje malamente, cu'a pupulazzione ca ogne tre o quatto s'arrevutava.

Ô mese 'e abbrile, ô Regno s'avetteno ll'elezziune. Na parta cchiù radicale 'e 'st'elette s'appiccecaje cu' Ferdinando pecchè lloro overamente vuleveno 'ncignà chello ca steva scritto 'ngopp'a Custituzione, 'o ccuntrario 'e Ferdinando stesso. 'Stu bisticcio pe' ffà accuncià 'sta Custituzzione adduraje 'nfin'o 15 'e majo, quanno cioè s'avett'a 'rrapì 'a Cammera d' 'o Parlamento. Chillu juorno succedette 'o burdello overo, 'e libberale s'arrevutajeno cu' scuppett'e barricate e 'o rRe fuje costretto a chiudere 'a Cammera e a dda fà 'rapì nu mese aroppo, poje nu mese aroppo ancora, nfi a quanno s'decidette ,'o dudece 'e marzo 1849, d'â mantenè "riaggiornata" a tiempo indeterminato.

 Sicilia, pe'tramente, 'o rRe , pe' vvija d' 'a 'rrevutata, 'eva mannato 'o ggenerale Carlo Filangieri a ll'dà na scutuliata stess'ê ribelle. Filangieri, pe' mmiezo 'e na stratiggia militare 'e Patreterno, bumbardiaje Messina (e ppe' cchesto adoppo a Ferdinando 'o detteno 'o cuntrannomme 'e "Re Bomma") ngarranno poje a sistimà sana sana 'a situazzione a tutt'a Sicilia. Ll'esperienza d'innipennenza siciliana fernette 'nd'a staggione d' 'o 1849, n'avvenimento ca , 'nzieme cu'a 'rrevutata d' 'o 15 'e majo e ll'attentato ca Ferdinando subette ll'8 'e dicembre d' 'o 1856 pe'mmano d' 'o rivuluzzionario mazziniano Agesilao Milano, facette passà 'o ggenio 'e riforme libberale stesso a Ferdinando e ca scancillaje pe' ssempe ll'idea 'e mantenè na custituzzione, ggià sospesa a tiempo indeterminato, stesso pe' dint'o Regno.

Dopp'a 'sti fatte, ll'opinione pubbleca furastiera accummenciaje a vedè Ferdinando stesso comme a nu sovrano malamente assaje, 'o peggio esempio 'e totalitarismo 'nfame e carugnuso. Luvanno chesto e facenno dduje cunte 'ind'a sacca, Ferdinando II d''e Ddoje Sicilie, muorto poje 'e setticimia 'o 22 'e majo 1859 a sule 49 anne, se pô però 'nzignà comm'a uno d' 'e meglie rignante ca hanna guvirnato Napule e 'o Meridione d'Italia 'n generale. Curaggiuso e intrapennente comm'a poche primm'e isso, Ferdinando sapette rifurmà sano sano 'o Regno, 'a ll'esercito a ll'innustria, d'ô sociale â marina. 'A morta d' 'a soja ,aunit'ê scarze capacetà puliteche e militare d' 'o figlio Francesco, signaje 'a ruìna d' 'e Ddoje Sicilie.

Francesco II

Muorto Ferdinando, 'o figlio suojo Francesco sajette ô trono d' 'e Ddoje Sicilie stess'o juorno ch' 'o pate se ne jette.

Francesco II, ll'urdemo rre d''e Ddoje Sicilie

'E carattere assaje scuornuso, Francesco s'êva poco scetato 'ngopp'e qquistione puliteche economiche e militare ca tanno apparteneveno ô regno suojo, 'o ccuntrario d' 'o pate, e s'addimustraje, picciò, assaje poco appriparato a dd'affruntà e 'e garibbaldine e ll'invasione piemontese ca venette aroppo.

'O Regno suojo accummenciaje subbeto cu' na 'rrevutata, 'stavota fujeno 'e surdate sguizzere a s'ribbellà, 'nfatte, ppe' vvija 'e n'ordinamento stesso d' 'o guvierno sguizzero, s'decidette ca 'sti militare nun puteveno cchiù servì 'ind'a ll'esercite 'e paise furastiere. 'O guajo s'apparaje, ma pe'ttramente Francesco steva mettenno sott'e 'ngoppa sana sana ll'ammenistrazzione d' 'o guvierno d' 'o pate Ferdinando, luvanno 'a miezo 'e viecchie menistre cunzervatore e sciglienno, comme classe politica d' 'a soja, riformiste e libberale 'e tutte manere. 'Sta classe dirigente d' 'a nova fuje 'a ruìna d' 'o Regno, essa 'nfatte, proprjio comm'o Rre Francesco, s'addimustraje impreparata e poco decisa quanno arrivaje 'o mumento 'e lottà cuntr'a garibbaldine e piemuntise, causanno 'ind'a nniente 'a 'rrecettata d' 'e Ddoje Sicilie e 'a fine d' 'o guvierno burboneco ô Meridione d'Italia.

Fine d''o Regno

Ll'11 'e majo 1860, Giuseppe Garibaldi cu'e Mille, ncopp’’e dduje vapure Lombardo e Piemonte e supportato 'a ate vvarche d’’a marina 'ngrese, sbarcajeno a Marsala. Subbeto s'aunettero a Garibaldi assaje volontarie siciliane, p’’a maggior parte "picciotti" mafiuse e criminale (pe' ll'esattezza 500 'e lloro), ca se mettettero a disposizzione stess'e Garibaldi ggià 'ind'a battaglia 'e Calatafimi, ca vedette vencere 'e mille contr'a n'esercito 'e mmerzo 4000 burbonece. Francesco Landi s'arritiraje 'a Calatafimi e 'o stato maggiore 'e Lanza nun facette niente pe fremmà 'e piemuntise, perdenno juorni 'mpuranti. Pe'ttramente Garibaldi s'era addechiarato "dittatore d''a Sicilia" a nomm'e Vittorio Emanuale II e ggià s'appriprava a trasì a Paliermo.

A difesa 'e Paliermo nce steveno 16.000 surdate burbonece asotto 'o ggenerale Lanza, ma stesso 'stu ggenerale facette chiudere tutto ll'esercito suojo 'ind'e fortezze d''a cità, dannoce accussì ll'opportunità a Garibbaldi 'e trasì stesso a Paliermo senza sparà na botta. 'O 27 'e majo, però, arrevaje 'o ggenerale sguizzero von Meckel ca, cu'e surdate ca stess'ô ggenerale Lanza 'eva tenute 'nchiuse dint'a chelli stessi furtezze, sfunnaje sane sane 'e pusizzione d''e garibbaldine, arrevanno quase subbeto ô quartiere S. Anna addò stesso Garibaldi steva 'nzerrato pe' dint'a nu palazzo, 'o palazzo d''o Pretorio, ma proprio quanno stesso von Meckel steva pe' ddà ll'attacco a 'stu quartiere, arrevajeno 'e capitane d''o Stato Maggiore Michele Bellucci e Domenico Nicoletti ca, p'ordine 'e Lanza stesso, dicetteno ô sguizzero ca era stato firmato 'n armistizzio cu'e garibbaldini e ca s'aveva fernì 'e luttà. Lanza, comm'a Landi, na vota turnato a Napule, aspittanno 'o pruciesso pe trarimiento, fuje cunfinato a Ischia.

Aroppo a ll'armistizzio 'e Paliermo, ll'8 'e giùgno, 24.000 surdate duosiciliane lassaveno 'a cità pe s'mbarcà verz'ô cuntinente. Aroppo a partenza 'e 'sti surdate e aropp'ô pruciesso 'e Bronte, addò Nino Bixio facette accidere 'o sinnaco e quatto cuntadine ch'avévano appicciate 'e ccase 'e proprietà 'e nutabbili e occupate cierte tierre 'ngrese, sott'a ll'ordine 'e Garibbalde stisso 'e garibbaldine se truvajeno a Milazzo 'o 20 'e luglio stess'e chill' anno. Lloco 'nce fuje na granda battaglia e pe nniente 'e burboneci nu' 'ngarrajeno a vvencere proprjio pecchè nn' arrevajeno 'e surdate 'e rinforzo ca stavota apparteneveno ô ggenerale Clary. Garibaldi arrivaje â Calavria, purzì grazzie a na vrang'ê 'rrure militari 'e Burboni e trarimienti 'e ufficiali superiori. 'A paura 'e trarimiento toccaje purzì 'e surdati burboneci 'n Calavria: 'o ggenerale Briganti venette fucilato pe surdate suoje stessi pecchè nce dette ll'ordine 'e s'arretirà mmece ca cumbattere contr'ê fforze cchiù scarze d'ê garibbaldini.

'O 7 'e settembre, abbordo d''o treno ca da Puortece purtava a Napule, d'accordo cu' Liborio Romano, menisto d' 'a pulizzia stesso asotto 'o guvierno 'e Francesco II, cu' Tore 'e Crescienzo e cu' tutt'a camorra 'e Napule, Garibbalde arrivaje 'ind'a Capitale. Ppe ttramente Francesco s'arreteraje a Gaeta, lassando int'ô Banco 'e Napule tutt'o patrimonio riale d''o suojo e d''a famiglia. 'E surdate 'e Garibbalde trasetteno dint'a cità senza affruntà resistenze, 'e gguardie fujeno mise a faccia 'nderra d'ê cammurriste 'e Tore 'e Crescienzo accussì ch’’e garibbaldine stesse avessano pututo arrevà 'nfino 'e dint'a Capitale senza sparà manco na botta. 'E cammise russe mettetteno sottengoppa na cità facenno violenza 'ngopp'ê femmene, arrubbanno fin'e dint'e case e 'nchiavecanno sane sane 'e monumente.

Aroppo l'aunione d''o Regno d'Italia, nascettero bande 'e brigante ncuraggiate e finanziate d''o govierno burboneco in esilio e d''o Stato Puntificio, c'arrevutajeno 'o meridiune. Chesta guerra civile durajee quase 10 anne e pruvucaje quase 200 migliare 'e muorte tra brigante e surdate 'e Savoia. 'E bande cchiù grosse e cchiù periculose stevano int''a Baselecata, cumannate da Carmine Crocco.

'O storeco Lancaster se n'accorgette c''a ntegrazione d''o Regno d''e Ddoje Sicilie int''o Regno 'e ll'Italia cagnaje 'o futuro 'e Napule, e d''e territorie ca ce stevano int'a stu stato oramai scumparùto: "'A misèria significaje l'emigrazione 'e crestiane 'a migliàre, c'abbandunajeno 'a casa ascianno nu futuro meglio."

Bibbliografia

• Carlo Alianello, La conquista del Sud, Rusconi 1972
• Pino Aprile, Terroni - Tutto quello che è stato fatto perché gli italiani del Sud diventassero "meridionali", ediz. Piemme, Milano 2010
• Antonio Boccia, A sud del Risorgimento, ediz. Tandem, Lauria 1998
• Giorgio Cucentrentoli, I 200 drammatici giorni della Fedelissima Civitella del Tronto, Edigrafital, 1997
• Hercule De Sauclières, Il Risorgimento contro la Chiesa e il Sud. Intrighi, crimini e menzogne dei piemontesi. Controcorrente, Napoli, 2003. ISBN 978-88-89015-03-2
• Lorenzo Del Boca, Maledetti Savoia! Piemme 2003 ISBN 88-384-7040-5
• Gino Doria, Storia di una capitale. Napoli dalle origini al 1860., Ricciardi, Milano-Napoli, 1975
• Nicola Forte, Viaggio nella memoria persa del Regno delle Due Sicilie. La storia, i fatti, i fattarielli ed. Imagaenaria, Lacco Ameno 2007 - ISBN 88-89144-70-X
• Vittorio Gleijeses, La storia di Napoli dalle origini ai nostri giorni, Napoli, 1977.
• Salvatore Lucchese, Federalismo, socialismo e questione meridionale in Gaetano Salvemini, Lacaita, Bari 2004
• Denis Mack Smith, Storia d'Italia, Laterza, Roma-Bari, 2000. ISBN 88-420-6143-3
• Mario Montalto, L'Esercito delle Due Sicilie
• Mario Montalto, L'armata di mare delle Due Sicilie
• Ruggero Moscati, I Borboni d'Italia, Newton Compton ed., Roma 1973.
• Francesco Saverio Nitti, La Scienza delle Finanze, 1903
• Francesco Saverio Nitti, Nord e Sud, 1900
• Pietro Summonte, Historia della cità e del regno di Napoli, Napoli, 1748
• Verdile Nadia, Carissima compagna mia, Caserta, Garma, 2007
• Verdile Nadia, Un anno di lettere coniugali, Caserta, Spring Edizioni, 2008
• Verdile Nadia (introduzione di), L'utopia di Carolina. Il Codice delle Leggi leuciane, Napoli, Regione Campania, Stamperia Digitale, 2007
• Verdile Nadia, Tra leggi illuminate e lettere private: il 1789 di Maria Carolina d'Asburgo, in "Archivio per la Storia delle Donne", V, 2008; pp. 71–106
• John Davis, Societa e imprenditori nel Regno borbonico, 1815-1860, Biblioteca di Cultura Moderna Laterza, Bari, 1979
• Nicola Ostuni, Finanza e economia nel Regno delle Due Sicilie, Liguori Editore, Napoli, 1992, ISBN 88-207-2193-7

Vvoce pariente

• Rial Marina d''o Regno d''e Ddoje Sicilie
• Rial Esercito d''o Regno d''e Ddoje Sicilie
• Unità 'e misura d''a pruvincia 'e Napule
• Regno 'e Sicilia
• Regno 'e Napule
• Regno 'e Trinacria
• Elenco d''e rre 'e Napule e Sicilia
• Linea 'e successione ô trono d''e Ddoje Sicilie
• Presidente d''o Cunziglio d''o Regno d''e Ddoje Sicilie
• Meniste 'e ll'interno d''e Ddoje Sicilie
• Meniste 'e grazzia e giustizzia d''e Ddoje Sicilie
• Inno ô Rre
• Faro 'e Messina
• Storia d''a Sicilia
• Trattato 'e Casalanza
• Murattismo
• Ddoje Sicilie
• Mezzogiorno
• Revisionismo d''o Risurgimento
• Spedizzione d''e Mille
• Santa Maria d''o Puzzo